ކުޅުދުއްފުށީގައި ޕީޕީއެމްގެ މަސައްކަތްތައް ފެށުމަށްޓަކައި އެޕާޓީގެ ވަފުދެއް ކުޅުދުއްފުއްޓަށް

އިބްރާހިމް ހަމީދު

ކުރީގެ ރައީސް މައުމޫން އަބްދުލް ގައްޔޫމް އިސްކޮށް ހުންނަވައިގެން އުފައްދަވަން ހުށަހަޅުއްވާފައިވާ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ މަސައްކަތްތައް ކުޅުދުއްފުށީގައި ފެށުމަށްޓަކައި އެޕާޓީގެ އިސް ވަފުދެއް ކުޅުދުއްފުއްޓަށް އައިސްފިއެވެ

މިވަފުދުގައި އިސްކޮށް ތިއްބަވަނީ އެޕާޓީގެ އިންތިގާލީ ކައުންސިލްގެ މެމްބަރު އަބްދު ﷲ ޔާމީން އާއި ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފާއި ވައިކަރަދޫ ދާއިރާގެ މެމްބަރު އަލީ އާރިފްއެވެ. މީގެ އިތުރުންވެސް ޕާޓީގައި ހަރަކާތްތެރިވާ ބައެއް މެމްބަރުން މިޓީމާއެކު ކުޅުދުއްފުއްޓަށް އައިސްފައިވެއެވެ. ޕީޕީއެމްގެ މި ވަފުދަށް ވަނީ ކުޅުދުއްފުށީގައި އުޅޭ ޕީޕީއެމް އަށް ސަޕޯޓްކުރާ މީހުން ހޫނު މަރުހަބާ ކިޔާފައެވެ.

މައުލޫމާތު ލިބިފައިވާ ގޮތުގައި ޕީޕީއެމްގެ މިދަތުރަކީ ތިލަދުންމަތީގެ ރަށްރަށުގައި ޕީޕީީއެމްގެ ގޮފިތައް އުފެއްދުމަށާއި މެމްބަރުން ހޯދުމަށާއި ޕާޓީގެ ހަރަކާތްތައް އިތުރު ކުރެއްވުމަށް ކުރަމުން ދާ ދަތުރެކެވެ. މިގޮތުން ކުޅުދުއްފުށީ ގައި އުފައްދާ ޕީޕީއެމް ގޮފީގެ ފަރާތުން މިރޭ ކުޅުދުއްފުށީ ތިލަދެކުނު ސިނަމާގައި ބާއްވާ ޖަލްސާ އެއް އޮންނާނެއެވެ.