ބޭސިކް ފަސްޓް އެއިޑް ޓްރެއިނިންގ އާއި ލައިފް ސްކިލް އެވެއަރނެސް ޕްރޮގްރާމް ވަރަށް ކާމިޔާބު – ދިވެހި ރެޑްކްރެސެންޓް

.

ދޭދޭ މީހުންނާއި އާއިލާތަކާއި އޮފީސް މާހައުލުގައި ދިމާވާ ތަފާތު ކަންކަމާ ޑީލް ކުރާނެ ގޮތް އެނގިގެން ހިނގައްޖެ: ބައިވެރިން

ހާޝިމް އަބޫބަކުރު

ހދ. އަތޮޅުގެ ޒުވާނުންނަށް އަމާޒުކޮށްގެން މިދިޔަ ހަފްތާގެ ތެރޭގައި ކުޅުދުއްފުށީގަ އާއި ނޮޅިވަރަމުގައި ދިވެހި ރެޑްކްރެސެންޓްގެ ފަރާތުން ހިންގި ޓްރެއިނިންގ ޕްރޮގްރާމްތައް އިއްޔެ ވަރަށް ކާމިޔާބުކަމާއެކު ނިންމާލައިފިއެވެ.

އެގޮތުން ކޮމިއުނިޓީ އެމްޕަވަރމަންޓް އެންޑް ކެޕޭސިޓީ ބިލްޑިންގ ޕްރޮގްރާމްގެ ދަށުން މިދިޔަ ހަފްތާގެ ބުދަ ދުވަހު ހިންގި ބޭސިކް ފަސްޓް އެއިޑް ޓްރެއިނިންގއެއްގައި ކުޅުދުއްފުށީގެ އެކިއެކި މުއައްސަސާތައް ހިމެނޭގޮތައް 20 ޒުވާނުން ތަމްރީނުކޮށްފައިވާއިރު، ހަމަ މި ޓްރެއިނިންގ މިދިޔަ ބުރާސްފަތި ދުވަހު ނޮޅިވަރަމުގައި ހިންގާ، 15އަށް ވުރެ ގިނަ ޒުވާނުން ބޭސިކް ފަސްޓް އެއިޑަރޒް ގެ ލެވެލްއަށް ވަނީ ތަމްރީނުކޮށްފައެވެ. ދިވެހި ރެޑްކްރެސެންޓުން މައުލޫމާތު ދީފައިވާގޮތުގައި މި ޓްރެއިނިންގ އަކީ މުޖުތަމައުގައި ދިމާވާ ކުއްލި ހާދިސާތަކުގައި ހަރަކާތްތެރިވާނެގޮތް ދަސްކޮށްދީ، އެފަދަ ހާދިސާތަކުގައި ހާސްނުވެ، އެވަގުތުގައި ދެވޭނެ ފުރަތަމަ އެހީ އެންމެ ފުރިހަމަ ގޮތުގައި ދެވޭނެފަދަ ޤާބިލު ބަޔަކު ތަމްރީނުކުރުމަށް ހިންގުނު ޓްރެއިނިންގ އެކެވެ.

މީގެ އިތުރުން ޔޫތް އެމްޕަވަރމަންޓް ޕްރޮގްރާމްގެ ދަށުން ނޮޅިވަރަމާއި ކުޅުދުއްފުށީގެ 15 އަހަރާއި 35 އަހަރާއި ދެމެދުގެ 37 ޒުވާނަކަށް ލައިފް ސްކިލް އެވެއަރނެސް ވަރކް ޝޮޕްއެއްވެސް ވަނީ އިއްޔެ ހިންގާފަައެވެ. ކުޅުދުއްފުށީގެ ޒުވާނުންގެ ފަރާތުން ހުށަހެޅި ޕްރޮޕޯސަލްއަކަށް ދިވެހި ރެޑްކްރެސެންޓްގެ ފަރާތުން ފަންޑް ލިބިގެން ހިންގުނު މި ވަރކްޝޮޕްގައި، ދިރިއުޅުމުގައި ކުރިމަތިވާ ތަފާތު ކަންކަމުގައި ރަނގަޅު މަގު އިޚްތިޔާރުކުރާނެ ގޮތްތަކާއި އެފަދަ ހާލަތްތަކުގައި ރައްޓެހިންނަށް އެހީތެރިވާނެގޮތުގެ އިތުރުން ޑްރަގް ޕްރިވެންޝަންއަށްވެސް ވަނީ އަލިއަޅުވާލާފައެވެ.

ދިވެހި ރެޑްކްރެސެންޓްގެ ފަރާތުން މައުލޫމާތު ލިބުނުގޮތުގައި ކުޅުދުއްފުށީގައި ހުންނަ ދިވެހި ރެޑްކްރެސެންޓް ބްރާންޗުން މި ސަރަހައްދަށް އެންމެ ބޭނުންވާ ކަންތައްތައް ދިރާސާކޮށް، އެފަދަ ކަންކަމަށް އަމާޒުކޮށްގެން ކުރިއަށް އޮތްތަނުގައިވެސް މިފަދަ ޕްރޮގްރާމްތައް ހިންގުމަށް ހަމަޖެހިފައިވާއިރު، ޑިސާސްޓަރ މެނޭޖްމެންޓްގެ ދަށުން ފަންޑް ލިބިގެން ޕްރޮޖެކްޓްތަކެއް ހިންގުމަށް ވަނީ ހަމަޖެހިފައެވެ. އަދި އެ ޖަމްއިއްޔާގެ އަމާޒަކީ އެރަށެއްގެ ޓްރެއިނަރުންނަށް އެރަށެއްގައި މިފަދަ ޕްރޮގްރާމްތައް ރާވާލައިގެން ކުރިއަށް ގެންދެވޭވަރު ކުރުންކަމުގައިވެސް އެފަރާތުން ވިދާޅުވިއެވެ.

މި ޕްރޮގްރާމްތަކުގެ މުހިއްމުކަން އެ ވަރކްޝޮޕްގެ ބައިވެރިންވެސް ފާހަގަކޮށްފައި ވާއިރު، މުޖުތަމައުތެރެއަށް ނުކުންނައިރު ކޮންމެހެންވެސް އެނގެންޖެހޭ ވަރަށް ގިނަ މައުލޫމާތުތަކެއް ލިބިގެން ހިނގައްޖެކަމަށް އެ ބައިވެރިން ވަނީ ފާހަގަކޮށްފައެވެ.