ކުޅުދުއްފުށީގައި ކޯސްޓަލް ނެވިގޭޝަން ކޯހެއް ފަށައިފި

އިބްރާހިމް ހަމީދު

ސަރުކާރުން ފަށާފައިވާ ހުނަރު ޕުރޮގުރާމްގެ ދަށުން ކުރިއަށް ގެންދާ ކޯސްޓަލް ނެވިގޭޝަން ކޯސް ކުޅުދުއްފުށީގައި ފަށައިފި އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން މެރިޓައިމް އެކަޑަމީ އޮފް މޯލްޑިވްސްގެ ސީއީއޯ އަދި ރައީސް އާދިލް ރަޝީދު ވިދާޅުވީ، 8500 މީހުން ތަމްރީނުކުރުމަށް ސަރުކާރުން ފެށި ހުނަރު ޕުރޮގްރާމުގައި މެރިޓައިމް އެކަޑަމީ އޮފް މޯލްޑިވްސް އަށް ލިބިފައިވަނީ 50 ޖާގަ ކަމަށާއި އޭގެ ތެރެއިން 25 ކުދިން ތަމްރީނު ކުރާނީ ކުޅުދުއްފުށީގައި ކަމަށެވެ. އަދި ބާކީ 25 ކުދިންނަށް އައްޑޫ ސިޓީގައި ހިންގާ ކޯހުން ފުރުޞަތު ދޭނެ ކަމަށެވެ.

މިއަދު ކުޅުދުއްފުށީގައި ފެށި މިކޯހުގައި 2 ކުދިން ފިޔަވައި އެހެން ހުރިހާ ކުދިންނަކީވެސް އުތުރުގެ ރަށްރަށަށް ނިސްބަތްވާ ކުދިންކަމަށް އާދިލް ވިދާޅުވި އެވެ.

ކޯސްޓަލް ނެވިގޭޝަން ކޯހަކީ ސެޓްފިކެޓް ލެވެލްގެ ކޯހެކެވެ. އެއް މަސްދުވަހުގެ މުއްދަތަށް ކުރިއަށްދާ މިކޯސް ނިންމާ ކުދިން ކަނޑު އުޅަނދު ދުއްވުމަށް ލައިސަންސް ނަގާއިރު ތިއަރީ ޓެސްޓް ހަދަން ނުޖެހޭނެކަމަށް މެރިޓައިމް އެކަޑަމީން ބުނެއެވެ.

މިކޯހުގައި ކިޔަވައި ދެއްވާނީ މިދާއިރާގެ ތަޖްރިބާކާރު ބޭފުޅެއްކަމަށްވާ ކެޕްޓަނު އިބްރާހިމް ރަފީއު ކަމަށާއި ކޯހުގައި ކިޔަވައިދޭނީ މައިގަނޑު ހަތަރު މޮޑިއުލެއް ކަމަށް އާދިލް ވިދާޅުވި އެވެ. މިހަތަރު މޮޑިއުލް އަކީ، ސޭފްޓީ، ނެވިގޭޝަން، ބްރިޖް ވޮޗް ކީޕިން އަދި ޖެނެރަލް ޝިޕް ނޮލެޖް އެވެ.

ކުޅުދުއްފުށީގައި ހުންނަ ހދ އަތޮޅުގޭގައި މިއަދު ހެނދުނު ބޭއްވި ރަސްމިއްޔާތެއްގައި މިކޯސް އިފްތިތާހު ކޮށްދެއްވީ މަތިއުތުރު ގައުމީ އިދާރާގެ ސްޓޭޓް މިނިސްޓަރ މުހައްމަދު ހުނެއިފް އެވެ. މިރަސްމިއްޔާތުގައި މެރިޓައިމް އެކަޑަމީގެ ސީއީއޯ އާއީ ޕްރިންސިޕަލް ކެޕްޓަން މުހައްމަދު ނައީމް ބައިވެރިވެވަޑައިގެންނެވި އެވެ.