ރައީސް ނަޝީދު ކުޅުދުއްފުއްޓަށް ވަޑައިގަންނަވައިފި

Dec 5, 2011

މަތި އުތުރު ސަރަހައްދުގެ ބައެއް ރަށްތަކަށް ދަތުރު ކުރެއްވުމަށް ރައީސުލްޖުމްހޫރިއްޔާ މުޙައްމަދު ނަޝީދު ފައްޓަވައިގެން އުޅުއްވާ ރަސްމީ ދަތުރު ފުޅުގައި ކުޅުދުއްފުއްޓަށް ވަޑައިގަންނަވައިފިއެވެ.

ކުޅުދުއްފުއްޓަށް ވަޑައިގަތުމުން އެމަނިކުފާނަށް ކުޅުދުއްފުށިން ވަނީ ހޫނު މަރުހަބާއެއް ކިޔާފައެވެ. މިދަތުރުފުޅުގައި އެމަނިކުފާނުގެ އަރިހުގައި ސަރުކާރު އިސްމަގާމުތަކުގެ ވެރިންނާއި މަޖިލީހުގެ ބައެއް މެމްބަރުން ބައިވެރިވެ ވަޑައިގަންނަވައެވެ.

ކުޅުދުއްފުށީގައި ރައީސް ނަޝީދު ހުންނަވާ ދެދުވަހުގައި ތަފާތު އެކި މަޝްރޫއުތައް އިފްތިތާހު ކުރުން ރޭވިފައިވާ ކަމަށް މައުލޫމާތު ލިބިފައި ވެއެވެ. މިގޮތުން މާދަމާގެ މެންދުރު 12:30 ގައި އޮންނަ ދިރާގު ސަބްމެރިން ކޭބަލް އަޅަން ފެށުމުގެ ރަސްމިއްޔާތު އެމަނިކުފާނު ޝަރަފްވެރި ކޮށްދެއްވާނެއެވެ. އަދި މީގެ އިތުރުން ރޯހައުސް އަށް އެދިފައިވާ ފަރާތްތަކަށް ރޯހައުސް ހަވާލު ކުރުމާއި ކުޅުދުއްފުށީގައި ގަސްއިންދުމުގެ ޕްރޮގްރާމެއް ފައްޓަވައި ދެއްވާނެކަމަށް ނުރަސްމީކޮށް މައުލޫމާތު ލިބިފައި ވެއެވެ.

ރައީސް މަތިއުތުރަށް ކުރަށްވާ ދަތުރުފުޅުގައި މިއަދު ވަނީ އިހަވަންދޫ، މާރަންދޫ، އަދި ވައިކަރަދުއަށް ދަތުރު ކުރަށްވާފައެވެ. މިގޮތުން މާރަންދޫ ގައި މިސްކިތެއް އެޅުމަށް ބިންގާ އަޅުއްވާ ދެއްވާފައި ވެއެވެ. އަދި އެރަށުގެ ފުޓުބޯޅަ ދަނޑު ފެންވަރު ރަނގަޅު ކޮށްދެއްވާނެ ކަމުގެ އިޝާރާތެއް ވެސް ކުރެއްވިއެވެ. މާރަންދޫގެ މިސްކިތް އިމާރާތް ކުރުމަކީ ރައީސް ނަޝީދުގެ ކެމްޕެއިންގައި އެމަނިކުފާނު ވެލެއްވި ވައުދު ފުޅެކެވެ.

މިލިޔުމާއި ގުޅޭ