ވެރިކަން ބަދަލުކުރީ މާލިއްޔަތު އަންބޮނޑިއަށް ލުމަށް: ކުޅުދުއްފުށީ ކައުންސިލް

.

މުޙައްމަދު އިސްމާޢީލް

ވެރިކަން ބަދަލުކުރީ ސިފައިންނާއި ފުލުހުންގެ ތެރޭގައި އުޅޭ މޮޔަކުދިން ކޮޅެއް ލައްވައި، ދައުލަތުގެ މާލިއްޔަތު އަންބޮނޑިއަށް ލުމަށްޓަކައި ކަމަށް ކުޅުދުއްފުށީ ކައުންސިލުން ބުނެފިއެވެ.

ކުޅުދުއްފުށީ ކައުންސިލުން މިއަދު ނެރުނު ނޫސް ބަޔާނެއްގައި ބުނެފައިވަނީ ފެބްރުއަރީ 7 ވަނަ ދުވަހު އެމްޑީޕީގެ ސަރުކާރު ވައްޓާލާފައިވަނީ އިދިކޮޅު ސިޔާސީ ފަރާތްތަކަކާއި ސިފައިންނާއި ފުލުހުންގެ ތެރޭގައި އުޅޭ މޮޔަ ކުދިންކޮޅެއް ލައްވައި ކަމަށެވެ. އަދި ވެރިކަން ވައްޓާލީ ދައުލަތުގެ މާލިއްޔަތު އަންބޮނޑިއަށް ލުމަށްޓަކައި ކަމަށް ވެސް އެބަޔާނުގައި ބުނެފައި ވެއެވެ.

މިހާތަނަށް އެއްވެސް ރަސްމީ އިދާރާއަކުން ތަހުގީގުކޮށްފައިނުވާ ފެބްރުއަރީ 7 ވަނަ ދުވަހުގެ ހާދިސާއާމެދު ކުޅުދުއްފުށީ ކައުންސިލުން ވަކިގޮތަކަށް ނިންމީ ކީއްވެތޯ ކުޅުދުއްފުށީ ކައުންސިލުގެ ރައީސްއާ ސުވާލުކުރުމުން ވިދާޅުވީ، ވެރިކަން ބަދަލުވި ގޮތް “އެންމެންނަށް ވެސް އެނގޭނެ” ކަމަށާއި، އިތުރު މައުލޫމާތު ހޯދަން ބޭނުންވާނަމަ ފަހުން ގުޅުމަށެވެ.

އެމްޑީޕީގެ 7 ކައުންސިލަރުންގެ މައްޗަށް އެކުލެވިފައިވާ ކުޅުދުއްފުށީ ކައުންސިލުން ނެރުނު ބަޔާނުގައި އިތުރަށް ބުނެފައިވަނީ ކުރީ ސަރުކާރުން ކުޅުދުއްފުއްޓަށް އަމާޒުކޮށް މިއަހަރުތެރޭގައި ހިންގުމަށް ރާވާފައި ހުރި މަޝްރޫއުތައް ސަރުކާރު ބަދަލުވުމާއެކު ހުއްޓާލާފައިވާ ކަމަށެވެ.

ފެބްރުއަރީ 7 ވަނަ ދުވަހު ވެރިކަން ބަދަލުވިގޮތް ތަހުގީގުކުރުމަށް ސަރުކާރުން އިންކުއެރީ ކޮމިޝަނެއް އެކުލަވާލާފައިވާއިރު، އެކޮމިޝަންގެ ނިންމުންތަކާމެދު ސުވާލު އުފެދޭކަމަށް އެމްޑީޕީ އިން ދަނީ ބުނަމުންނެވެ.