މޫސުމަށް އަންނަ ބަދަލުތަކާ ބެހޭގޮތުން މޯލްޑިވިއަން ޔޫތް ކްލައިމެޓް ނެޓްވޯކްގެ ފަރާތުން ސްކޫލްކުދިންނަށް މައުލޫމާތު ދީފި

Jan 4, 2012

ހުސްނާ

މޫސުމަށް އަންނަ ބަދަލުތަކާ ބެހޭގޮތުން މޯލްޑިވިއަން ޔޫތް ކްލައިމެޓް ނެޓްވޯކްގެ ފަރާތުން ސްކޫލްކުދިންނަށް މައުލޫމާތު ދިނުމުގެ ސެޝަނެއް ބާއްވައިފި އެވެ.

މިއަދު ހެނދުނު ޖަލާލުއްދީން ސްކޫލުގައި ބޭއްވި މިބައްދަލުވުމުގައި، ދުނިޔެ ހޫނުވުމާއި މޫސުމަށް އަންނަ ބަދަލުގެ ސަބަބުން ރާއްޖެފަދަ ޖަޒީރާ ޤައުމުތަކަށް ދިމާވެދާނެ މައްސަލަތަކާއި ދިމާވަމުން އަންނަ ރަށްގިރުމާއި އުދައެރުން ފަދަ ކަންކަމާ ބެހޭގޮތުން މައުލޫމާތު ހިއްސާ ކޮށްފައިވެ އެވެ. މީގެ އިތުރުން މިފަދަ މައްސަލަތައް ހައްލުކުރުމަށް ޒުވާނުންނަށް ކުރެވިދާނެ ކަންކަމާއި ބެހޭގޮތުން މައުލޫމާތު ދީފައިވެ އެވެ.

މައުލޫމާތު ދިނުމުގެ ބައްދަލުވުމަށްފަހު ކުޅުދުއްފުށީ އޮންލައިނަށް މައުލޫމާތު ދެމުން މޯލްޑިވިއަން ޔޫތް ކްލައިމެޓް ނެޓްވޯކްގެ ކޯ ފައުންޑަރ އާއިޝަތު ނިޔާޒް ވިދާޅުވީ، މިގޮތަށް ހިންގާ ޕުރޮގަރާމްތަކަށް ކުޅުދުއްފުށިން މާބޮޑު ތަރުހީބެއް ނުލިބޭ ކަމަށެވެ. އަދި މިދިޔަ އަހަރު ހުރާގައި ބޭއްވި ކޭމްޕަށްވެސް އުތުރުގެ އަތޮޅުތަކުގެ ބައިވެރިވުން ވަރަށް ކުޑަކަމަށް އެފަރާތުން މައުލޫމާތު ދެއްވި އެވެ.

މޯލްޑިވިއަން ޔޫތް ކްލައިމެޓް ނެޓްވޯކުން، ރާއްޖޭއިން ބޭރުގެ ޔޫތް ނެޓްވޯރކްސް ތަކާއި ގުޅިގެން މިއަހަރުގެ ސެޕްޓެމްބަރ ހިސާބުގައި އިންޓަރނޭޝަނަލް ޔޫތް ކްލައިމެޓް ކޮންފަރެންސެއް ރާއްޖޭގައި ބޭއްވުމަށް މަސައްކަތް ކުރެވެމުން ދާކަމަށް އާއިޝަތު ނިޔާޒް ވިދާޅުވި އެވެ. އަދި މިކޮންފަރެންސްގައި ބައިވެރިވުމަށް ޝައުގުވެރިވާ ޒުވާނުންނަށް އެފަރާތާއި ގުޅިގެން ބައިވެރިވުމުގެ ފުރުސަތު ހުޅުވިފައިވާކަމަށްވެސް އޭނާ ވިދާޅުވި އެވެ.

މިސެޝަންގައި މައުލޫމާތު ދެއްވީ މޯލްޑިވިއަން ޔޫތް ކުލައިމެޓް ނެޓްވޯކްގެ ކޯ ފައުންޑަރ އާއިޝަތު ނިޔާޒް އެވެ. މިބައްދަލުވުމުގައި ޖަލާލުއްދީން ސްކޫލުގެ 13 ދަރިވަރުން ބައިވެރިވެފައިވެއެވެ.

މިފަދަ ބައްދަލުވުމެއް ޒުވާނުންނަށް ހާއްސަކޮށްގެންވެސް ވަނީ ބާއްވާފައި އެވެ. އެބައްދަލުވުމުގައި ވެސް ބައިވެރިވެފައިވަނީ ނިސްބަތުން މަދު އަދަދެއްގެ ބައެއް ކަމަށް މޯލްޑިވިއަން ޔޫތް ކުލައިމެޓް ނެޓްވޯކުން ބުނެއެވެ.

މިލިޔުމާއި ގުޅޭ