މީލާދީ އާ އަހަރުގެ މުނާސަބަތުގައި މިއުޒިކް ޝޯއެއް ބާއްވައިފި

.

އިބްރާހިމް ހަމީދު

މީލާދީ އާ އަހަރުގެ މުނާސަބަތުގައި ކުޅުދުއްފުށީ އުތުރު ބަނދަރު ސަރަހައްދުގައި  މިއުޒިކް ޝޯއެއް ބާއްވައިފި އެވެ.

ކުޅުދުއްފުށީ ކަންފަތި ކެފޭއިން އިންތިޒާމުކޮށްގެން ރޭ ބޭއްވި މިޝޯގައި ލަވަތަށް ހުށަހަޅައިދިނީ އެމްއެންބީސީން ގެނެސްދިން ވޮއިސް އޮފް މޯލްޑިވްސް ސީޒަން 2 ގެ ދެވަނަ ހޯދި އަބްދުއްރަޝީދު އިބްރާހީމް (ދޮންބެ) އާއި ވީޓީވީން ކުރިއަށް ގެންދިޔަ މޯލްޑިވިއަން އައިކަން 2011 ގެ 3 ވަނަ ހޯދި ހއ އުތީމު ހަސަން ރަމީޒް އެވެ.

އާހަރުގެ މުނާސަބަތުގައި ބޭއްވި މިޝޯގައި ކުޅުދުއްފުށީ ދައްސޫރަ ބޮޑުބެރު ގްރޫޕުގެ ހުށަހެޅުންތައް ފެނިގެން ދިޔައެވެ.

2012 ވަނަ އަހަރަށް މަރުހަބާ ކިޔުމުގެ ގޮތުން ކުޅުދުއްފުށީގައި ހިންގާ ހަރަކާތްތަކުގެ ތެރޭގައި ހިމެނިގެން މިއަދު ހަވީރު ހިރަފުސް ދަނޑުގައި ހާއްސަ ފުޓްބޯޅަ މެޗެއް ކުޅުމަށްވެސް ވަނީ ހަމަޖެހިފައި އެވެ. މިމެޗުގައި ބައްދަލުކުރާނީ ހިރަފުސް ޓީމާއި ހދ އަތޮޅު މުބާރާތުގެ ޗެމްޕިއަން ކްލަބް ނޮޅިވަރަން ޓީމެވެ.