މެރިޓައިމް އެކަޑަމީ އޮފް މޯލްޑިވްސް އިން ކުޅުދުއްފުށީގައި ކުރު މުއްދަތުގެ ކޯސްތަކެއް ފަށަނީ

އިބްރާހިމް ހަމީދު

މެރިޓައިމް އެކަޑަމީ އޮފް މޯލްޑިވްސް އިން ކުޅުދުއްފުށީގައި ކުރު ކޯސްތަކެއް ފެށުމަށް ނިންމައިފި އެވެ.

މެރިޓައިމް އެކަޑަމީ އޮފް މޯލްޑިވްސްގެ ސީއީއޯ އާދިލް ރަޝީދު ވިދާޅުވީ މެރިޓައިމް އެކަޑަމީގެ ފަރާތުން ޑިސެމްބަރު މަހު ކުރު މުއްދަތުގެ ކޯސްތަކެއް ފެށުމަށް ހަމަޖެހިފައިވާ ކަމަށާއި އެކޯސްތަކުގައި ބައިވެރިވުމުގެ ފުރުޞަތު ހުޅުވާލާފައިވާ ކަމަށެވެ.

ޑިސެމްބަރު މަހުގެ ތެރޭގައި ފެށުމަށް ހަމަޖެހިފައިވާ މިކޯސްތަކަކީ، އިލެމެންޓްރީ ފަސްޓް އެއިޑް ކޯހާއި، ޕާރސަނަލް ސަރވައިވަލް ޓެކްނިކް ކޯހާއި، ޕާރސަނަލް ސޭފްޓީ އެންޑް ސޯޝަލް ރެސްޕޮންސިބިލިޓީޒް އަދި ފަޔަރ ފައިޓިން އެންޑް ފަޔަރ ޕްރިވެންޝަން ކޯސް ކަމަށް މެރިޓައިމް އެކަޑަމީގެ ރައީސް އަދި ސީއީއޯ އާދިލް ރަޝީދު ވިދާޅުވި އެވެ.

ފައިސާ ދައްކަންޖެހޭ މިކޯސްތަކުގައި ބައިވެރިވުމަށް ރަޖިސްޓްރޭޝަން ފީއެއްގެ ގޮތުގައި 100 ދައްކަންޖެހެ އެވެ. އިލެމެންޓްރީ ފަސްޓް އެއިޑް ކޯސް އަދި ފަޔަރ ފައިޓިން ކޯހަށް 1820 ރުފިޔާ ދައްކަންޖެހޭއިރު ޕާރސަނަލް ސޭފްޓީ ކޯހަށާއި ޕާރސަނަލް ސަރވައިވަލް ކޯހަށް ދައްކަން ޖެހެނީ 1700 ރުފިޔާ އެވެ.

މެރިޓައިމް ސްޓަޑީޒްގެ ފަރާތުން ކުޅުދުއްފުށީގައި މިހާރުވެސް ގެންދަނީ ކޯހެއް ހިންގަމުންނެވެ. ހުނަރު ޕުރޮގްރާމުގެ ދަށުން ކުރިއަށްދާ މިކޯހަކީ ކޯސްޓަލް ނެވިގޭޝަންގެ ސެޓްފިކެޓް ލެވެލްގެ ކޯހެކެވެ.

ކުރު މުއްދަތަށް ހިންގާ މިކޯސްތަކުގައި ބައިވެރިވުމަށް އެދި ހުށަހަޅަންޖެހޭ ފޯމް ހދ އަތޮޅުގޭގައި ހުންނަ މެރިޓައިމް އެކަޑަމީގެ އޮފީހުންނާއި އެ އެކަޑަމީގެ ވެބްސައިޓުން ލިބެން ހުންނާނެ ކަމަށް މެރިޓައިމް އެކަޑަމީން ބުނެ އެވެ.