އަންނަ އަހަރު ބާއްވާ ސާކްގެ ވިޔަފާރި އާއި ޓޫރިޒަމް ފެއާ ކުޅުދުއްފުށީގައި ބާއްވާގޮތަށް ހަމަޖައްސައިފި

މިހާރު ކުރިއަށްދާ 17 ވަނަ ސާކް ސަމިޓުގެ ހާރިޖީ ވަޒީރުންގެ ބައްދަލުވުމުގައި، އަންނަ އަހަރު ބޭއްވުމަށް ހަމަޖެހިފައިވާ ސާކްގެ ވިޔަފާރި އާއި ޓޫރިޒަމް ފެއާ ހދ ކުޅުދުއްފުށީގައި ބާއްވާގޮތަށް ސާކް ގައުމުތަކުގެ ހާރިޖީ ވަޒީރުން އެއްބަސްވެވަޑައިގަނެފި އެވެ.

މިއަދު ކުރިއަށް ދިޔަ ސާކް ގެ ހާރިޖީ ވަޒީރުންގެ ބައްދަލުވުމާބެހޭ ގޮތުން މައުލޫމާތު ދެއްވަމުން ދިވެހި ހާރިޖީ ވަޒީރު އަހުމަދު ނަސީމް ވިދާޅުވީ، ހާރިޖީ ވަޒީރުންގެ ބައްދަލުވުމުގައި ވަރަށ މުހިއްމު ކަންތައްތަކެއް ނިމިގެން ހިނގައްޖެ ކަމަށާއި އެގޮތުން  އިންޑިއަން އޯޝަން ޕެސެންޖާ އެންޑް ކާގޯ ފެރީ ސާވިސް މިއަހަރު ނިމުމުގެ ކުރިން ފެށުމަށް ސާކްގެ ގައުމުތަކުގެ ހާރިޖީ ވަޒީރުން އެއްބަސްވެވަޑައިގަނެފައިވާ ކަމަށެވެ.

ސާކް ސަމިޓު ފެށުމުގެ ކުރިން، ރައީސުލްޖުމުހޫރިއްޔާ މުހައްމަދު ނަޝީދު ނޫސްވެރިންނަށް މައުލޫމާތު ދެއްވަމުން، އިންޑިޔާ އާއި ކުޅުދުއްފުއްޓާއި ދެމެދު ފެރީގެ ހިދުމަތް ވަރަށް އަވަހަށް ފެށޭނެ ކަމަށްވެސް ވަނީ ވިދާޅުވެފައި އެވެ. އެގޮތުން ރާއްޖެއާއި އިންޑިޔާއާ ދެމެދު އޮންނަ ފެރީ، އިންޑިޔާގެ ކޮޗިން އިން ސީދާ ކުޅުދުއްފުއްޓަށް ދަތުރުކުރާނެކަމަށް ރައީސް ވިދާޅުވި އެވެ.

(މައުލޫމާތު ހަވީރު ނޫސް)