ޖަލާލުއްދީން ސްކޫލުގެ ގްރޭޑް ދިހައެއް ނިންމި ދަރިވަރުންނަށް އެޗީވްމަންޓް ސެޓްފިކެޓް ހަވާލުކޮށްފި

Nov 21, 2011

އިބްރާހިމް ހަމީދު

ޖަލާލުއްދީން ސްކޫލުގެ ގުރޭޑް ދިހައެއް ނިންމި ދަރިވަރުންގެ ތެރެއިން އެސްކޫލުން ކަނޑައެޅި މިންގަނޑަށް ފާސްވި ދަރިވަރުންނަށް އެޗީވްމަންޓް ސެޓްފިކެޓް ދިނުމުގެ ޖަލްސާ ރޭ އެސްކޫލުގައި ބާއްވައިފި އެވެ.

ރޭ ޖަލާލުއްދީންގައި ބޭއްވި ރަސްމިއްޔާތެއްގައި، މިއަހަރު ޖަލާލުއްދީން ސްކޫލުން ޖީސީއީ އޯލެވެލްގައި ބައިވެރިވާ 210 ދަރިވަރުންގެ ތެރެއިން އެސްކޫލުން ކަނޑައަޅާ މިންގަނޑަށް ފާސްވި 103 ދަރިވަރަކަށް އެޗީވްމަންޓް ސެޓްފިކެޓް ލިބިފައި ވެއެވެ. އެޗީވްމަންޓް ސެޓްފިކެޓް އެދަރިވަރުންނަށް ހަވާލުކޮށްދެއްވީ ރޭގެ ރަސްމިޔާތުގެ ޝަރަފުވެރި މެހެމާނު ޑރ. އަޙުމަދު ޝަރީފް އާއި ހދ އަތޮޅު ކައުންސިލުގެ ރައީސް މުޙައްމަދު ޝުކޫރެވެ.

ގްރޭޑް ދިހައެއް ނިންމި ދަރިވަރުންނަށް ސެޓްފިކެޓް ދިނުމަށް ބޭއްވި ރަސްމިޔާތުގައި، ޝަރަފުވެރި މެހެމާނު ދެއްކެވި ވާހަކަފުޅުގައި، އެދަރިވަރުންގެ ފަރާތުން ކުޅުދުއްފުއްޓަށާއި މުޅި ގައުމަށް އިތުރު ކުރިއެރުންތަކެއް ލިބިގެންދާނެ ކަމަށް އުއްމީދު ކުރައްވާކަމަށް ވިދާޅުވެ، އެކުދިންނަށް ހިތްވަރު ދެއްވިއެވެ. އަދި، ކޮންމެ ކުއްޖަކުވެސް ހުނަރުވެރި މޮޅުކުއްޖަކަށް ވާނެކަމަށް ޔަގީން ކުރައްވާކަމަށްވެސް ޑރ އަހުމަދު ޝަރީފު ވިދާޅުވި އެވެ.

މިޖަލްސާގައި ސްކޫލުގެ ޕްރިންސިޕަލް ސައީދު އަހްމަދު ދެއްކެވި ވާހަކައިގައި، ރާއްޖެއިން އޭލެވެލްގެ ގަދަ ދިހައެއްގައި ޖަލާލުއްދީން ސްކޫލުގެ ހަތް ދަރިވަރު ހިމެނިފައިވާކަން ފާހަގަ ކުރެއްވި އެވެ. އަދި އެޗީވްމަންޓް ސެޓްފިކެޓް ނުލިބުނު ދަރިވަރުންނަށް ހިތްވަރުދެއްވައި އެސެޓްފިކެޓް ހާސިލުކުރި ދަރިވަރުން އެހޯއްދެވީ ބޮޑު ކާމިޔާބީއެއް ކަމަށް ވިދާޅުވި އެވެ.

މިޖަލްސާ ތައާރަފް ކުރުމުގެ ގޮތުން ވާހަކަ ދެއްކެވީ ޖަލާލުއްދީން ސްކޫލުގެ ޑެޕިއުޓީ ޕްރިންސިޕަލް އަލީ އިސްމާއީލެވެ. ޝުކުރު ދެއްނެވީ ގުރޭޑް ދިހައެއްގެ ދަރިވަރު ނަހްޒާ ހަސަނެވެ. މިޖަލްސާ ނިމިގެން ދިޔައީ ސްކޫލުގެ ލަވައިންނެވެ.

މިލިޔުމާއި ގުޅޭ