އޯލެވެލް ޓޮޕް އެޗީވާރސް އަށް ކުޅުދުއްފުށިން ހޫނު މަރުހަބާއެއް ކިޔައިފި

.

މިދިޔަ އަހަރު ބޭއްވި އެސް.އެސް.ސީ އަދި ޖީސީއީ އޯލެވަލް އިމްތިހާނުގައި ބައިވެރިވެ އެންމެ ރަގަޅު ނަތީޖާ ހޯދި ދަރިވަރުންގެ ތެރޭގައި ހިމެނުނު ޖަލާލުއްދީން ސްކޫލްގެ ދަރިވަރުން ކުޅުދުއްފުއްޓަށް އައުމުން ސްކޫލްގެ ޕީޓީއޭ އާއި ސްކޫލް ބޯޑާއި މެނޭޖްމަންޓްގެ ފަރާތުން އެކުދިންނަށް ވަރަށް ހޫނު މަރުހަބާއެއް ކިޔައިފި އެވެ.

ހޯމަ ދުވަހުގެ ރޭ މާލޭގައި އޮތް އިނާމު ދިނުމުގެ ރަސްމިއްޔާތުގައި ބައިވެރިވުމަށް ފަހު ދަރިވަރުން ކުޅުދުއްފުއްޓަށް އައީ ކުޅުދުއްފުށީ ފާޅުބޯޓުގައި މިއަދު ހެނދުނު ހަޔެއް ޖަހާކަންހާއިރުއެވެ. އެދަރިވަރުން ކުޅުދުއްފުއްޓަށް އައުމުން މަރުހަބާ ކިޔުމަށް ސްކޫލުގެ ޕީޓީއޭގެ މެމްބަރުންނާއި ސްކޫލު ބޯޑުގެ މެމްބަރުންގެ އިތުރުން މެނޭޖްމަންޓްގެ ބޭފުޅުން ބަނދަރު މަތީގައި ތިއްބެވެ.

ޖަލާލުއްދީން ސްކޫލަށް ރީތި ނަން ހޯދައިދިން ދަރިވަރުން ކުޅުދުއްފުއްޓަށް ފޭބުމާއެކު، ޕީޓީއޭގެ ފަރާތުން ކޮންމެ ދަރިވަރަކަށާއި އެކުދިންނާއެކު ދަތުރު ކުރެއްވި ޕްރިންސިޕަލް ސައީދު އަހުމަދަށް މާބޮނޑިއެއް ހަދިޔާ ކުރިއެވެ. އަދި ވެލްކަމް ޑްރިންކެއް ދަރިވަރުންނަށް ދީފައިވެއެވެ.

ގައުމީ ފެންވަރުގައި އެންމެ ރަނގަޅު ނަތީޖާ ހޯދި ދަރިވަރުންގެ ތެރޭގައި ޖަލާލުއްދީން ސްކޫލުގެ 6 ދަރިވަރެއް ހިމެނުނެވެ. އޭގެ ތެރެއިން ޖަލާލުއްދީން ސްކޫލުގައި ކިޔެވި ހއ. މާރަންދޫ، ވީވަރު، ހުސައިން އަހުމަދު ވަނީ އަށް މާއްދާއިން އޭ ފާސް ހޯދައިގެން ރާއްޖޭގެ އެއްވަނަ ހޯދި ކުދިންގެ ތެރޭގައި ހިމެނިފައެވެ. ހުސައިން އަހުމަދު ގެ ފަހަތުން އަންސާނާ އާދަމް، ހިރިގާ، ހުދާ އާދަމް، ދުރުމީ، އަދި އަޘްމިޔާ މުހައްމަދު، މާޒީ، ވަނީ 4 ވަނައިގައި ހިމެނިފައެވެ. މީގެ އިތުރުން ނަތާޝާ އަލީ، ނާރެސް، 5 ވަނައިގައި ހިމެނުނު އިރު، ނަހުޒާ ހަސަން، ރިހިއަވި، ވަނީ 6 ވަނައިގައި ހިމެނިފައެވެ.

ޖަލާލުއްދީން ސްކޫލަކީ 1998 ވަނަ އަހަރު ކުޅުދުއްފުށީގައި ސަރުކާރުން ހުޅުވި ސްކޫލެކެވެ. މިސްކޫލްގެ ދަރިވަރުން އޯލެވަލް އަދި އޭލެވަލްގެ އެންމެ ރަގަޅު ނަތީޖާ ހޯދާ ދަރިވަރުންގެ ތެރޭގައި އަންނަނީ ކޮންމެ އަހަރަކުހެން ހިމެނެމުންނެވެ.