“އާންޓީމެންނާއެކު އެއްދުވަސް”ގެ ނަމުގައި އަމީރު އަމީން ސްކޫލުގައި ހާއްސަ ދުވަހެއް ފާހަގަކޮށްފި

އިބްރާހިމް ހަމީދު

ކުޅުދުއްފުށީ އަމީރު އަމީން ސްކޫލްގެ ޔޫކޭޖީ ދަރިވަރުންނަށް އަމާޒުކޮށްގެން “އާންޓީމެންނާއިއެކު އެއްދުވަސް” މިނަމުގައި މިއަދު އެސްކޫލުގައި ހަރަކާތްތަކެއް ބާއްވައިފި އެވެ.

މިއަދު ފާހަގަކުރި މި ދުވަހާ ބެހޭގޮތުން އެސްކޫލު ހިންގެވުމާ ހަވާލުވެެ ހުންނެވި އައިޝަތު މުހައްމަދު ވިދާޅުވީ، މިފަދަ ދުވަހެއް ޔޫކޭޖީ ދަރިވަރުންނަށް އަމާޒުކޮށްްގެން ބޭއްވުމުގެ މައިގަނޑު މަގްޞަދަކީ އިޖްތިމާއި ހުނަރުތައް ދަސްކޮށްދީ ކުދިންނާއި ގުޅިގެން މަސައްކަތް ކުރުމުގެ ފުރުޞަތު އެދަރިވަރުންނަށް ހޯދައިދިނުން ކަމަށެވެ.

އެގޮތުން މިއަދު އެސްކޫލުގައި ޔޫކޭޖީގެ ދަރިވަރުން ވަނީ 11 ގަޑިއިރު އާންޓީ މެންނާއި އެކު ހޭދަކޮށްފައި އެވެ. އެސްކޫލުގެ ޔޫކޭޖީގައި ކިޔަވަމުންދާ ދަރިވަރުން މިއަދު އެސްކޫލުތެރޭގައި ހޭދަކުރި ވަގުތުތަކުގެ ތެރޭގައި ބެލެނިވެރިން ދަރިވަރުންނަށް ބޭނުންވާ ތަކެތި ގެނައުމުން ކެއުމާއި ހުރިހާކަމެއް ކުރިއަށް ދިޔައީ ސްކޫލުގައި ކަމަށް އައިޝަތު މުހައްމަދު ވިދާޅުވި އެވެ. އަދި އެދަރިވަރުން މިއަދު ގޭތެރޭގައި އާއްމު ދިރިއުޅުމުގައި ކަންކުރަންވީ ގޮތް ބުނެދެވިފައިވާނެ ކަމަށާއި އެދަރިވަރުން ލައްވާ އަމިއްލައަށް ބައެއް ކަންތައްތައް ކުރިއަށް ގެންދިއަ ކަމަށް މައުލޫމާތު ދެއެވެ.

ޖުމްލަ 117 ދަރިވަރުން ބައިވެރިވި މިހަރަކާތްތައް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ދަރިވަރުންނަށާއި އެސްކޫލުގެ ޓީޗަރުންނަށް ސެޓްފިކެޓްތައް ބައްސަވައިދެއްވީ ހދ އަތޮޅު ކައުންސިލުގެ މެމްބަރު އަލީ މުހައްމަދު އެވެ.