ފަހުގެ ހަބަރު: ކުޅުދުއްފުށީ ޕޮލިސް ސްޓޭޝަނަށް އެމްޑީޕީގެ ސަޕޯޓަރުން ހަމަލާދީފި

ކުޅުދުއްފުށީ ޕޮލިސް ސްޓޭޝަން ސަރަހައްދުން އަލީ އާދަމް

23:55

މިރޭގެ ހަމަނުޖެހުމުގައި އެމްޑީޕީގެ އެކްޓިވިސްޓަކަށް ވެސް ވަނީ އަނިޔާވެފައި. އޭނާއަށް ކުޅުދުއްފުށީ ރީޖަނަލް ހޮސްޕިޓަލުން ފަރުވާ ދިނުމަށްފަހު މިހާރު ވަނީ ދޫކޮށްލާފައި.

23:50

ފުލުހުންގެ މަރުކަޒު ހިމެނޭ ސަރަހައްދު މިހާރު ފެންނަނީ އަމާންކޮށް. މިސަރަހައްދުގައި މިހާރު އާންމުންގެ އެއްވެސް ބަޔަކު ނެތް. ފުލުހުންގެ މަރުކަޒުގެ ބިއްލޫރިތައް ތަޅާލާފައިވާއިރު ފުލުހުންގެ އިދާރާގެ ގޭޓް އަށްވެސް ވަނީ ހަމަލާ ދީފަ.

ސިފައިންގެ މަރުކަޒުތެރޭގައި އޮތް ފަޔަރ ލޮރީގެ ބިއްލޫރިތައް ތަޅާލާފައިވާއިރު، އެތަނުގެ ގޭޓަށްވެސް ވަނީ ހަމަލާދީފައި،

23:30

ފުލުހުންގެ ތެރެއިން އަނިޔާވެފައިވަނީ ނޯދަން ރީޖަނަލް ކޮމާންޑަރ އިބްރާހީމް ނަބީލް އަދި ކޮންސްޓަބަލް އަހުމަދު ނަސީމް މުހައްމަދަށް ކަމަށް ވޭ.

ފުލުހުންގެ ކޮމާންޑަރގެ ބޯ ފެޅިފައިވާއިރު ކޮންސްޓަބަލް އަހުމަދު ނަސީމްގެ ނޭފަތްމަތި ވަނީ ފެޅިފައި.

22:45

މިހާރު ސަރަހައްދު ދޫކޮށް މީހުންތައް ހިނގައްޖެ. ބޯކޮށް ވާރޭ ވެހެމުންވެސް އެބަދޭ.

ޕޮލިހުންގެ ތެރެއިން ބައެއް މީހުންނަށް އަނިޔާ ވެފައިވޭ. އަދަދެއް ޔަގީނެއް ނުވޭ. ކުޅުދުއްފުށީ ރީޖަނަލް ހޮސްޕިޓަލްގެ ދެ ޑޮކްޓަރުން ޕޮލިހުންނަށް ފަރުވާދިނުމަށް ޕޮލިސް ސްޓޭޝަނުގައި އެބަ ހަރަކާތްތެރިވޭ.

ސަރަހައްދުގައި އާއްމުންގެ ތެރެއިން ފުލުހުންގެ ހިމާޔަތުގައި ނުކުތް ބައެއް މީހުން އަދިވެސް އެބައުޅޭ. ނަމަވެސް އިދިކޮޅު ފަރާތްތައް މިހާރު ވަނީ ސަރަހައްދު ދޫކޮށް ގޮސްފައި.

ފުލުހުންގެ ސަލާމަތަށް ކޮންމެވެސް ވަރަކަށް ޕެޕާ ސްޕްރޭ ބޭނުންކޮށްފައި ވާކަމަށް ބުނޭ.

22:15

ޕޮލިސް ސްޓޭޝަންގެ އެއް ގޭޓަށް ވަނީ ގެއްލުން ދީފައި. އެތަނުގައި ޕޮލިހުންނާއެކު އެމްއެންޑީއެފްގެ އޮފިޝަލުން މިހާރު ހަރަކާތްތެރި ވަމުން އެބަދޭ. ނަމަވެސް އިތުރު ހަމަނުޖެހުމެއް ނުހިނގާ.

22:00

ރަށު ކައުންސިލްގެ މެމްބަރު އަހުމަދު އަލީ ޕޮލިސް ސްޓޭޝަން ގެ ތެރޭގައި އެބަހުރި. އަހުމަދު އަލީ އަކީ އެމްޑީޕީއަށް ނިސްބަތްވާ މެމްބަރެއް. އަހުމަދު އަލީ ޕޮލިސް ސްޓޭޝަންގެ ތެރޭގައި ހުރިކަން އެއްވެފައިވާ ސަރުކާރުގެ ސަޕޯޓަރުންނަށް ފެނުމުން، އެމީހުން ހޫނު ވަމުން އެބަދޭ.

21:54

ގާބުރިއަކުން ޖެހި ފުލުހެއްގެ ބޯފެޅިފައިވޭ. އެމްބިއުލަންސް ވެސް އެސަރަހައްދަށް ހިނގައްޖެ. ފުލުހުން ފަސްޓްއެއިޑް ދިފި. ނަމަވެސް އެމްބިއުލަންސަށް އެއްވެސް މީހެއް ނާރުވާ އަނބުރާ ފޮނުވާލައިފި.

ހއ. ދިއްދޫ ޕޮލިސް ސްޓޭޝަނުގައި ތިބި ފުލުހުން އަމާން ދިނުމަށްފަހު ޕޮލިސް ސްޓޭޝަންގެ ތަޅުދަނޑި ރަށު ކައުންސިލް އާ ހަވާލުކޮށްފައި ވާކަމަށް މައުލޫމާތު ލިބިއްޖެ.

ށ. މިލަންދޫ ޕޮލިސް ސްޓޭޝަންވެސް ވަނީ މިއަދު ހަވީރު ހިސޯރު ކޮށްފައި.

21:53

ކުޅުދުއްފުށީ އޮންލައިންގެ ރިޕޯޓަރަށް އެމްޑީޕީގެ ސަޕޯޓަރުން އިންޒާރު ދެމުން އެބަދޭ.

21:50

ރައްޔިތުންގެ ތެރެއިން އިތުރު މީހުން ނުކުމެ ހަމަނުޖެހުންތައް މައިތިރިކުރުމަށް މަސައްކަތް ކުރޭ.

21:45

ރައްޔިތުންގެ ތެރެއިން އާ ސަރުކާރަށް ތާއީދު ކުރާ މީހުންތަކެއް އެސަރަހައްދަށް އެއްވެއްޖެ. ރައްޔިތުންގެ ތެރެއިން ދެބައި މީހުންގެ މެދުގައި ޒުވާބު ކުރަމުން އެބަދޭ.

އެސަރަހައްދު ދޫކޮށްދިއުމަށް ފުލުހުން އިންޒާރު ދެމުން އެބަދޭ. އެސަރަހައްދު ދޫކޮށް ނުދޭނަމަ ބާރު ބޭނުން ކުރާނެކަމަށް ފުލުހުން އިންޒާރު ދެމުން އެބަދޭ.

ހަމަނުޖެހުން ހިންގާމީހުންގެ ތެރޭގައި މިހާރު ހިމެނެނީ ޒުވާނުންގެ ތެރެއިން ދިހަ ވަރަކަށް ޒުވާނުން. އެސަރަހައްދުގައި ގިނައީ ކުޅިބަލާ މީހުން.

ފުލުސް އޮފީހާއި ޖެހިގެން ހުންނަ އެމްއެންޑީއެފް އިމާރާތް ވަނީ ބަންދުކޮށްފައި.

21:40

އަނެއްކާވެސް ހޫނުވާން ފަށައިފި. އެއްވިމީހުން ދުރަށް ދިއުމަށް ފަހު އަނެއްކާވެސް ފުލުސް އޮފީހާ ކައިރިޔަށް އައިސްފި.

21:30

އެއްވި މީހުން މިހާރު ތިބީ ސިނަމާއާއި ހަމައަށް ދުރަށްޖެހި. ނަމަވެސް ދުރުގައި ތިބެގެން ގާއުކަމުން އެބަދޭ.

21:20

ފުލުހުންނާއި ދިމާލަށް ގާއުކަމުންދާ މީހުންނަށް ފުލުހުން އަންނީ ނަސޭހަތް ދެމުން. އުކަމުންދާ ގާބުރިބުރިން ޖެހި ބައެއް ފުލުހުންނަށް އަނިޔާވަމުން ދާކަން ފާހަގަ ކުރެވޭ.

21:10

ފުލުސް އޮފީސް ކުރިމައްޗަށް އެއްވި މީހުން ފުލުހުންނަށް ހަމަލާ ދޭން ފަށައިފި. އެމީހުން ދަނީ ފުލުހުންނާއި ދިމާލަށް ގާއުކަމުން.

ފުލުސް އޮފީސް ވަނީ ނުވަދެވޭގޮތަށް ގޭޓްތައް ބަންދުކޮށްފައި. އަދި އެތަނުގައި ރަޔަޓްގިޔަރ ގައި ފުލުހުން ގާޑު ކުރަމުން އެބަދޭ.

21:00

އެމްޑީޕީގެ ސަޕޯޓަރުން ޕޮލިސް ސްޓޭޝަންގެ ކައިޔަށް އެއްވެއްޖެ. ގާތްގަނޑަކަށް ފަންސާހަކަށް މީހުން އެސަރަހައްދަށް އެއްވެފައިވޭ. އެތަނުން އެކަކުގެ ކޮނޑުމަތީގައި މަދިބޭސްޖަހާ ވައްތަރުގެ ފޮގް މެޝިން އެއް އެބައޮތް.

20:30

އެމްޑީޕީގެ ސަޕޯޓަރުންތަކެއް ކުޅުދުއްފުށީ އަމީރު އަމީން ސްކޫލާއި ދިމާ ހުޅަނގުގައި އޮންނަ ބިމަށް އެއްވަމުން އެބަދޭ. މިއީ އެމްޑީޕީގެ ސަޕޯޓަރުންގެ ހޮޅިއަށި ހުންނަ ސަރަހައްދު.

20:00

ކުޅުދުއްފުށީ ޕޮލިސް ސްޓޭޝަން ތައްޔާރީ ހާލަތައް ގެނެސްފިއެވެ.

އިއްޔެ އިސްތިއުފާ ދެއްވި ރައީސް ނަޝީދު އިސްކޮށް ހުންނަވައިގެން މިއަދު ހަވީރު މާލޭގައި ކުރެވުނު މުޒާހަރާ އާއި ގުޅިގެން ރާއްޖޭގެ ބައެއް ރަށްރަށުގެ ޕޮލިސް ސްޓޭޝަންތަކަށް އެމްޑީޕީގެ ސަޕޯޓަރުން ހަމަލާދިނުމާއި ގުޅިގެން ކުޅުދުއްފުށީގައި ވެސް އެފަދަ ހަމަނުޖެހުމެއް ހިނގާފާނެތީ ފުލުހުން ތައްޔާރުވަނީ ކަމަށް ބެލެވޭ.