އޭއީސީގެ ޕުރިފެކްޓުން ހުވާކުރުމުގެ ރަސްމިއްޔާ ބާއްވައިފި

އިބްރާހީމް ހަމީދު

ހދ އަތޮޅު ތައުލީމީ މަރުކަޒުގެ ޕުރިފެކްޓުން ހުވާކުރުމާއި އެސްކޫލުގެ “ކިޔަވާކުދިންގެ ގުޅުން” (ކޭކޭޖީ) 2012 ވަނަ އަހަރަށް އިފްތިތާހު ކުރުމުގެ ރަސްމިއްޔާތު ބާއްވައިފި އެވެ.

އިއްޔެ އެސްކޫލުގައި ބޭއްވި މިރަސްމިއްޔާތު ޝަރަފުވެރިކޮށްދެއްވާ ގައުމީ ޔުނިވާރސިޓީގެ ލެކްޗަރ މުހައްމަދު ހުސައިން ދެއްކެވި ވާހަކައިގައި، ސްކޫލު ދައުރުގައި ކިޔަވާ ދަރިވަރުންނަށް ލިބޭ ފުރުޞަތުތަކަކީ ވަރަށް މުހިއްމު ފުރުޞަތުތަކެއް ކަމަށް ވިދާޅުވި އެވެ. އަދި ހަމައެކަނި ފޮތުން ކިޔަވާ ލިޔެ ހަދައިގެން ދަސްވާ އެއްޗެއްގެ އިތުރަށް ދިރިއުޅުމުގެ ތަފާތު ހުނަރުތައް ސްކޫލުދައުރުގައި ދަސްވުމަކީ ކުރިމަގުގައި ކުދިންނަށް ފައިދާވާނެ ކަމެއް ކަމަށް މުހައްމަދު ހުސެއިން ވިދާޅުވި އެވެ.

އިއްޔެގެ ރަސްމިއްޔާތުގައި ކިޔަވާކުދިންގެ ޖަމިއްޔާގެ މަގާމުތަކަށް ހޮވުނު ދަރިވަރުންނަށް ޓެގް ހަވާލުކުރުމާއި ސްކޫލުގެ އިސްމަގާމުތަކަށް ހޮވުނު ދަރިވަރުންނަށް ސޭޝް ހަވާލުކޮށްދެއްވީ ޝަރަފުވެރި މެހެމާނު މުހައްމަދު ހުސެއިން އެވެ. މިރަސްމިއްޔާތުގައި މަގާމުތަކަށް ހޮވުނު ދަރިވަރުންނަށާއި އަލަށް ހުވާކުރެއްވި ޕުރިފެކްޓުންނަށް އެސްކޫލުގެ ޕްރިންސިޕަލް ޝުކުރު އަދާކުރެއްވި އެވެ.

ހދ އޭއީސީގެ ހައުސްތަކުގެ ދަރިވަރުންނަށް ސޭޝް ހަވާލުކޮށްދެއްވީ ހައުސްތަކުގެ ކޯޑިނޭޓަރުންނެވެ. ޓީޗަރުންނަށް މަސްޢޫލިއްޔަތުތައް ހަވާލުކޮށްދެއްވީ ސްކޫލުގެ ޕްރިންސިޕަލް އިބްރާހިމް މުހައްމަދު އެވެ. ޕްރިފެކްޓުންނަށް ހޮވުނު ދަރިވަރުންނަށް ޓެގް ހަވާލުކޮށްދެއްވީ ޑެޕިއުޓީ ޕްރިންސިޕަލް ހަފީޒާ އަބްދުއްރަހުމާން އާއި ލީޑިންގ ޓީޗަރ އަހްމަދު ފަހީމްއެވެ. ޕްރިފެކުޓުންނަށް ހޮވުނު ދަރިވަރުންނަށް ހުވާލައިދެއްވީ ގުރެޖުއޭޓް ޓީޗަރ އަލީ ޝަރީފް އެވެ.

ހދ އަތޮޅު ތައުލީމީ މަރުކަޒުން މިއަހަރު 103 ޕްރިފެކްޓުން ހުވާ ކޮށްފައި ވެއެވެ.