ވަގުތީ ގޮތުން އަތޮޅު ކައުންސިލާ ހަވާލުކޮށްފައިވާ ކޭލަކުނަށް އެކައުންސިލުން ޖަނަރޭޓަރެއް ގަންނަނީ

އިބްރާހީމް ހަމީދު

ހދ އަތޮޅު ކައުންސިލަށް ވަގުތީ ގޮތުން ބެލެހެއްޓުން ހަވާލުކޮށްފައިވާ، ހދ އަތޮޅުގެ ފަޅުރަށެއް ކަމުގައިވާ ކޭލަކުނަށް ޖަނަރޭޓަރެއް ގަންނަން އަތޮޅު ކައުންސިލުން ނިންމައިފި އެވެ.

ހދ އަތޮޅު ކައުންސިލުގެ ބަޖެޓުން ހަރަދު ކޮށްގެން އެރަށުގައި ބެހެއްޓުމަށް ޖަނަރޭޓަރެއް ގަންނަން ނިންމާފައިވަނީ، ހދ އަތޮޅު ކައުންސިލުގެ 35 ވަނަ ބައްދަލުވުމުގައި ބައިވެރިވި މެމްބަރުންގެ އިއްތިފާގުން ނެވެ.

ކުޅުދުއްފުށީ އޮންލައިން އަށް މައުލޫމާތު ދެއްވަމުން ހދ އަތޮޅު ކައުންސިލް ވަގުތީ ގޮތުން ހިންގުމާ ހަވާލުވެހުންނެވި އެކައުންސިލުގެ ނައިބު ރައީސް މުހައްމަދު ގާސިމް ވިދާޅުވީ، ހދ އަތޮޅު ކޭލަކުނަށް 5 ކިލޯ ވޯޓުގެ ޖަނަރޭޓަރެއް ގަންނަން ނިންމާފައިވާ ކަމަށެވެ. އެގޮތަށް ނިންމެވީ ކައުންސިލަށް ހާޒިރުވި 8 މެމްބަރުންގެ އިއްތިފާގުން ކަމަށްވެސް މުހައްމަދު ގާސިމް ވިދާޅުވި އެވެ.

ދާދި ފަހުން އެރަށުން ދަނޑުވެރިކަމުގެ ބޭނުމަށް ބިން ދޫކުރާގޮތަށްވެސް އަތޮޅު ކައުންސިލުން ނިންމާފައި ވެއެވެ. ކުޅުދުއްފުށީ އޮންލައިން އަށް މައުލޫމާތު ލިބިފައިވާ ގޮތުގައި އެރަށަކީ، އެގްރިކަލްޗަރ މިނިސްޓްރީގެ ބެލުމުގެ ދަށުގައި އޮންނަ ރަށެކެވެ. ހދ އަތޮޅު ކައުންސިލުން މިހާރު ވަނީ އެރަށުން ދަނޑުވެރިކަމުގެ ބޭނުމަށް ބިން ދޫކުރުމުގެ ހުއްދައަކަށް އެދި ކަމާބެހޭ މިނިސްޓްރީ އަށް ހުށަހަޅާފައި އެވެ.

މިމައްސަލާގައި ހިތްހަމަނުޖެހިފައި ހުރި ހދ އަތޮޅުގެ ރައްޔިތަކު ބުނީ، ކޭލަކުނަކީ އަތޮޅު ކައުންސިލަށް ލިބިފައިވާ ރަށަކަށް ނުވުމާއި އެރަށަކީ އަތޮޅު ކައުންސިލަށް ވަގުތީ ގޮތުން ބެލެހެއްޓުން ސަރުކާރުން ހަވާލުކޮށްފައިވާ ރަށެއްކަމަށާއި މިހާރުވެސް އަތޮޅު ކައުންސިލުގެ ބަޖެޓުން އެރަށް ބެލެހެއްޓުމަށް މުވައްޒަފުން ލާފައިވާ ކަމަށެވެ. އަދި އެރަށަށް އަތޮޅު ކައުންސިލުގެ ބަޖެޓުން ޖަނަރޭޓަރެއް ގަތުމަށް ނިންމުމަކީ ސުވާލު އުފެދޭ ކަމެއް ކަމަށެވެ.

” ކޭލަކުނަކީ އެއްގޮތަކަށް ވެސް ހދ. އަތޮޅު ކައުންސިލަށް ލިބިފައިވާ ރަށެއް ނޫން. ވަގުތީ ގޮތުން ހިންގާ ބެލެހެއްޓުމަށް އެރަށަށް (ކޭލަކުނަށް) ކައުންސިލްގެ ބަޖެޓުން ހަރަދު ކުރާކަށް ނުޖެހޭ. އަދިވެސް މިއަތޮޅުގެ ޓޫރިޒަމަށް ދޫކޮށްފައިވާ ފަޅުރަށްތަކުގެ ބޭނުމެއް ނެތް.” އޭނާ ބުންޏެވެ. “ރައްޔިތުންނަށް ފައިދާއެއް ނެތް ކޭލަކުނަށް ހަރަދުކުރުމުގެ ބަދަލުގައި މިއަތޮޅުން ޓޫރިޒަމަށް ދޫކޮށްފައިވާ ރަށްތައް އަތޮޅު ކައުންސިލަށް ނެގުމަށްފަހު އަތޮޅު ތަރައްގީ ކުރުމަށް ރިސޯޓެއް ހަދައިގެން ފައިސާ ހޯދުން ރަގަޅުވާނެ”

ދާދި ފަހުން އަތޮޅު ކައުންސިލުން ހދ ކޭލަކުނުން ހޮވާ ކާށި އާންމުންނަށް ވިއްކުމަށްވެސް ވަނީ ނިންމާފައި އެވެ. އަދި މިހާރު އަތޮޅު ކައުންސިލުން ރުފިޔާއަކަށް ކާއްޓެއްގެ މަގުން ކާށި ދަނީ ވިއްކަމުންނެވެ.