ބިމުގެ މައްސަލާގައި ކުރާ މުޒާހަރާ: 3 ދުވަހުގެ ތެރޭގައި ކައުންސިލްއިން ޖަވާބެއް ދޭނެކަމަށް ލިޔުމުން ދިނުމުން މުޒާހަރާ ނިންމާލައިފި

(12:40)

މުޒާހަރާ ނިންމާލައިފި. މުޒާހަރާ ކުރާ ފަރާތްތަކުން ހުށަހެޅި ސުވާލުތަކަށް 3 ދުވަހުގެ ތެރޭގައި ކައުންސިލްއިން ޖަވާބު ދޭނެކަމަށް ކައުންސިލްއިން މުޒާހަރާ ކުރާ މީހުންނަށް ދީފައިވާ ލިޔުމުގައި ވޭ.

މިކަމާއި ގުޅޭގޮތުން ކައުންސިލްގެ ރައީސް އާގުޅާލުމުން ވިދާޅުވީ މައުލޫމާތު ދޭން މިވަގުތު ދަތިކަމަށެވެ. އަދި ފަހުން މައުލޫމާތު ހާމަކުރާނެ ކަމަށެވެ.

(12:25)

މައުލޫމާތު ލިބޭ ގޮތުގައި ރަށު ކައުންސިލްގެ ބައްދަލުވުމަކަށްފަހު، ކައުންސިލް އިން ރައްޔިތުންނަށް ދޭން ބޭނުންވާ ޖަވާބު މިހާރު ވަނީ ލިޔުމަކުން މުޒާހަރާ ކުރާ މީހުންނަށް ދީފައި. ނަމަވެސް އެލިޔުމުގައި ވަނީ ކީކޭކަމެއް އަދި އެމީހުން ހާމައެއް ނުކުރޭ. މެންދުރު ނަމާދަށްފަހު އެލިޔުމުގައި ވާއެއްޗެއް ރައްޔިތުންނަށް އިއްވާނެކަމަށް އެމީހުން ބުނޭ.

(12:00)

މުޒާހަރާ ކުރަމުން ދާމީހުންގެ ކަންތައްތައް މިވަގުތު ވަނީ މަޑުޖައްސާލައިފައި. މައުލޫމާތު ލިބޭގޮތުގައި މެންދުރު ނަމާދަށާއި މެންދުރުގެ ކެއުމަށް މުޒާހަރާ ވަނީ މެދު ކަނޑާލާފައި. އެއްވިމީހުންގެ ތެރެއިން ގިނަ މީހުން މިހާރު މުޒާހަރާ މައިދާން ދޫކޮށްވަނީ ގޮސްފައި. ނަމަވެސް އަދިވެސް ވިއްސަކަށް މީހުން ކައުންސިލް އިދާރާ ސަރަހައްދުގައި އެބައުޅޭ.

ފުލުހުންގެ ތެރެއިންވެސް ސްޓާފޯސް މިހާރު ވަނީ ސަރަހައްދު ދޫކޮށްގޮސްފައި.

މުޒާހަރާގައި ހަރަކާތްތެރިވި މީހަކު މައުލޫމާތު ދިންގޮތުން، ކުޅުދުއްފުށީގެ ބިމުން ގޯތި ދޭނީތޯ ނުވަތަ ވިއްކާނީތޯ، މިސުވާލުގެ ޖަވާބު މިއަދު ލިބެންދެން މެންދުރު ފަހުވެސް މުޒާހަރާ ކުރާނެ.

(11:00)

މުޒާހަރާގެ 3 ބައިވެރިޔަކު ހޮސްޕިޓަލްގައި އެޑްމިޓްކޮށްފި. އެކަކުގެ ލޮލަށް ޕެޕަރ ސްޕްރޭ ޖަހާފައިވާކަމަށް އެހީތެރިން ތުހުމަތު ކުރޭ.

(10:40)

މުޒާހަރާގެ ބައިވެރިއެއް ހޮސްޕިޓަލްއަށް ގެންގޮސްފި.

އެއްވެފައިވާ މީހުންނާ ދިމާލަށް ކަރުނަ ގޭސް ޖަހާފައި ވާކަމަށް މުޒާހަރާގެ ބައިވެރިން ތުހުމަތު ކުރޭ.

(10:30)

ކައުންސިލްގެ ކުރިމައްޗަށް ގާތްގަނޑަށް 100 ވަރަކަށް މީހުން އެއްވެފައިވޭ. އެއްވެފައިވާ މީހުން ކައުންސިލް އިދާރާ ތެރެއަށް ވަނުމަށް މަސައްކަތް ކުރަމުން އެބަދޭ. ނަމަވެސް ފުލުހުން ވަނީ އެމީހުންނަށް ނުވަދެވޭނެހެން އިދާރާ ކުރިމަތީގައި އެތުރިފައި.

މައުލޫމާތު ލިބިފައިވާ ގޮތުގައި އެއްވެފައިވާ މީހުންގެ ތެރެއިން އިސްކޮށްއުޅޭ ރަޝާދު ވަނީ މިހާރު ކައުންސިލްގެ ރައީސް ޖަމްޝީދު އާ ބައްދަލުކޮށް އެމީހުންގެ ޝަކުވާތައް އުފުލާފައި.

(8:00)

ކުޅުދުއްފުށީގެ ފަޅުތެރެއިން ހިއްކާފައިވާ ބިމުން، ބިން ވިއްކަން ކުޅުދުއްފުށީ ޑެވެލޮޕްމަންޓް ކޯޕަރޭޝަނުން ނިންމުމާއި ގުޅިގެން އެކަމާ ދެކޮޅަށް އަޑު އުފުލުމަށްޓަކައި ރައްޔިތުންގެ ބަޔަކު ކައުންސިލް އިދާރާ ސަރަހައްދުގައި މުޒާހަރާ ކުރަމުން އެބަދެއެވެ.

މިމުޒާހަރާގެ ސަބަބުން ފުލުހުން ވަނީ ކައުންސިލް އިދާރާގެ ކުރިމައްޗަށް މީހުންނަށް ނުދެވޭގޮތަށް ކުޅުދުއްފުށީ އަމީނީމަގު ބަންދު ކޮށްފައެވެ. މިގޮތުން އަމީނީ މަގު ނިކަގަސްމަގާ ގުޅޭ ހިސާބުގައާއި މަގާންމަގާ ގުޅޭހިސާބުގައި ރޯޑް ބްލޮކް ބަހައްޓައި މަގު ވަނީ ބަންދުކޮށްފައެވެ.

ނަމަވެސް އެހެން ދުވަސްތަކެކޭވެސް އެއްފަދައިން މިއަދު އަށެއް ޖެހިއިރު ކައުންސިލް އިދާރާ ވަނީ ހުޅުވާފައެވެ. އަދި އޮފީހުގެ މަސައްކަތްތައް ދަނީ ކުރަމުންނެވެ.