ނޫސްބަޔާން

ކުރީގެ ރައީސް މުހައްމަދު ނަޝީދު (އަންނި) އިސްތިއުފާ ދިނުމުން ރާއްޖޭގައި މިހާރު ހިނގަމުންދާ ހަމަނުޖެހުން ތަކުގެ ތެރެއިން ކުޅުދުއްފުށީ ޕޮލިސް ސްޓޭޝަނާއި ކުޅުދުއްފުށީގައި ހުންނަ އެމްއެންޑީއެފްގެ އިމާރާތަށް ގެއްލުން ދިނުމަށް އެމްޑީޕީގެ ބަޔަކު އިސްވެ ތިބެ ހިންގި ހަރަކާތްތައް ކަވަރ ކުރުމަށް އެސަރަހައްދުގައި ހަރަކާތްތެރިވި ކުޅުދުއްފުށީ އޮންލައިންގެ ރިޕޯޓަރަށް، އެމްޑީޕީގެ ބަޔަކު ބިރު ދައްކާ އިންޒާރުދީ ހަދާފައިވާތީ އެކަން މިނޫހުގެ މެނޭޖްމަންޓުން ކުށްވެރި ކުރަމެވެ.

ކުޅުދުއްފުށީ އޮންލައިނަކީ ވަކި ފަރާތަކަށް ނުޖެހި ޕުރޮފެޝަނަލް މިންގަނޑުތަކަށް އިހުތިރާމުކުރާ އަދި ހަގީގަތާއެއްގޮތަށް ހަބަރުތައް ކަވަރު ކުރުމުގައި މަސައްކަތްކުރާ ގާނޫނީ ހައިސިއްޔަތު ލިބިފައިވާ ނޫހެކެވެ. އަދި، ކުޅުދުއްފުށީ އޮންލައިންގެ ރިޕޯޓަރުންގެ ގޮތުގައި މަސައްކަތް ކުރާ ފަރާތްތަކަށް އިންޒާރުދީ ބިރުދެއްކުމަކީ ގާނޫނު އަސާސީން ލިބިދޭ ނޫސްވެރިކަމުގެ މިނިވަންކަމަށް ހުރަސް އެޅުން ކަމުގައި މިނޫހުން ދެކެމެވެ. ވީމާ، މިފަދަ ކަންތައްތައް އެއްވެސް ފަރާތަކުން ނުކުރުމަށް ނަސޭހަތްތެރިވަމެވެ. އަދި ދަންނަވަމެވެ. މިފަދަ އަމަލުތައް ތަކުރާރުވަމުން ދާ ނަމަ އެފަރާތެއްގެ މައްސަލަ ކަމާބެހޭ ފަރާތްތަކަށް ހުށަހަޅައި އެފަރާތަކާމެދު ފިޔަވަޅު އަޅާނެ ވާހަކަ ދެންނެވީމެވެ.