އެއްބަނޑު އެއްބަފާ ދެބެން ގުޅިގެން ރޭ ހިންގި މާރާމާރީއެއްގައި ޒުވާނެއްގެ ބޯފަޅާލައިފި

.

އިބްރާހިމް ހަމީދު

އެއްބަނޑު އެއްބަފާ ދެބެން ގުޅިގެން ކުޅުދުއްފުށީގައި ރޭ ހިންގި މާރާމާރީއެއްގައި ޒުވާނެއްގެ ބޯފަޅާލައިފި އެވެ.

ރޭ ދަންވަރު 2:30 ހާއިރު ހިންގި މާރާމާރީގައި އަނިޔާ ވެފައި ވަނީ ކުޅުދުއްފުށީ ސުހާނީ، އުމުރުން 20 އަހަރުގެ އަހްމަދު ހަސަނަށެވެ.

މިމާރާމާރީ ހިންގާފައިވަނީ ކުޅުދުއްފުށީ އެހީތެރިޔާ ފިހާރަ ކައިރީގައި ކުޅުދުއްފުށީ ރިލެކްސް، މުހައްމަދު އިބްރާހިމް (18) އާއި އޭނާގެ ކޮއްކޮ އަހްމަދު އިބްރާހިމް (16) ކަމަށް މަންޒަރު ދުއް ފަރާތްތަކުން މައުލޫމާތު ދިނެވެ. މިމާރާމާރީ ހިނގަން މެދުވެރިވީ ކީއްކަން އަދި ވަނީ ސާފު ވާގޮތް ނުވެފައެވެ.

ރޭ ހިނގި މާރާމާރީގައި އަނިޔާވި ޒުވާނާ އަހުމަދު ހަސަންގެ ބޮލުގެ ބުމަ މަތިން 1  އިންޗި ހާތަން ފަޅާގެން ގޮސްފައިވެއެވެ. އަދި ހަށިގަނޑުގެ އެކިތަންތަން މަށައިގެން ގޮސްފައިވެއެވެ. އޭނާ ވަނީ ރޭ ދަންވަރު ކުޅުދުއްފުށީ ހޮސްޕިޓަލުން ފަރުވާދިނުމަށް ފަހު ދޫކޮށްލާފައެވެ.

ފުލުހުންގެ މީޑީޔާ އޮފިޝަލް ސަބް އިނިސްޕެކްޓަރ އަހްމަދު ޝިޔާމް  ވިދާޅުވީ، ރޭ ކުޅުދުއްފުށީގައި މާރާމާރީއެއް ހިނގާފައިވާ ކަމަށާއި އެމައްސަލައާ ގުޅިގެން ދެމީހަކު ފުލުހުންގެ ބެލުމުގެ ދަށަށް ގެނެސް ތަހުގީގު ކުރަމުންދާކަމަށެވެ.