ކުޅުދުއްފުށީ ހިއްކި ބިމުގައި ރޭ 11:30 ގައި ހިނގި ސައިކަލް އެކްސިޑެންޓްގައި އަނިޔާވެފައިވަނީ ކުޅުދުއްފުށީ ދާރުއްސަލާމް ހަދީޖާ މުހައްމަދަށާއި ސަރާސަރު އަހްމަދު އަބްދުއްސައްތާރަށާއި ސުހާނީ މުއާވިޔަތު ހަސަން އަށެވެ. މީގެ ތެރެއިން އަހުމަދު އަބްދުއްސައްތާރަށް ވަރަށް ބޮޑަށް އަނިޔާވުމުގެ ސަބަބުން ކުޅުދުއްފުށީ ރީޖަނަލް ހޮސްޕިޓަލްގައި ދަނީ ފަރުވާ ދެމުންނެވެ. މައުލޫމާތު ލިބިފައިވާ ގޮތުގައި އޭނާގެ ސިކުނޑިއަށް ވަނީ ގެއްލުންތަކެއް ލިބިފައެވެ. މީގެ އިތުރުން މުއާވިޔަތުގެ ނޭފަތުގެ ކަށިކޮޅެއް ބިދިފައިވާ ކަމަށް ވަނީ މައުލޫމާތު ލިބިފައެވެ.

މިއެކްސިޑެންޓް ހިނގަން މެދުވެރިވީ ކުޅުދުއްފުށީ ހިއްކި ބިމުގެ ބޮޑުމަގުން އަހްމަދު އަބްދުއްސައްތާރާއި މުއާވިޔަތު ހަސަން ދުއްވަމުން ދިޔަ ސައިކަލް ކޮންޓްރޯލް ނުކުރެވިގެން އެމަގުން ހިނގާފައި ދިޔަ ތިން އަންހެނެއްގެ ފަހަތުން ސައިކަލް އައިސް ހަދީޖާ މުހައްމަދުގެ ގައިގައި ޖެހިގެން ކަމަށް ވަނީ މައުލޫމާތު ލިބިފައެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން މިއެކްސިޑެންޓްގައި އަނިޔާވި ހަދީޖާ މުހައްމަދު ބުނީ، އަތިރިމައްޗަށް ފިނި ބުރަކަށް ގޮސް ގެއަށް އަންނަން ވެގެން ހިއްކި ސަރަހައްދުން ހިނގާފައި އަންނަނިކޮށް ވަރަށް ބާރަށް ފަހަތުން ސައިކަލެއް އައިސް ޖެހުނީއެވެ.

“ފަހަތުން ސައިކަލެއް އައިސް އަޅުގަނޑުގެ ކައިރީގައި ހުރި ކުޅުދުއްފުށީ ނަސްރު، ފާތުމަތު މޫސާ އަތުގައި ސައިކަލުން ޖެހި ކޮންޓްރޯލު ނުވެގެން އަޅުގަނޑުގެ ގައިގައި ޖެހި ވިއްސައިގެން މާދުރަށް ދިޔައީ. އެހިސާބުން ދެންވީ ގޮތެއް. އަދި ވެސް ރަގަޅަށް ހިނގައި ނުގަނެވޭ” ހަދީޖާ މުހައްމަދު ކިޔައިދިނެވެ.

ސައިކަލުގައި ތިބި އަހުމަދު އަބްދުއްސައްތާރާއި މުއާވިޔަތު ހަސަން އަކީ އުމުރުން 18 އަހަރު ނުފުރޭ ދެކުދިން ކަމަށާއި އޭގެތެރެއިން އެއްވެސް ކުއްޖެއްގެ އަތުގައި ސައިކަލު ދުއްވުމުގެ ލައިސަންސް ވެސް ނޯންނަކަމަށް މައުލޫމާތު ވަނީ ލިބިފައެވެ. އެކްސިޑެންޓް ހިނގިއިރު ސައިކަލް ދުއްވަން އިނީ ކޮން ކުއްޖެއް ކަމެއް އަދިވަނީ ސާފުވާގޮތް ނުވެފައެވެ.

މިމައްސަލަ ފުލުހުން ދަނީ ބަލަމުންނެވެ.

މިލިޔުމާއި ގުޅޭ