މަސްތުވާތަކެތި ކަމަށް ޝައްކު ކުރެވޭ އެއްޗެހިތަކަކާ އެކު ކުޅުދުއްފުށިން 4 މީހަކު ހައްޔަރުކޮށްފި

އިބްރާހީމް ހަމީދު

މަސްތުވާ ތަކެތި ކަމަށް ޝައްކު ކުރެވޭ އެއްޗެހިތަކަކާއެކު ކުޅުދުއްފުށިން 4 މީހަކު ރޭ ހައްޔަރުކޮށްފި އެވެ.

ފުލުހުން ވިދާޅުވީ، ރޭގެ ގާތްގަނޑަކަށް 11:50 ހާއިރު ހދ ނޮޅިވަރަމްފަރުން ފުރައިގެން ކުޅުދުއްފުއްޓަށް ދާން ފުރި ލޯންޗެއްގައި މަސްތުވާތަކެތި ހުރިކަމަށް އާންމު ފަރާތަކުން ދިން މައުލޫމާތަކާ ގުޅިގެން ފުލުހުން ގޮސް ޗެކް ކުރުމުގެ ތެރޭގައި މަސްތުވާތަކެތި ކަމަށް ބެލެވޭ އެއްޗެހިތަކެއް ވަނީ ފެނިފައެވެ.

މިމައްސަލައާ ގުޅިގެން ހައްޔަރު ކުރެވުނު 4 މީހުންނަކީވެސް ކުޅުދުއްފުއްޓަށް ނިސްބަތްވާ މީހުން ކަމަށް ފުލުހުންގެ މީޑިޔާ އޮފިޝަލް ސާޖަންޓް އިސްމާއީލް އަލީ ވަނީ ކަށަވަރު ކޮށްދީފައެވެ. އެއީ 20 އަހަރާއި 25 އަހަރާ ދެމެދުގެ މީހުން ކަމަށް އެފަރާތުން މައުލޫމާތު ދެއްވިއެވެ. ހައްޔަރުކުރި އެއްވެސް މީހެއްގެ ނަމެއް ފުލުހުން ހާމަކޮށްފައެއް ނުވެއެވެ.

މިމައްސަލާގައި ހައްޔަރު ކުރެވުނު 4 މީހުން ކުޅުދުއްފުށީ ޕޮލިސް ސްޓޭޝަންގެ ބެލުމުގެ ދަށުގައި ތިބިއިރު ފުލުހުން ދަނީ މިމައްސަލަ އިތުރަށް ތަހުގީގު ކުރަމުންނެވެ.