މިއަދަކީ މިއަހަރުގެ ދިރާސީ އާ އަހަރު ފެށުނު ދުވަހެވެ. ބޮޑު ޗުއްޓީއަށްފަހު އާއަހަރުގެ ކިޔެވުން ފެށޭއިރު ކުޅުދުއްފުށީގެ ސްކޫލުތަކުން އެންމެ ފާހަގަ ކޮށްލެވޭ އެއްކަމަކީ އަފީފުއްދީން ސްކޫލުގައި އައު މުޤައްރަރަކަށް ކިޔަވައިދޭން ފަށާކަމެވެ. އޭގެ އިތުރުން ކުޅުދުއްފުށީގައި ހުރި އެންމެ ދުވަސްވީ ޕްރީ ސްކޫލު ކަމުގައިވާ އަމީރު އަމީން ސްކޫލުގައި ވެސް މިއަހަރު ކިޔަވައި ދޭނީ އާ މުޤައްރަރަކަށެވެ.

ދިރާސީ އާ އަހަރު ފެށުނު އިރު ކުޅުދުއްފުށީ އަފީފުއްދީން ސްކޫލުގައި މިއަދު މުޅިން އާކަމެއް ދަނީ ތަޖުރިބާ ކުރަމުންނެވެ. ޒަމާންތަކެއް ވަންދެން ބޮޑު ބަދަލެއް ގެނެސްފައިނުވާ ދިވެހިރާއްޖޭގެ ތައުލީމީ މުޤައްރަރަށް ބަދަލުތަކެއް ގެނެސް އެބަދަލުތައް ތަޖުރިބާ ކުރުމަށް ކަނޑައެޅި އެއް ސްކޫލަކީ ކުޅުދުއްފުށީ އަފީފުއްދީން ސްކޫލެވެ. އެގޮތުން އެސްކޫލުގައި ކުރިން ކިޔަވައިދެމުން ގެންދިޔަ އެންވަޔަރމެންޓަލް ސްޓަޑީސްގެ ބަދަލުގައި އައު މާއްދާއެއް ކިޔަވައިދޭން ފަށާނެ އެވެ. އަދި، ކުރިން ކިޔަވައި ނުދޭ އާ މާއްދާ އެއް މިއަހަރު އެސްކޫލުގައި ކިޔަވައިދޭނެ އެވެ.

2011 ވަނަ އަހަރު މުޅިން އަލަށް ސާނަވީ ގުރޭޑްތަކަށް ކިޔަވައިދޭން ފެށި އަފީފުއްދީން ސްކޫލުގައި އަލަށް އިތުރުވި ގުރޭޑް 9 އާ އެކު މިއަހަރު 19 ކުލާހުގައި މުޅިއެކު 418 ދަރިވަރުން ކިޔަވާނެ އެވެ. އަދި މިއަހަރު އެސްކޫލުގައި ޖާގައިގެ ދަތިކަމުގެ މައްސަލައާ ކުރިމަތިލާން ޖެހިފައިވާ ކަމަށް އެސްކޫލުގެ ޕްރިންސިޕަލް އާދަމް މޫސާ ވިދާޅުވި އެވެ. ޕްރިންސިޕަލް ވިދާޅުވި ގޮތުގައި އެސްކޫލުގެ ބައެއް ގްރޭޑްތަކަށް ފޮތްބައި ހަމަނުވުމުން ބައެއް ބެލެނިވެރިންގެ ފަރާތުން ޝަކުވާ ލިބެމުން ދެއެވެ. އެހެންނަމަވެސް އެފަދަ ކަންކަމާއެކު ވެސް މިއަދު ފެށުނު ދިރާސީ އާ އަހަރަށް އެސްކޫލު ތައްޔާރު ވެފައިވާ ކަމަށް އާދަމް މޫސާ ވިދާޅުވި އެވެ.

“ޖުމްލަ ގޮތެއްގައި ސްކޫލުގެ ހުރިހާ ކަމެއްވެސް 2012 ވަނަ އަހަރު ކިޔަވައިދެވޭ ވަރަށް އޮތީ ތައްޔާރުވެފައި.” އާދަމް މޫސާ ވިދާޅުވިއެވެ.

ކުޅުދުއްފުށީގައި ހުންނަ އެންމެ ކިޔަވާކުދިން ގިނަ ހދ. އަތޮޅު ތައުލީމީ މަރުކަޒުގައި މިއަހަރު 688 ކުދިން ތައުލީމު ހާސިލް ކުރާނެއެވެ. ސްކޫލަށް ޓީޗަރުން ހަމަވެފައި ވީނަމަވެސް ބައެއް ޓީޗަރުން ޗުއްޓީގައި ތިބުމުގެ ސަބަބުން ރިލީފް ޓީޗަރުން ހޯދުމަށް އިއުލާނު ކޮށްފައިވާ ކަމަށް އެސްކޫލުގެ ޕްރިންސިޕަލް އިބްރާހީމް މުޙައްމަދު މައުލޫމާތު ދެއްވިއެވެ. ދަރިވަރުންނަށް ބޭނުންވާ ފޮތްތައް ހަމަވެފައި ވީނަމަވެސް ސްކޫލަށް ބޭނުންވާ ބައެއް ފޮތްތައް އަދި ހަމަ ނުވާ ކަމަށް އޭނާ ވިދާޅުވިއެވެ.

ވޭތުވެ ދިޔަ އަހަރުގެ ޖެނުއަރީ މަހު ބިންގާ އެޅުނު ހޯލުގެ މަސައްކަތް އެކަށީގެންވާ ބާރުމިނުގައި ކުރިއަށް ނުދާ ކަން އިބްރާހީމް މުޙައްމަދު ފާހަގަ ކުރެއްވިއެވެ. އެހެން ނަމަވެސް 2011 އެގާރަ ވަނަ އަހަރު އެ ސްކޫލަށް ތައާރަފް ކުރެވުނު މަލްޓި މީޑިޔާ ވަސީލަތާއެކު، ތަފާތު ތަކަކާއެކު ކިޔަވައި ދިނުމަށް، ސްކޫލު ތައްޔާރުވެފައި ވާކަމަށް ޕްރިންސިޕަލް ވިދާޅުވިއެވެ.

ކުޅުދުއްފުށީގައި މަތީ ސާނަވީއާ ހަމައަށް ކިޔަވައިދޭ ހަމައެކަނި ސްކޫލު ކަމުގައިވާ ޖަލާލުއްދީން ސްކޫލުގައި މިއަހަރު 550 ކުދިން ތައުލީމު ހާސިލް ކުރާނެއެވެ. މީގެ ތެރޭގައި 8 ވަނަ ގްރޭޑަށް އަލަށް ވަތް 125 ދަރިވަރުން ހިމެނެ އެވެ. ޖަލާލުއްދީން ސްކޫލުގައި ވެސް ފޮތްތައް ހަމަނުވުމުގެ މައްސަލަ ވަނީ ދިމާވެފައި އެވެ. އަދި އެސްކޫލުގެ ޓީޗަރުން ހަމަވިކަން ކަށަވަރު ކުރަން ނޭނގޭ ކަމަށް ސްކޫލު ޕްރިންސިޕަލް ސައީދު އަހްމަދު ވިދާޅުވިއެވެ.

“ޓީޗަރުން ހަމަވިކަމެއް އަދި ބުނާކަށް ނޭނގޭ. ބައެއް ޓީޗަރުން މިހާރުވެސް މިކޮޅަށް އައުމުގެ މަގުމަތީގައި.” ސައީދު އަހުމަދު މިދިޔަ ހަފްތާގެ ތެރޭގައި ވިދާޅުވި އެވެ. “ޓީޗަރުން ހަމަ ކުރުމުގެ މަސައްކަތް މިނިސްޓްރީން ކުރަމުން ދަނީ.”

އެހެން ނަމަވެސް ޖުމްލަ ގޮތެއްގައި ހުރިހާ ކަމެއް ހަމަ ޖެހިފައިވާކަމަށް ސައީދު ވިދާޅުވިއެވެ. އަދި މިފެށޭ ދިރާސީ އާއަހަރަކީވެސް ކާމިޔާބު އަހަރަކަށް ހެދުމަށް މަސައްކަތް ކުރާނެކަމަށް އޭނާ ވިދާޅުވިއެވެ.

“މިއަހަރަކީވެސް ކާމިޔާބު އަހަރަކަށް ވާނެކަމަށް އުންމީދު ކުރަން. ސްކޫލުގެ ހުރިހާ ސްޓާފުންނާއެކީ މަޤްޞަދު ހާސިލް ކުރުމަށް މަސައްކަތް ކުރާނަން” ސައީދު ވިދާޅުވިއެވެ.

ކުޅުދުއްފުށީގެ އެންމެ ގިނަ ދުވަސްވީ ޕްރީ ސްކޫލު ކަމުގައިވާ އަމީރު އަމީން ސްކޫލުގައި މިއަހަރު 502 ކުދިން ކިޔަވަމުން ދާނެއެވެ. އެ ސްކޫލުން މައުލޫމަތު ދެއްވި ގޮތުގައި އެސްކޫލުގެ ކުލާސްތަކުގައި ޖާގަ އޮތް ވަރަކުން ކުދިން ވައްދާފައި ވާނެއެވެ. އެގޮތުން މިފަހަރު ބައެއް ކްލާސްތަކުގައި 25 ކުދިންވެސް ތިބޭނެ ކަމަށް އެފަރާތުން މައުލޫމާތު ދެއްވައެވެ. ސްކޫލަށް އިތުރު ޓީޗަރުން ބޭނުންވާ ކަމަށާއި ޓީޗަރުން ހޯދުމަށް އިއުލާން ކޮށްފައިވާކަމަށް އެސްކޫލުގެ ލީޑިން ސުޕަވައިޒަރ އާއިޝަތު މައުލޫމާތު ދެއްވިއެވެ.

“ޓީޗަރުން އަދި ހަމައެއް ނުވޭ. މިހާރުވެސް ހުންނާނެ ޓީޗަރުން ހޯދުމަށް އިއުލާން ކޮށްފައި.”

މި ސްކޫލަށް ބެލެނިވެރިންނާއި ޓީޗަރުންގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަމަށާއި ވަކިން ހާއްސަ ކޮށް ކައުންސިލްގެ ފަރާތުން ލިބެމުންދާ އެހީތެރިކަން ފާހަގަ ކުރެވޭކަމަށް އާއިޝަތު ވިދާޅުވިއެވެ.

ކުޅުދުއްފުށީގައި ވަރަށް ފަހުން ހުޅުވުނު ޕްރީ ސްކޫލެއް ކަމުގައިވާ އިރުމަތީ އަވަށު ޕްރީ ސްކޫލުގައި ވެސް އާއަހަރަށް ބޮޑުތި ތައްޔާރީތަކެއް ވެފައި ވެއެވެ. އެގޮތުން ވަށާފާރުގައި ކުލަ ލުމާއި ބައެއް ގަސްތައް ކަނޑާ ސާފުކުރުމުގެ މަސައްކަތް ކޮށްފައިވެއެވެ. މިހުރިހާ ކަމެއްވެސް ކުރަނީ ޓީޗަރުންނާއި ބެލެނިވެރިން ގުޅިގެން ކަމަށާއި އެކަން ސްކޫލުގެ ޕްރިންސިޕަލް ޝުކުރުވެރިކަމާއެކު ފާހަގަ ކުރެއްވިއެވެ. ހާއްސަ ގޮތެއްގައި ކައުންސިލްގެ ފަރާތުން ލިބެމުންދާ އެހީތެރިކަން ފާހަގަ ކުރެއްވިއެވެ. އެ ސްކޫލުގައި މިއަހަރު 223 ކުދިން ތައުލީމު ހާސިލް ކުރާނެއެވެ.

ވޭތުވެ ދިޔަ އަހަރު ނިމިގެން ދިޔައީ ކުޅުދުއްފުށީގެ ސްކޫލުތަކުގެ ދަރިވަރުން ކިޔެވުމުގެ އިތުރުން ތަފާތު އެހެން ހަރަކާތްތަކުގައިވެސް ރަންވަނަ ތަކެއް ހޯދި އަހަރެއްގެ ގޮތުގައެވެ. ހަމަ ެފަދަ ނުވަތަ އެއަށް ވުރެ ވެސް ފޮނި ކާމިޔާބީތަކެއް ދަރިވަރުން ހޯދާނެ އަހަރަކަށް މިއަހަރު ވެސް ވުމަކީ އެންމެންގެ ވެސް އުއްމީދެކެވެ.