ހދ އަތޮޅު ތަޢުލީމީ މަރުކަޒުގެ ގްރޭޑް 7 ގެ ދަރިވަރުންގެ ދަސްވެނިވުން އެ ސްކޫލުގައި ބާއްވައިފި

Nov 17, 2011

ހދ އަތޮޅު ތަޢުލީމީ މަރުކަޒުގެ ގްރޭޑް 7 ގެ ދަރިވަރުންގެ ދަސްވެނިވުން އެ ސްކޫލުގައި ބާއްވައިފި އެވެ.

ބުދަ ދުވަހުގެ މެންދުރު އެސްކޫލުގެ ހޯލުގައި ބޭއްވި ރަސްމިއްޔާތެއްގައި އެސްކޫލުގެ މިއަހަރުގެ އެންޓްރެންސް ޓެސްޓުގައި އޭ ރިޕޯޓް ހޯދި ދަރިވަރުންނަށް ރިޕޯޓު ފޯމް ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހެމާނު ކުޅުދުއްފުށީ އަފީފުއްދީން ސްކޫލުގެ ޕްރިންސިޕަލް ޢާދަމް މޫސާ އެވެ.

ގްރޭޑް 8 ށް ވަނުމަށްޓަކައި ހަދާ އެންޓްރެންސް އިމްތިހާނުން ހދ އަތޮޅު ތައުލީމީ މަރުކަޒުގެ 23 ދަރިވަރަކު އޭ ރިޕޯޓު ހޯދާފައި ވެއެވެ. މިއަހަރު އެސްކޫލުގައި ގްރޭޑް 7 ގައި ޖުމްލަ 135 ދަރިވަރުން ކިޔެވިއިރު އޭގެ ތެރެއިން 81 ދަރިވަރުން ފާސްވެ ގްރޭޑް 8 ށް ބަދަލުވެފައި ވެއެވެ. އެދަރިވަރުންނަށް ރިޕޯޓް ފޯމް ހަވާލުކޮށްދެއްވީ އަތޮޅު ތައުލީމީ މަރުކަޒުގެ ޕީޓީއޭގެ ނައިބު ރައީސް އާމިނަތު ޤާސިމް އާއި އެސްކޫލުގެ ޕްރިންސިޕަލް އިބްރާހީމް މުޙައްމަދެވެ.

މިރަސްމިއްޔާތުގައި ޝަރަފުވެރި މެހެމާން ދެއްކެވި ވާހަކަފުޅުގައި، މިއަހަރުގެ އެންޓްރެންސް ޓެސްޓުން ރަގަޅު ނަތީޖާ ހޯދި ސްކޫލުގެ ދަރިވަރުންނަށް މަރުހަބާ ދެންނެވި އެވެ. އަދި ސްކޫލް ދައުރުގައި ހޯދި މަޢުލޫމާތު އަމަލީގޮތުން ބޭނުން ކުރުމަށް ދަރިވަރުންނަށް ނަސޭހަތްތެރިވި އެވެ. މީގެ އިތުރުން ސްކޫލުނިމޭ ދަރިވަރުންނަކީ އެހެން މީހުންނަށް ނަމޫނާ އަކަށް ވާންޖެހޭނެ ބައެއް ކަމަށާއި، ލިބިފައިވާ މައުލޫމާތުގެ އަލީގައި އެކުދިންގެ އަމަލުތައް ބަހައްޓަންވީގޮތް އެނގޭ ބަޔަކަށް ވާންޖެހޭނެ ކަމަށްވެސް ވިދާޅުވިއެވެ.

މިއަދު އެސްކޫލުގެ ހޯލުގައި ބޭއްވި މިރަސްމިޔާތުގައި އެސްކޫލުގެ ޕްރިންސިޕަލް ދެއްކެވި ވާހަކަފުޅުގައި ދަރިވަރުން ސްޓްރީމް ކަނޑައެޅުމުގައި މުދައްރިސުންނާއި ބެލެނިވެރިންގެ މަޝްވަރާ ހޯދުމަށް ދަރިވަރުންނަށް ލަފާދެއްވި އެވެ. އަދި ދީނީ ކަންކަމަށް ފަރުވާތެރިވުމަށް ދަރިވަރުންނަށް ނަސޭހަތްތެރިވި އެވެ. މީގެ އިތުރުން ދަރިވަރުންގެ ކާމިޔާބީގެ އަސްލުކަމުގައިވާ ސްކޫލްގެ ޓީޗަރުންނަށް އެކަމުގެ ހައްޤު ޝުކުރު ދެންނެވިއެވެ. އަދި ސްކޫލްގެ އެކިއެކި ކަންކަމުގައި ބެލެނިވެރިން ދެއްވާ އެއްބާރުލުން ފާހަގަކޮށް އެފަރާތްތަކަށް ޝުކުރު ދަންނަވާފައި ވެއެވެ.

މިލިޔުމާއި ގުޅޭ