އާސަންދަ އާއި ހެލްތު ކޯޕަރޭޝަން ގުޅިގެން ރައްޔިތުންނަށް މައުލޫމާތު ދިނުމުގެ ބައްދަލުވުމެއް ކުޅުދުއްފުށީގައި ބާއްވަނީ

.

އާސަންދަ ކުންފުންޏާއި ހެލްތު ކޯޕަރޭޝަން ގުޅިގެން ރައްޔިތުންނަށް މައުލޫމާތު ދިނުމުގެ ބައްދަލުވުން ތަކެއް ބޭއްވުމަށް ހަމަޖެހިފައި ވާކަމުގައި ހެލްތު ކޯޕަރޭޝަނުން ބުނެފިއެވެ.

މިގޮތުން ކުޅުދުއްފުށީގެ ރައްޔިތުންނަށް ހުޅުވާލައިގެން މައުލޫމާތު ދިނުމުގެ ބައްދަލުވުމެއް ހުކުރު ދުވަހުގެ ރޭ 8:30 ގައި ތިލަ ދެކުނު ސިނަމާގައި އޮންނާނެ ކަމަށް ހެލްތު ކޯޕަރޭޝަންގެ ދަށުން ހިނގަމުން އަންނަ ކުޅުދުއްފުށީ ރީޖަނަލް ހޮސްޕިޓަލްގެ މެނޭޖަރ ޝީޒާ އިބްރާހިމް މައުލޫމާތު ދެއްވިއެވެ.

ޖެނުއަރީ މަހުގެ 1 ވަނަ ދުވަހުން ފެށިގެން ދިވެހިރާއްޖޭގެ ހުރިހާ ރައްޔިތުން ބައިވެރި ކުރެވިފައިވާ ޔުނިވާސަލް އިންޝުރެންސް ކަވަރޭޖް “އާސަންދަ” ގެ ހިދުމަތް ފެށުމަށް ހަމަޖެހިފައިވާތީ، އެހިދުމަތާއި ބެހޭގޮތުން ކުޅުދުއްފުށީގެ އިތުރުން މިސަރަހައްދުގައި ހިމެނޭ ހއ. ދިއްދޫ އާއި ށ. ފުނަދޫގައި ބައްދަލުވުންތައް ބޭއްވުމަށް ވަނީ ހަމަޖެހިފައެވެ.

ހެލްތު ކޯޕަރޭޝަނުން މައުލޫމާތު ދެއްވިގޮތުގައި ކޮންމެ އަތޮޅެއްގައި ހުންނަ ރަށްތަކުގެ ސިއްހީ މަރުކަޒުތަކުގައި އެހިދުމަތް ފޯރުކޮށްދޭން ތިބޭ މުވައްޒަފުން އެކަމަށް އަހުލުވެރި ކުރުމުގެ ގޮތުން ތަމްރީން ޕްރޮގްރާމެއް މިބައްދަލު ވުންތަކުގެ ހަވާސާގައި ކުރިއަށް ދާނެއެވެ. އަދި އާއްމުންނަށް ހުޅުވާލައިގެން ބާއްވާ ބައްދަލުވުންތައް ދިއްދޫ، ފުނަދޫ އަދި ކުޅުދުއްފުށި ކައުންސިލްގެ އިތުރުން އަތޮޅު ކައުންސިލްތަކާއި ގުޅިގެން ވީހާވެސް ގިނަ ބަޔަކަށް ބައިވެރި ވެވޭނެހެން ގެންދިއުމަށް މަސައްކަތް ކުރާނެއެވެ.

އާސަންދަގެ ފަރާތުން ތިން ބޭފުޅުން ބައިވެރިވާ ފުރަތަމަ ބައްދަލުވުން މިއަދު ދިއްދޫގައި ކުރިއަށް އެބަދެއެވެ. ކުޅުދުއްފުށީގައި ހުކުރު ދުވަހުގެ ރޭ މައުލޫމާތު ދިނުމުގެ ބައްދަލުވުން ބާއްވާ އިރު ހޮނިހިރު ދުވަހު ފުނަދުއަށް ދަތުރު ކުރާނެއެވެ. އަދި އޭގެ ފަހުން ޖެނުއަރީ 1 އަދި 2 ވަނަ ދުވަހު ކުޅުދުއްފުށީ ރީޖަނަލް ހޮސްޕިޓަލްގެ ގޯތި ތެރޭގައި މައުލޫމާތު ދިނުމުގެ ޝެޝަން ތަކެއް ހިންގާނެއެވެ.