ލައިސަންސް ނެތި ކޭބަލް ޓީވީގެ ހިދުމަތްދޭ ފަރާތްތަކުން 30 ދުވަހުގެ ތެރޭގައި ހުއްދަ ހޯދުމަށް އަންގައިފި

ރާއްޖޭގައި ކޭބަލް ޓެލެވިޒަންގެ ހިދުމަތް ދިނުމުގެ ލައިސަންސް ނެތި، ރަށްރަށުގައި ކޭބަލް ޓެލެވިޒަންގެ ހިދުމަތް ދެމުން ގެންދާ ފަރާތްތަކުން 30 ދުވަހުގެ ތެރޭގައި ގަވާއިދާ އެއްގޮތަށް ލައިސަންސް ނެގުމަށް މޯލްޑިވްސް ބްރޯޑްކާސްޓިންގ ކޯޕަރޭޝަނުން އަންގައިފި އެވެ.

މިމަހުގެ 6 ވަނަ ދުވަހު މޯލްޑިވްސް ބްރޯޑްކާސްޓިން ކޮމިޝަނުން ކޮށްފައިވާ އިއުލާނެއްގައި ބުނެފައިވަނީ، ލައިސަންސް ނެތި ބައެއް ރަށްރަށުގައި ކޭބަލް ޓީވީގެ ހިދުމަތް ދެމުންގެންދާކަން އެކޮމިޝަނަށް ފާހަގަ ކުރެވިގެން މީގެ ކުރިންވެސް ހުއްދަ ނަގައިގެން އެހިދުމަތް ދިނުމަށް އަންގާފައިވާނެ ކަމަށެވެ.

އެއިލާނުގައި ބުނެފައިވާ ގޮތުން 6 އޮކްޓޯބަރުން ފެށިގެން 30 ދުވަހުގެ ތެރޭގައި ކޭބަލް ޓީވީގެ ހިދުމަތް ދިނުމުގެ ލައިސަންސް ނެތި ކޭބަލް ޓީވީގެ ހިދުމަތްދޭ ފަރާތްތަކުން ހުއްދަ ހޯދަންޖެހެއެވެ. އަދި އެމުއްދަތަށްފަހު ހުއްދަނެތި ކޭބަލް ޓީވީގެ ހިދުމަތް ދޭ ފަރާތްތަކާމެދު ބްރޯޑްކާސްޓްކުރުމުގެ ގާނޫނުގައިވާ ގޮތުގެ މަތިން ފިޔަވަޅު އަޅާނެކަމަށްވެސް އެކޮމިޝަނުންވަނީ ބުނެފައި އެވެ.

ކުޅުދުއްފުށީގައި ކޭބަލް ޓީވީގެ ހިދުމަތް 2 ފަރާތަކުން ދެމުން ގެންދެއެވެ. ކުޅުދުއްފުށީ އޮންލައިން އަށް މައުލޫމާތު ލިބިފައިވާ ގޮތުގައި މި ދެކުންފުނިންވެސް ވަނީ ކޭބަލް ޓީވީގެ ހިދުމަތް ދިނުމުގެ ލައިސަންސް ނަގާފައެވެ.