ކުޅުދުއްފުށީ ހިއްކި ބިމުން ވެލި ނަގާ މައްސަލައިގައި ރައްޔިތުންގެ ބަޔަކު ފުލުހުންނާ ބައްދަލު ކޮށްފި

ހުސްނާ އަބްދުﷲ

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނުން ކުޅުދުއްފުށީގެ ހިއްކި ސަރަހައްދުން ވެލި ނަގައި އަދި އެ ވެލިން ގާ އަޅައިގެން އެހެން ރަށްރަށަށް ގެންދާ ކަމަށް ބުނެ ރައްޔިތުންގެ ބަޔަކު އިއްޔެ ފުލުހުންނާ ބައްދަލު ކޮށްފިއެވެ.

އިއްޔެ ހަވީރުގެ ވަގުތެއްގައި ކުޅުދުއްފުށީ ޕޮލިސް ސްޓޭޝަނުގައި ބޭއްވި މިބައްދަލުވުމާ ބެހޭ ގޮތުން ފުލުހުންގެ މީޑިއާ އޮފިޝަލް އިސްމާއިލް އަލީ މިއަދު ވިދާޅުވީ، ރައްޔިތުންގެ ތެރެއިން ބަޔަކު ފުލުހުންނާ ބައްދަލުކޮށްފައިވާ ކަމަށާއި އެމީހުން ފުލުހުންގެ ކިބައިން އެދުނީ ރޯޑް ޑިވޮލޮޕްމެންޓް ކޯޕަރޭޝަނުން، ކުޅުދުއްފުށީގައި ހިއްކާފައިވާ ސަރަހައްދުން ވެލި ނަގައިގެން އެ ވެލިން ގާ އަޅައިގެން ވިއްކާތީ އެކަން ހުއްޓުވައި ދިނުމަށް ކަމަށެވެ.

އިއްޔެ ހަވީރު ފުލުހުންނާއެކު ބޭއްވި ބައްދަލުވުމުގައި ފުލުހުން ބުނެފައި ވަނީ، އެ މައްސަލައިގައި އެންމެ ރަނގަޅު ގޮތަކީ ކުޅުދުއްފުށީ ކައުންސިލާ މަޝްވަރާ ކޮށްގެން ގޮތެއް ހަމަޖެއްސުން ކަމަށެވެ.

“އަޅުގަނޑުމެން ބުނީ އެ ތަކެއްޗަކީ ކައުންސިލްގެ އިހްތިޞާސް ތެރޭގައި ހިމެނޭ އެއްޗެހި ކަމަށް. އެހެންވީމަ އެންމެ ރަނގަޅު ގޮތަކީ ކައުންސިލާ މަޝްވަރާ ކޮށްގެން އެކަން ކުރިޔަށް ގެންދެވުން ކަމަށް” އިސްމާއިލް އަލީ ވިދާޅުވިއެވެ. ” ކޯޓު އަމުރެއް ނެތި އަޅުގަނޑުމެންނަކަށް ނޯންނާނެ އެކަން ހުއްޓުވޭކަށް”

ފުލުހުން މިހެން ބުނެފައި ވީނަމަވެސް ކުޅުދުއްފުށީގައި އަލަށް ހިއްކި 28.5 ހެކްޓަރުގެ ބިމަކީ ސަރުކާރުން ކުޅުދުއްފުށީ ޑިވޮލޮޕްމެންޓް ކޯޕަރޭޝަނަށް ދީފައިވާ ބިމެކެވެ.

ފުލުހުންނާ ބައްދަލުކުރި މީހުން މައުލޫމާތު ދޭގޮތުގައި ށ. މިލަންދޫ ފަދަ ބައެއް ރަށްރަށަށް ވެސް ކުޅުދުއްފުށިން ވެލި ނަގައިގެން އަޅާ ގައު ގެންދެއެވެ.

މިމައްސަލައާ ބެހޭ ގޮތުން ކުޅުދުއްފުށީ ޑިވެލޮޕްމަންޓް ކޯޕަރޭޝަނުގެ ބޯޑު މެމްބަރު ހަސަން ޒިޔާދު ވިދާޅުވީ، އަލަށް ހިއްކި ސަރަހައްދުން ވެލި ނެގުމާބެހޭ ކަންތައްތައް ހަވާލުކޮށްފައިވާނީ ކުޅުދުއްފުށީ ކައުންސިލަށް ކަމަށެވެ. އަދި، ހިއްކި ބިމުން ވެލި ނެގުމަށް ހުއްދަ ދީފައިވާނީ ވަކި އަދަދަކަށް އަދި ވަކި ސަރަހައްދަކުން ކަމަށް ޒިޔާދު ވިދާޅުވި އެވެ. އެހެންނަމަވެސް ރަށުން ބޭރަށް އެސަރަހައްދުން ނަގާ ވެލިން އަޅާ ގައު ގެންދާކަމުގެ މައުލޫމާތެއް ލިބިވަޑައިގެންފައި ނުވާ ކަމަށް ޒިޔާދު ވިދާޅުވި އެވެ.

” ބިން ހިއްކި އިރުވެސް އެނގޭ އެސަރަހައްދުން (ކުޅުދުއްފުށީ ކޮމާޝަލް ބަނދަރު ހަދާ ސަރަހައްދު) ވެލި ނަގަން ޖެހޭނެކަން.” ޒިޔާދު ވިދާޅުވި އެވެ. “ވެލި މިހާރު އެނަގަނީ ވެލި ނަގަންވެސް ޖެހިފައި އޮތް ސަރަހައްދަކުން. ކައުންސިލަށް ހުއްދަ ދީފައިވާނީ ރަށުގެ އިޖްތިމާއީ އެކި ބޭނުންތަކަށް ވެލި ނެގުމަށް އެކަނި.”

މިކަމާބެހޭ ގޮތުން ކުޅުދުއްފުށީ ކައުންސިލުގެ ރައީސަށް ގުޅާލުމުން ވިދާޅުވީ، ސުވާލެއް އޮތްނަމަ ލިޔުމުން ފޮނުވުމަށެވެ. ރޯޑް ޑިވެލޮޕްމަންޓް ކޯޕަރޭޝަނުން ވެލި ނަގަމުންދަނީ ކައުންސިލުން ހުއްދަ ދީގެން ތޯ ތަކުރާރުކޮށް ސުވާލުކުރުމުން ވެސް ވިދާޅުވީ، ޖަވާބު ދެއްވޭނީ ލިޔުމުން ފޮނުވުމުން ކަމަށެވެ.

ކުޅުދުއްފުށީގެ މަގުތަށް ރަނގަޅު ފެންވަރަކަށް ހެދުމަށް ހަވާލުކޮށްފައިވާ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނުގެ ޖެނެރަލް މެނޭޖަރ އިމްތިޔާޒް މިއަދު ވިދާޅުވީ، އެކޯޕަރޭޝަނުން ގާނޫނާ ގަވާއިދާ ހިލާފު އެއްވެސް ކަމެއް ނުކުރާނެ ކަމަށެވެ. އަދި ކުޅުދުއްފުށިން ނަގާ ވެލި ބޭނުންކުރެވޭނީ ކުޅުދުއްފުށީގެ މަގު ހެދުމަށް ބޭނުންވާ ގާ އެޅުމަށް ކަމަށެވެ.

ކުޅުދުއްފުށީގައި އަލަށް ހިއްކާފައިވާ ބިން ސަރުކާރުން ހަވާލުކޮށްފައިވަނީ ކުޅުދުއްފުށީ ޑިވެލޮޕްމަންޓް ކޯޕަރޭޝަން (ކޭޑީސީ) އަށެވެ. ކޭޑީސީ އަކީ ދިވެހި ސަރުކާރުގެ 60 އިންސައްތަ އަދި ކުޅުދުއްފުށީ ކައުންސިލުގެ 40 އިންސައްތަ ހިއްސާ އޮންނަ ކުންފުންޏެކެވެ.