ކުޅުދުއްފުށީގައި 100 އެނދުގެ ސިޓީ ހޮޓަލަކާއި 50 އެނދުގެ ސިޓީ ހޮޓަލެއް އަޅަނީ

ކުޅުދުއްފުށީ ޑިވެލޮޕްމެންޓް ޒޯނުގައި 100 އެނދުގެ ސިޓީ ހޮޓަލަކާއި 50 އެނދުގެ ސިޓީ ހޮޓަލެއް އެޅުމަށް ކުޅުދުއްފުށީ ޑިވެލޮޕްމަންޓް ކޯޕަރޭޝަނުން ނިންމައިފި އެވެ.

ކުޅުދުއްފުށީ ޑިވެލޮޕްމަންޓް ކޯޕަރޭޝަނަށް ދީފައިވާ ކުޅުދުއްފުށީގެ ހިއްކި ބިމުގެ ބީޗް ފުރަންޓްގައި އަޅާ މި ދެ ސިޓީ ހޮޓާ އެކުންފުންޏާއެކު ޖޮއިންޓް ވެންޗަރ އުޞޫލުން ތަރައްޤީ ކޮށް ހިންގާނެ ފަރާތެއް ހޯދުމަށް މިއަދު ވަނީ އިއުލާނުކޮށްފައި އެވެ.

މިކަމާ ބެހޭ އިތުރު ތަފްޞީލް، ކޭޑީސީގެ މެނޭޖިން ޑިރެކްޓަރ ފޯނަށް ޖަވާބު ނުދެއްވާތީ ލިބޭގޮތްވަނީ ނުވެފައި އެވެ.

ކުޅުދުއްފުށީ ޑިވެލޮޕްމަންޓް ކޯޕަރޭޝަނުން ނެރެފައިވާ އެ އިއުލާނުގައި ބުނެފައިވަނީ އެކުންފުންޏާއެކު ޖޮއިންޓް ވެންޗަރ އުޞޫލުން ދެ ސިޓީ ހޮޓާ ތަރައްޤީކޮށް ހިންގަން ބޭނުންވާ ފަރާތްތަކުން އެކަމަށް އެދި މިމަހުގެ 26 ގެ ކުރިން އެކުންފުންޏަށް ހުށަހެޅުމަށެވެ.