މިފެށޭ ދިރާސީ އާ އަހަރު ކުޅުދުއްފުށީގެ ސްކޫލުތަކުގައި ވޮލެންޓިއަރ ޓީޗަރުން ކިޔަވައިދޭނެ: އެޑިއުކޭޝަން ޔުނިޓް

ހުސްނާ

މިފެށޭ ދިރާސީ އާއަހަރު ކުޅުދުއްފުށީގެ ސްކޫލުތަކުގައި ވޮލަންޓިއަރ ޓީޗަރުން ކިވައިދޭނެކަމަށް މަތިއުތުރު ސަރަހައްދުގެ އެޑިއުކޭޝަން ޔުނިޓުން ބުނެފި އެވެ.

މަތިއުތުރުގެ އެޑިއުކޭޝަން ޔުނިޓުގެ ސަޕްރިންޑެންޓް އިބްރާހިމް ރަޝީދު ވިދާޅުވީ ރާއްޖޭގެ އެކި ސްކޫލުތަކުގައި ކިޔަވައި ދިނުމަށް މިއަހަރު ރާއްޖެ އައި 50 އަށްވުރެގިނަ ވޮލަންޓިއަރ ޓީޗަރުންގެ ތެރެއިން 3 ޓީޗަރަކު ކުޅުދުއްފުށީގެ އެކި ސްކޫލުތަކުގައި ކިޔަވައިދޭނެ ކަމަށެވެ.

“3 ޓީޗަރުން މިރަށަށް (ކުޅުދުއްފުއްޓަށް) އަންނާނެ. އޭގެ ތެރެއިން 2 ޓީޗަރުން އަފީފުއްދީން ސްކޫލުގައި ކިޔަވައިދޭނެ. އަނެއް ޓީޗަރު ޖަލާލުއްދީން ސްކޫލަށް.” އިބްރާހިމް ރަޝީދު ވިދާޅުވިއެވެ.

އިބްރާހިމް ރަޝީދު ވިދާޅުވީ އަފީފުއްދީނަށް އައި ޓީޗަރުން ކިޔަވައިދެއްވާނީ އިނގިރޭސި އަދި ބިޒްނަސް ސްޓަޑީސް ކަމަށެވެ. އަދި ޖަލާލުއްދީން ސްކޫލަށް އައި ޓީޗަރު ކިޔަވައިދެއްވާނީ ބިޒްނަސް ސްޓަޑީސް ކަމަށެވެ.

އަންނަ އާދިއްތަ ދުވަހު ދިރާސީ އާ އަހަރު ފެށޭއިރު ރާއްޖޭގެ ސްކޫލުތަކުގައި ކިޔަވައިދިނުމަށް 4 ޤައުމަކުން، ވޮލަންޓިއަރުންގެ ގޮތުގައި 57 ޓީޗަރުން އަންނާނެއެވެ. އޭގެތެރޭގައި އިނގިރޭސި ވިލާތާއި ފްރާންސްގެ އިތުރުން ޗައިނާއާއި ޖަޕާންގެ ޓީޗަރުންވެސް ހިމެނެއެވެ.