މެރިޓައިމް އެކަޑަމީ އޮފް މޯލްޑިވްސް ރައީސް ހުޅުވައިދެއްވައިފި

މެރިޓައިމް އެކަޑަމީ އޮފް މޯލްޑިވްސް، ކުޅުދުއްފުށީގައި ހުންނަ ހދ އަތޮޅު ގޭގައި ރައީސް ހުޅުވައިދެއްވައިފި އެވެ.

އިއްޔެ ހަވީރު އެކަމަށްޓަކައި ބޭއްވި ރަސްމިއްޔާތުގައި ރައީސުލްޖުމުހޫރިއްޔާ ދެއްކެވި ވާހަކަފުޅުގައި، ދަޢުލަތުގެ ވަސީލަތްތަކަކީ، ރައްޔިތުންނަށް އޭގެ ފައިދާ އެންމެ ބޭނުންތެރި ގޮތެއްގައި ހިފެންޖެހޭނެ އެއްޗެތި ކަމުގައި ވިދާޅުވި އެވެ. އަދި ރާއްޖޭގެ އެކި ރަށްރަށުގައި ހުރި، ސަރުކާރުގެ ޢިއްޒަތްތެރިންނަށްޓަކައި ޚާއްޞަކޮށްފައިވާ ޢިމާރާތްތައް، ރައްޔިތުންނަށް ފައިދާވާނެ ގޮތެއްގައި ބޭނުން ހިފުމަކީ ކުރަންޖެހޭނެ ކަމެއް ކަމުގައި ވިދާޅުވިއެވެ.

މެރިޓައިމް އެކަޑަމީ އޮފް މޯލްޑިވްސް އަލަށް ހިންގެވުމަށް ހަމަޖެއްސެވި، ކުޅުދުއްފުށީގައި ހުންނަ ހދ އަތޮޅުގޭގައި އިއްޔެ ހަވީރު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް އިތުރަށް ވިދާޅުވީ، ޤައުމިއްޔަތެއް ބިނާކޮށް، ޤައުމީ ތަރައްޤީ ހޯދުމަށްޓަކައި، ހުނަރުވެރި، ތަޢުލީމީ ފެންވަރު ރަނގަޅު ކުދިންތަކެއް ބިނާކުރުމަކީ، ވަރަށް މުހިންމު ކަމެއް ކަމަށާއި އަދި ކުޅުދުއްފުށީ ސިޓީ ތަރައްޤީކޮށް، މުޅި ރާއްޖެއަށް އެ ތަރައްޤީ ފޯރުކޮށްދިނުމަށްޓަކައި ކުރިއަށް ދެވޭނީ، އިތުރު ހުނަރުތަކަކާއި، މަތީ ތަޢުލީމުގެ ފުރުޞަތު ލިބިގެން ކަމުގައި އެވެ.

މެރިޓައިމް އެކަޑަމީ އޮފް މޯލްޑިވްސް އިން މިހާރުވެސް އެ އެކަޑަމީން ގެންދަނީ ތަފާތު ކޯސް ތަކެއް ކުޅުދުއްފުށީގައި ހިންގަމުންނެވެ. އެގޮތުން މިދިޔަ މަހު ވަނީ ކޯސްޓަލް ނެވިގޭޝަން ކޯހެއް ވެސް ފަށާފައި އެވެ.