ކުޅުދުއްފުށީގެ ރައްޔިތުންގެ ތެރެއިން ބަޔަކު ބޮޑު މުޒާހަރާގައި ބައިވެރިވުމަށް ތައްޔާރުވާން ފަށައިފި

.

އިބްރާހިމް ހަމީދު

– އިސްނަގައިގެން މުޒާހަރާއެއް ނުފަށާނަން، ނަމަވެސް އެހެން ފަރާތްތަކުން މުޒާހަރާ ކުރިއަށް ގެންދާނަމަ ބައިވެރިވާނަން: ނޫރު ޖަމިއްޔާ

މަދަނީ އިއްތިހާދުން އިސްނަގައިގެން މިމަހުގެ 23 ވަނަ ދުވަހު “އިސްލާމްދީންގެ ހިމާޔަތުގައި ދިވެހިން” މިނަމުގައި ބާއްވާ މުޒާހާރާގައި ބައިވެރިވުމަށް ކުޅުދުއްފުށީގެ ރައްޔިތުންގެ ތެރެއިން ބަޔަކު ތައްޔާރުވާން ފަށައިފިއެވެ.

މުޒާހަރާ ކުޅުދުއްފުށީގައި ރާވާ ހިންގުމުގައި އިސްކޮށް ހަރަކާތްތެރިވާ މުޖްތަބާ އަހްމަދު ބުނީ، މަދަނީ އިއްތިހާދުން އިސްނަގައިގެން އިސްލާމްދީންގެ ހިމާޔަތުގެ ނަމުގައި  މިޑިސެމްބަރު މަހުގެ 23 ގައި މާލޭގައި ބާއްވާ މުޒާހަރާ ކުޅުދުއްފުށީ ގައިވެސް ކުރިއަށްދާނެ ކަމަށާއި އެމުޒާހަރާ މާލޭގައި ހުއްޓާލާދެން މެދުނުކެނޑި ކުޅުދުއްފުށީގައިވެސް ކުރިއަށްދާނެއެވެ.

މިއަހަރު ތެރޭ ކުޅުދުއްފުށީގައި ކުރެވުނު ދެމުޒާހަރާގައި ވެސް އިސްކޮށް ހަރަކާތްތެރިވި މުޖްތަބާ ބުނީ، މިއީ ކުޅުދުއްފުށީގެ ވަރަށްގިނަ ރައްޔިތުންގެ އެދުމުގެ މަތިން  ކުރިއަށް ގެންދާ ސުލްހަވެރި މުޒާހަރާ އެކެވެ.

“ސުލްހަވެރި މުޒާހަރާއެއް ކުރުމަށް ރާވާފައި އޮތްނަމަވެސް އަޅުގަނޑުމެންނަށް މީޑިޔާއިން އިވެމުންދާ އަޑުތަކަށް ބަލާއިރު އެގިފައިވާ ގޮތުން ދިވެހި ރައްޔިތުން ބާއްވާ ސުލްހަވެރި ބޮޑު މުޒާހަރާއާއި ދެކޮޅަށް  ރައީސުލްޖުމްހޫރިއްޔާ މުހައްމަދު ނަޝީދު ވެސް ނިކުންނަވާނެ ކަމުގެ މަޢުލޫމާތު ލިބޭ. އަޅުގަނޑުމެން ފަށާނީ މިމުޒާހަރާ ސުލްހަވެރި މުޒާހަރާއެއްގެ ގޮތުގައި ކަމަށްވިޔަސް ވަކި ހިސާބަކުން މުޒާހަރާ ހޫނު ނުވާނެއެކޭ އަޅުގަނޑު ނުދަންނަވާނަން. އެއީ މުޒާހަރާއެއް ހޫނުކުރެވޭނެ ހުރިހާ ކަމެއް މިހާރުވެސް މިސަރުކާރުން ކުރަމުންދާތީ.” މުޖުތަބާ ބުންޏެވެ.

ޑިސެމްބަރު 23 ވަނަ ދުވަހު އޮންނަ މުޒާހަރާގައި ބައިވެރިވުމާއި މެދު ގޮތެއް ނުނިންމާކަމަށް މިދިޔަ ހަފްތާގައި ބުނެފައިވާ ކުޅުދުއްފުށީގެ ޖަމިއްޔާއެއް ކަމުގައިވާ ނޫރު ޖަމިއްޔާއިން އެންމެ ފަހުން މައުލޫމާތު ލިބިފައިވާ ގޮތުގައި، އެޖަމިއްޔާގެ ފަރާތުން އިސްނަގައިގެން މުޒާހަރާއެއް ނުފަށާނެ ކަމަށާއި ނަމަވެސް އެހެން ފަރާތްތަކުން މުޒާހަރާ ކުރިއަށް ގެންދާނަމަ އެފަރާތުން ބައިވެރިވާނެއެވެ.

ހުކުރު ދުވަހުގެ މުޒާހަރާއަށް ތައްޔާރުވުމުގެ ގޮތުން ޝިއާރު ފާޅުކުރުމަށް ބެނާ ތައްޔާރު ކުރުމާއި ބޯޑްތައް ތައްޔާރު ކުރުމުގެ މަސައްކަތް ކުރިއަށްދާ ކަމަށާއި  އަދި ހުކުރު ދުވަހު ހަވީރު 4:30 މުޒާހަރާ ފެށޭނީ ކުޅުދުއްފުށީ އަމީރު އަމީން ސްކޫލާއި ދިމާލުން ބަންޑާރަ މައިދާނުން ކަމަށް މުޖުތަބާ މައުލޫމާތު ދިނެވެ.

މުޒާހަރާ ރޭވުމުގައި އިސްކޮށްހަރަކާތްތެރި ވަނީ ޕީޕީއެމް އަށް ނިސްބަތްވާ ފަރާތްތައް ކަމުގައި މައުލޫމާތު ލިބެއެވެ.