މަސްތުވާތަކެތީގެ މައްސަލައެއްގައި ކުޅުދުއްފުށިން ދެ މީހަކު ފުލުހުން ހައްޔަރުކޮށްފި

އިބްރާހިމް ހަމީދު

މަސްތުވާތަކެތީގެ މައްސަލައެއްގައި ކުޅުދުއްފުށިން ދެ މީހަކު ރޭ ފުލުހުން ހައްޔަރުކޮށްފި އެވެ.

ފުލުހުންގެ މީޑިޔާ އޮފިޝަލް ސަބް އިންސްޕެކްޓަރ އޮފް ޕޮލިސް ހަސަން ހަނީފު ވިދާޅުވީ ފުލުހުންގެ އިންޓެލިޖެންސަށް ލިބުނު ރިޕޯޓަކާއި ގުޅިގެން ރޭ 11:35 ހާއިރު ކުޅުދުއްފުށީ “އާ ފިހާރަ” ކައިރިން ބިދޭސީއަކާއި ކުޅުދުއްފުށީގެ ޒުވާނަކު ހައްޔަރުކޮށްފައިވާ ކަމަށެވެ.

މަސްތުވާތަކެތިކަމަށް ޝައްކުކުރެވޭ ތަކެއްޗާއެކު ފުލުހުން ހައްޔަރުކޮށްފައިވަނީ ކުޅުދުއްފުށީ ވޭވީވޯރކް އުމުރުން 28 އަހަރުގެ މުހައްމަދު އަބްދުﷲ އާއި ކުޅުދުއްފުށީގައި މަސައްކަތްކުރާ ބިދޭސީ އެކެވެ.

ފުލުހުން ބުނީ އެ ދެމީހުންނަށް ޝައްކުކުރެވިގެން ބަލާ ފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައިވާ ރަބަރު ޕެކެޓެއް ފެނިފައިވާ ކަމަށާއި އެދެމީހުންގެ ޔޫރިން ޓެސްޓް ކުރިއިރު މަސްތުވާތަކެއްޗަށް ޕޮޒިޓިވް ވެފައިވާ ކަމަށެވެ. ފުލުހުން މިހާރު ގެންދަނީ އެމައްސަލަ އިތުރަށް ތަހުގީގު ކުރަމުންނެވެ.

ފަހަކަށް އައިސް ކުޅުދުއްފުށގައި މަސްތުވާތަކެތީގެ މައްސަލައާއި ވައްކަމުގެ މައްސަލަ ވަނީ އިތުރުވެފައި އެވެ. ކުޅުދުއްފުށީގައި ކުށްކުރުން އިތުރުވުމާއި ގުޅިގެން ފުލުހުން ހާއްސަ އޮޕަރޭޝަނެއް ވެސް މިމަހުގެ ކުރީކޮޅު ހިންގާފައިވެއެވެ.