މޯލްޑިވްސް ޕޮލިޓެކްނިކުން އަންނަ އަހަރު ކުޅުދުއްފުށީގައި ބާއްވާ ކޯހުގައި ބައިވެރިވުމުގެ ފުރުޞަތު ހުޅުވާލައިފި

އިބްރާހިމް ހަމީދު

މޯލްޑިވްސް ޕޮލިޓެކްނިކުން 2012 ވަނަ އަހަރު ކުޅުދުއްފުށީގައި ބޭއްވުމަށް ހަމަޖެހިފައިވާ ކޯހުގައި ބައިވެރިވުމުގެ ފުރުޞަތު ހުޅުވާލައިފި އެވެ.

މޯލްޑިވްސް ޕޮލިޓެކްނިކުން ކުޅުދުއްފުށީގައި ބޭއްވުމަށް ހަމަޖެހިފައިވަނީ 18 މަސްދުވަހަށް ހިންގާ އިންޖިންގ ރިޕެއަރ އެންޑް މެއިންޓެނަންސް ކޯހެއް ކަމަށް ކުޅުދުއްފުށީ ކައުންސިލް އިދާރާއިން ނެރެފައިވާ އިއުލާނުގައި ބުނެފައިވެއެވެ.

އެކޯހުގައި ބައިވެރިވުމަށް ޝައުގުވެރިވާ ފަރާތްތަކުގެ އެޕްލިކޭޝަން ފޯމް، ނޮވެމްބަރު މަހުގެ 17 ވަނަ ދުވަހުގެ 16:00 ކުރިން ކައުންސިލް އިދާރާއިން ބަލައިގަންނާނެ ކަމަށާއި އެޕްލިކޭޝަން ފޯމާއިއެކު ތަޢުލީމީ ސެޓްފިކެޓްތަކުގެ ކޮޕީއާއި ސްކޫލުގެ ލީވީން ސެޓްފިކެޓާއި އައިޑީކާޑްގެ ކޮޕީ ހުށަހަޅަންޖެހޭ ކަމަށް ކައުންސިލުން މައުލޫމާތު ދެއެވެ.  އެޕްލިކޭޝަން ފޯމް ކައުންސިލުގެ ވެބްސައިޓުންނާއި ޕޮލިޓެކްނިކް ގެ ވެބްސައިޓުން ލިބެން ހުންނާނެ އެވެ.

މިކޯހުގައި ބައިވެރިވުމުގެ ޝަރުތަކީ ގުރޭޑް 10 ނިންމާފައިވުން ކަމަށް ކައުންސިލުގެ އިއުލާނުގައި ވެއެވެ. ޕޮލިޓެކްނިކުގެ ފަރާތުން ތަފާތު ގިނަ ކޯސްތަކެއް ހިންގާއިރު ކުޅުދުއްފުށީގައި މިވަގުތު ހިންގުމަށް ހަމަޖެހިފައިވަނީ، ހަމައެކަނި މި ކޯސް ކަމަށް މައުލޫމާތު ލިބެއެވެ.