“އިސްލާމްދީނުގެ ހިމާޔަތުގައި ދިވެހިން” ގެ ނަމުގައި ކުޅުދުއްފުށީގައި މުޒާހަރާ ކޮށްފި

އިސްލާމްދީނުގެ ހިމާޔަތުގައި ދިވެހިން މި ނަމުގައި މިއަދު ކުރަމުންދާ ބޮޑު މުޒާހަރާގައި ބައިވެރިވުމުގެ ގޮތުން ކުޅުދުއްފުށީގައި ވެސް މުޒާހަރާ ކޮށްފި އެވެ.

މަދަނީ އިއްތިހާދުން އިންތިޒާމުކޮށްގެން މާލޭގައި ކުރިއަށްގެންދާ މުޒާހަރާގައި ބައިވެރިވުމުގެ ގޮތުން، ކުޅުދުއްފުށީގައި މުޒާހަރާ ފެށުމަށްޓަކައި 16:00 ގައި ކުޅުދުއްފުށީ ބަންޑާރަ މައިދާނަށް ގިނަ އަދަދެއްގެ ބަޔަކު ޖަމާވަމުން ދިޔައެވެ. މުޒާހަރާ ފަށައިގެން ބަންޑާރަމައިދާނުން ދެކުނަށް ކުޅުދުއްފުށީ ރީޖަނަލް ހޮސްޕިޓަލު ކުރިމަތިން މުޒާހަރާގެ ބައިވެރިން ކުރިއަށް ދިޔައިރު ގައުމީ އިދާރާ ހިމެނޭ ސަރަހައްދުގައި ކޮންމެވެސް ވަރަކަށް ފުލުހުން ހަރަކާތްތެރިވި މަންޒަރު ފެނިފައި ވެއެވެ.

ކުޅުދުއްފުށިން 1000 ހާ މީހުން ބައިވެރިވި މި މުޒާހަރާގައި އެއްވެސް ހަމަނުޖެހުމެއް ހިނގާފައެއް ނުވެއެވެ. އެހެންނަމަވެސް މުޒާހަރާ ކުރިއަށްދިޔަ ވަގުތު ކުޅުދުއްފުށީގެ އެމްޑީޕީއަށް ނިސްބަތްވާ ބަޔަކު “އިސްލާމްދީނުގެ ހިމާޔަތުގައި ދިވެހިން” ގެ ނަމުގައި ކުރި މުޒާހަރާއާ ދެކޮޅު ޝުއޫރުތަކެއް ފާޅުކުރަމުން ދިޔައެވެ.

ގާތްގަނޑަކަށް 1 ގަޑިއިރަށް ދިގު ދެމިގެން ދިޔަ މި މުޒާހަރާ ނިންމާލާފައިވަނީ މުޒާހަރާ ފެށި މައިދާނަށް އެއްވެ، އެސަރަހައްދުގައި ކުރި ހާއްސަ ދުއާ އަކަށް ފަހުގައި އެވެ. މިމުޒާހަރާގައި ދީނާ ދެކޮޅަށް ކުރަމުންދާ މަސައްކަތްތައް ހުއްޓާލުމަށް ގޮވާލާފައި ވެއެވެ. އަދި “އިސްލާމް ދިނާ ދެކޮޅު ވެރިން ބޭނުމެއް ނުވޭ” ، “ދީން ވިއްކައެއް ނުލެވޭނެ”، މިފަދަ ޝިއާރުތައް އެކުލެވޭ ބޯޑުތައް މުޒާހަރާގެ ބައިވެރިން ގެންގުޅެފައި ވެއެވެ.