ކުޅުދުއްފުށީގައި އަޟްޙާ ޢީދުގެ ކުޅިވަރުތައް ފަށައިފި

Nov 6, 2011

އިބްރާހިމް ހަމީދު

ކުޅުދުއްފުށީގައި 1432 ވަނަ އަހަރުގެ އަޟްހާ އީދުގެ ކުޅިވަރުތައް މިއަދު ހަވީރު ކުޅުދުއްފުށީ ހިއްކިބިމުގައި ފަށައިފި އެވެ.

އެގޮތުން މިއަދު އަންހެނުންނާއި ފިރިހެނުންގެ ވާދެމުމާއި ކެއުމުގެ ރޭހެއް ވަނީ ކުރިއަށް ގެންގޮސްފައި އެވެ. އަދި ހިއްކި ބިމުގެ ދެކުނު ކޮޅުގައި އަޅާފައިވާ ސްޓޭޖްގައި ބޮޑުބެރުގެ އައިޓަމްތަކެއް ވަނީ ކުރިއަށް ގެންގޮސްފައި އެވެ.

މިއަދު ހަވީރު އޮތް ވާދެމުމުގެ މުބާރާތުގައި އުހުންތަކުރާ ޓީމާއި އީކްއޭޓަރ ޓީމު ބައްދަލުކުރި މެޗު ކާމިޔާބުކޮށްފައިވަނީ އުހުންތަކުރާގެ ޓީމެވެ. ފިރިހެނުންގެ ދެވަނަ މެޗުގައި ބައްދަލުކުރީ ދިރާގު ޓީމަކާއި ބުރު ޓީމެވެ. ވާދެމުމުގެ މިމެޗުން މޮޅުވެފައިވަނީ ބުރު ޓީމެވެ. ތިންވަނަ ވާދެމުމުގައި ބައިވެރިވީ ރޮކް ޓީމާއި ގޮވެލި ޓީމެވެ. ދެ ދެމުމުން މިމެޗުން މޮޅުވެފައިވަނީ ގޮވެލި ޓީމެވެ.

އަދި އަންހެނުންނަށް ހާއްސަކޮށްގެން ބޭއްވި ވާދެމެމުގެ މުބާރާތުގައި ގަދަ ހިތްވަރާއި ދޮންހިޔަލަ ބައްދަލުކުރި މެޗުގައި ދެޓީމު އެއްވަރު ވުމުގެ ސަބަބުން ގަދަ ހިފުމަކަށް ވަނީ ގޮސްފައި އެވެ. ގަދަ ހިފުމަކުން އެމެޗު ކާމިޔާބު ކޮށްފައިވަނީ ގަދަ ހިތްވަރު ޓީމެވެ.

އަޟްޙާ ޢީދުގެ މުނާސަބަތުގައި ކުރިއަށްދާ ކުޅިވަރުތަކުގެ ތެރެއިން މިރޭ ބައިބަލާ މުބާރާތެއް އޮންނާނެ އެވެ. އޭގެ އިތުރުން ކުޅުދުއްފުށީގައި އަޅާފައިވާ ދެ ސްޓޭޖެއްގައި މިއުޒިކާއި މުނިފޫހިފިލުވުމުގެ ތަފާތު ހަރަކާތްތައް ކުރިއަށް ގެންދާ ގޮތަށް ހަމަޖެހިފައިވާކަމަށް ކުޅުދުއްފުށީގެ އީދު ކުޅިވަރު ކޮމެޓީން މައުލޫމާތު ދެއެވެ.

މިއަދުން ފެށިގެން މިމަހު އެގާރަ ވަނަ ދުވަހާ ހަމައަށް މިއަހަރުގެ އަޟްޙާ ޢީދުގެ ކުޅިވަރުތައް ކުރިއަށްދާގޮތަށް ވަނީ ހަމަޖެހިފައި އެވެ.

މިލިޔުމާއި ގުޅޭ