ހދ އަތޮޅުގެ ކުރިއަށް އޮތް ފަސް އަހަރު ދުވަހުގެ ތަރައްޤީގެ ޕްލޭން އެކުލަވާލައިފި

އިބްރާހިމް ހަމީދު

ހދ އަތޮޅުގެ ފަސް އަހަރު ދުވަހުގެ ތަރައްގީގެ ޕްލޭން ނިމިފައިވާ ކަމަށް ހދ އަތޮޅު ކައުންސިލުން ހާމަކޮށްފި އެވެ.

ހދ އަތޮޅު ކައުންސިލް މިވަގުތު ހިންގުމާއި ހަވާލުވެހުންނެވި އެކައުންސިލުގެ ނައިބް ރައީސް މުހައްމަދު ޤާސިމް ވިދާޅުވީ ހދ އަތޮޅުކައުންސިލުން ކުރިއަށް އޮތް 5 އަހަރު ތަރައްގީގެ ޕްލޭން، މިދިޔަ އޮކްޓޯބަރ މަހުގެ 31 ވަނަ ދުވަހު ލޯކަލް ގަވަރމެންޓް އޮތޯރިޓީ (އެލްޖީއޭ) އަށް ފޮނުވާފައިވާނެ ކަމަށެވެ. އޭގެ އިތުރުން މަތިއުތުރު ސަރަހައްދުގެ ގައުމީ އިދާރާ އަށާއި ކަމާބެހޭ އެހެން އިދާރާތަކަށްވެސް އެޕްލޭން ހުށަހަޅާފައިވާނެ ކަމަށް މުހައްމަދު ޤާސިމް ވިދާޅުވި އެވެ.

ކުޅުދުއްފުށީ އޮންލައިނުން ދެއްނެވި ސުވާލަކަށް ޖަވާބު ދެއްވަމުން ނައިބު ރައީސް މުހައްމަދު ގާސިމް ވިދާޅުވީ، 2012 ވަނަ އަހަރުން ފެށިގެން 2016 ވަނަ އަހަރުގެ ނިޔަލަށް ހދ އަތޮޅުގެ ތަރައްޤީގެ ޕްލޭން އެކުލަވާލިއިރު ހދ އަތޮޅުގެ ކޮންމެ ރަށަކުން އެރަށެއްގެ ތަރައްޤީގެ ޕްލޭން ނިންމާ އެލްޖީއޭއަށް ފޮނުވާފައި ކަމަށެވެ.

” އެރަށް ރަށުގެ ތަރައްގީގެ ޕްލޭންތަކަށް ބަލާފައި ޖުމްލަކޮށް މުޅި އަތޮޅުގެ ތަރައްގީގެ ޕްލޭނާއެކު ފައިނޭންޝަލް ޕްލޭން ވެސް ތައްޔާރުކޮށް މިހާރު ވާނީ ކަމާބެހޭ އިދާރާތަކަށް ފޮނުވާފަ” ހދ އަތޮޅު ކައުންސިލުގެ ނައިބު ރައީސް މުހައްމަދު ޤާސިމް ވިދާޅުވި އެވެ.