ކެންސަރު ބައްޔަށް ފަރުވާ ހޯދަމުން އަންނަ ހަސީބުގެ އާއިލާއަށް 36 ހާހަށްވުރެ ގިނަ ރުފިޔާ ހަވާލުކޮށްފި

އިބްރާހިމް ހަމީދު

ކެންސަރު ބައްޔަށް ފަރުވާ ހޯދަމުން އަންނަ ކުޅުދުއްފުށީ އޯޒޯން ހަސީބު އަލީއަށް އެހީވުމުގެ ގޮތުން ކުޅުދުއްފުށީގެ ޖަމިއްޔާތަކުން އިސްނަގައިގެން ބެހެއްޓި ފަންޑު ފޮއްޓަށް ލިބުނު 36879 ރުފިޔާ އެއާއިލާއަށް މިއަދު ހަވާލުކޮށްފި އެވެ.

ހަސީބު އަލީއަށް އެހީތެރިވުމުގެ ގޮތުން އޯގަސްޓްމަހު ބެހެއްޓި ފަންޑު ފޮށްޓައް ލިބުނު ފައިސާ ހަވާލުކޮށްފައިވަނީ މިއަދު އެކަމަށްޓަކައި ކުޅުދުއްފުށީ ނަލަމައިޒާން ކެފޭގައި ބޭއްވި ރަސްމިއްޔާތެއްގައި އެވެ.

ހަސީބުގެ އާއިލާގެ ފަރާތުން އެނާގެ ބޭބެ އަޚުމީމް ޢަލީ ކުޅުދުއްފުށީ އޮންލައިނަށް މައުލޫމާތު ދެމުން ވިދާޅުވީ، ހަސީބުއަށް އެހީތެރިވުމުގެ ގޮތުން ކުޅުދުއްފުށީގެ ޖަމިއްޔާތަކުން އިސްނަގައިގެން ކޮށްދެއްވާފައިވާ މަސައްކަތް އާއިލާގެ ފަރާތުން އުފަލާއެކު ބަލައިގަންނަ ކަމަށެވެ. އަދި ކުޅުދުއްފުށީ ދެކުނު އަވަށު ޒުވާނުންގެ ދިރުމުގެ މަސައްކަތްތައް ވަކިން ފާހަގަކޮށް އެޖަމިއްޔާއަށް ޝުކުރުދަންނަވާފައި ވެއެވެ. ހަސީބު އަށް އެހީތެރިކަން ފޯރުކޮށްދިން ޖަމިއްޔާތަކުގެ އިތުރުން އެހީތެރިވި ހުރިހާ ފަރާތްތަކަކަށް ޝުކުރުއަދާކޮށްފައި ވެއެވެ.

ކުޅުދުއްފުށީގެ ތިން ސަރަހައްދެއްގައި ބެހެއްޓި ފަންޑު ފޮށިތަކަށް ޖުމްލަ 36 ހާހަށްވުރެ ގިނަ ރުފިޔާ ލިބިފައިވާއިރު، އެމްއޯސީ ބުކްޝޮޕްގައި ބެހެއްޓި ފޮށްޓައް 22009 ރުފިޔާ 60 ލާރި ލިބިފައި ވެއެވެ. އަދި ރިއަލް ޕޮއިންޓްގައި ބެހެއްޓުނު ފޮށްޓައް ޖުމްލަ ލިބިފައިވަނީ 8245 ރުފިޔާ 46 ލާރި އެވެ. ނިޝާން ފިހާރައިގައި ބެހެއްޓި ފޮށްޓައް 6624 ރުފިޔާ 84 ލާރި ލިބިފައި ވެއެވެ.

ހަސީބު އަލީއަށް އެހީވުމުގެ ގޮތުން ކުޅުދުއްފުށީ ހިރަފުސްދަނޑުގައި ފުޓްބޯޅަ ކުޅޭ ކުޅުންތެރިންވަނީ ފުޓްސަލް މުބާރާތެއްވެސް ބާއްވާފައި އެވެ. ހިރަފުސް ކަޕުގެ ނަމުގައި ހަސީބު އަށް ހާއްސަކޮށްގެން ބޭއްވި އެމުބާރާތުން ލިބުނު 15285 ރުފިޔާ އެއާއިލާއަށް ހަދިޔާ ކޮށްފައި ވެއެވެ.

މިއަދު މެންދުރު ނަލަ މައިޒާން ކެފޭގައި ކުރިއަށް ދިޔަ މިރަސްމިއްޔާތުގައި އެ ފައިސާއާ އާއިލާގެ ފަރާތުން ހަވާލުވީ ހަސީބު އަލީގެ ބޭބެ އަޚްމީމް ޢަލީ އެވެ. ފައިސާ އެ އާއިލާއާ ހަވާލުކޮށްދެއްވީ ކުލަބް ޖަމިއްޔާތަކުގެ އިސްވެރިންނެވެ.