އަންނަ އަހަރުގެ ސްކޫލްތަކުގެ ފޮތް ލިސްޓާއި ވައުޗަރ ދޫކުރަން ފަށައިފި

އިބްރާހިމް ހަމީދު

ކުޅުދުއްފުށީ ސްކޫލުތަކުގެ 2012 ވަނަ އަހަރުގެ ފޮތް ލިސްޓާއި ވައުޗަރ ދޫކުރަން ފަށައިފި އެވެ.

ކުޅުދުއްފުށީގައި ހުންނަ އަފީފުއްދީން ސްކޫލުގެ ގްރޭޑް 1 ން 8 ށް މިއަދުން ފެށިގެން ބަންދު ނޫން ކޮންމެ ދުވަހެއްގެ ހެނދުނު 9:30 ން މެންދުރު ފަހު 3:00 ށް ފޮތް ލިސްޓާއި ވައުޗަރ ދޫކުރާނެކަމަށް އެސްކޫލުން ބުނެއެވެ.

ކުޅުދުއްފުށީގައި ހުރި އެންމެ ދުވަސްވީ އެއް ސްކޫލުކަމަށްވާ ހދ އަތޮޅު ތައުލީމީ މަރުކަޒުން ގްރޭޑް 1 އަދި 2 ގެ ދަރިވަރުންގެ ފޮތް ލިސްޓާއި ވައުޗަރ ދޫކުރާނީ މާދަމާ ހެނދުނު 9:30 ން 11 ޖެހުމާ ހަމައަށެވެ. އަދި ގްރޭޑް 3 އަދި 4 ގެ ދަރިވަރުންނަށް ފޮތް ލިސްޓާއި ވައުޗަރ ދޫކުރާނީ އެދުވަހުގެ މެންދުރުފަހު 2 ން 3:30 އަށެވެ.

ހދ އަތޮޅު ތައުލީމީ މަރުކަޒުގެ ގްރޭޑް 5، 6 އަދި 7 ގެ ދަރިވަރުންގެ ފޮތް ލިސްޓާއި ވައުޗަރ ދޫކުރާނީ އަންނަ އަންގާރަ ދުވަހުގެ ހެނދުނު 9:30 ން 11:00 ށް އަދި މެންދުރު ފަހު 2 ން 3:30 އަށެވެ. ފޮތް ލިސްޓާއި ވައުޗަރ އާ ހަވާލުވުމަށް ބެލެނިވެރިން އަންނައިރު އައިޑީ ކާޑް ގެންނަން ޖެހޭނެ ކަމަށް ހދ އަތޮޅު ތައުލީމީ މަރުކަޒުން ނެރެފައިވާ އިއުލާނުގައި ބުނެފައި އެވެ.