ނޮޅިވަރަންފަރުން ގޯތި ދޫކުރުން ލަސްވަމުންދާތީ އެރަށު ކައުންސިލް އިދާރާގައި ތަޅު އަޅުވައިފި

އިބްރާހިމް ހަމީދު

ހދ ނޮޅިވަރަންފަރުން ގޯތި ދޫކުރުން ލަސްވަމުންދާކަމަށް ބުނެ، އެރަށުން ގޯތި ދޫކުރަން ނަގާފައިވާ ކޮމެޓީގެ މެމްބަރަކު ކައުންސިލް އިދާރާގައި މިއަދު ހެނދުނު ތަޅު އަޅުވައިފި އެވެ.

މިއަދު ހެނދުނު ކައުންސިލް އިދާރާގައި ތަޅު އަޅުވާފައިވަނީ، ނޮޅިވަރަންފަރު އަންނާރުމާގެ އަބްދުއްރައޫފް އެވެ. އޭނާއަކީ ގޯތި ދޫކުރުމަށް ކައުންސިލުން ނަގާފައިވާ ކޮމެޓީއެއްގައި ހިމެނޭ މީހެއް ވެސް މެއެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ނޮޅިވަރަންފަރު ކައުންސިލުގެ ރައީސް އިބްރާހީމް އަލީ ވިދާޅުވީ، އަލަށް ދޫކުރަން ހަމަޖެހިފައިވާ ގޯތިތައް ދޫކުރުމުގެ މައްސަލައިގައި އެމަސައްކަތް ހަވާލުކޮށްފައިވާ ކޮމިޓީގެ މެމްބަރަކު ނުކުމެ ރަށު ކައުންސިލް އިދާރަގައި ތަޅުއަޅުވާފައިވާ ކަމަށެވެ. އަދި، ގޯތި ދޫކުރުމަށް ނަގާފައިވާ ކޮމިޓީގައި ކޯރަމް ހަމަނުވުމުގެ ސަބަބުން ބައްދަލުވުންތައް ނުބޭއްވި ގޯތި ދޫކުރުމުގައި ގޮތެއް ނިމިފައި ނުވާ ކަމަށެވެ.

“ގޯތި ދިނުމަށް ނަގާފައިވާ ކޮމެޓީގައި ހަތް ބޭފުޅުން ތިއްބަވާ. އެހެންނަމަވެސް ބައްދަލުވުންތަކަށް ކިޔުމުން ކޯރަމް ހަމަވާ ވަރަށްވެސް އެކޮމެޓީގެ ބައްދަލުވުންތަކަށް ބޭފުޅުން ނާދޭ. އަންނަނީ ދެބޭފުޅުން ނުވަތަ ތިން ބޭފުޅުން. އެހެންވުމުގެ ސަބަބުން މިއަދާ ހަމައަށް ވަނީ ގޯތިދިނުމަށް ގޮތެއްނުނިމި” ނޮޅިވަރަންފަރު ކައުންސިލުގެ ރައީސް ވިދާޅުވި އެވެ.

ހދ ނޮޅިވަރަންފަރުން ދޫކުރާ ގޯތިތަކުގެ މައްސަލާގައި ކައުންސިލުގެ ރައީސް ވިދާޅުވީ، ގޯތިތަށް މިދިޔަ އަހަރު ދޫކުރަން ނިންމާފައި ވަނީ 3000 އަކަފޫޓްގެ 50 ގޯތި ކަމަށާއި އެހެންނަމަވެސް އެގޯތިތަކަށް އެދި 96 ފޯމް ހުށަހެޅިއިރު ޝަރުތު ހަމަވަނީ 50 ފަރާތެއް ކަމަށެވެ. އަދި އެއީ ގޯތި ދިނުމުގައި ފުރަތަމަ މައްސަލަ ޖެހުނު ހިސާބު ކަމަށާއި ސަރުކާރުންވެސް އަންގާފައިވަނީ އެ 50 ގޯތި ދިނުމަށްކަމަށް ކައުންސިލުން ބުނެއެވެ. އެހެންނަމަވެސް އެ 50 ގޯތި ދޫކުރެވިފައި ނުވަނީ ތަފާތު ކުދިކުދި މައްސަލަތައް ހުރުމުންކަމަށް ކައުންސިލުން ބުނެ އެވެ.

ކައުންސިލް އިދާރާގައި މިއަދު ހެނދުނު އެޅުވި ތަޅު ނައްޓާލާފައިވަނީ މިއަދު މެންދުރެއް ހާއިރު ފުލުހުންގެ އެހީތެރިކަމާއެކު ކަމަށް މައުލޫމާތު ލިބެ އެވެ. އަދި އޭގެ ފަހުން އިތުރު މައްސަލައެއް ދިމާނުވެ އިދާރީ މުވައްޒަފުންނާއެކު މަސައްކަތް ކުރަމުންދާ ކަމަށް ކައުންސިލުގެ ރައީސް ވިދާޅުވި އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ކައުންސިލް އިދާރާގައި ތަޅު އެޅުވި އަބްދުއްރައޫފް އަބްދުއްރަހުމާނު ވިދާޅުވީ، އަސާސީ ހިދުމަތްތައްވެސް ރަށު ކައުންސިލުން ލިބެމުން ނުދާކަމަށާއި އަދި ކައުންސިލުން ރައްޔިތުންނަށް ޖަވާބުދާރީވެސް ނުވާ ކަމަށެވެ. ނޮޅިވަރަންފަރުން ދޫކުރުމަށް ހަމަޖެހިފައިވާ ގޯތި ތަށް ދޫކުރުމަށް ކޮމެޓީން ނިންމާފައިވާނެ ކަމަށާއި އަތޮޅު ކައުންސިލުންވެސް އެގޯތިތަށް ދޭން ނިންމާފައިވާކަމަށް ރައޫފް ވިދާޅުވި އެވެ. އަދި ގޯތި ދޫކުރުމަށް ބޭނުންވާ ފޯމްތައްވެސް ހުރީ ނިމިފައި ކަމަށް އޭނާ ވިދާޅުވި އެވެ.

ރައޫފް ވިދާޅުވީ، އެކޮމިޓީގެ މެމްބަރެއްގެ ހައިސިއްޔަތުން މިދިޔަ ޢީދު އައުމުގެ ކުރިން ގޯތި ދިނުމުގެ ކަންތައްތައް ނިންމުމަށް ކައުންސިލަށް ދެންނެވި ކަމަށާއި އެހެންނަމަވެސް “މާދަމާ ގުރުއަތުލާނެ” ކަމަށް ބުނެ ލަސްކުރަމުން އަންނަ ކަމަށެވެ. މިމައްސަލާގައި ކައުންސިލުގެ ރައީސް ވިދާޅުވީ، ޢީދުގެ ކުރިންވެސް ގޯތި ދިނުމުގެ ކަންކަން ނިންމުމަށް މަސައްކަތް ކުރެއްވި ކަމަށާއި އެހެންނަމަވެސް ނިންމަންޖެހޭ ކަންކަން ނުނިމި ހުރުމުގެ ސަބަބުން އީދުގެ ކުރިން ގޯތި ދެވިފައި ނުވަނީ ކަމަށެވެ.

ފުލުހުން މީޑިޔާ އޮފިޝަލް ސަބް އިންސްޕެކްޓަރ އަހްމަދު ޝިޔާމް ވިދާޅުވީ މިއަދު ހެނދުނު ނޮޅިވަރަންފަރު ކައުންސިލް އިދާރާގައި ތަޅުއެޅުވުމާއި ގުޅިގެން އެތަޅު ނެގުމަށްފަހު ކައުންސިލް އިދާރާ ހުޅުވާފައިވާ ކަމަށާއި މިހާރު އެމައްސަލަ ފުލުހުން ބަލަމުން ގެންދާ ކަމަށެވެ.