ކުޅުދުއްފުށީ ގެއަކުން ވަގަށް ނަގާފައިވާ ބައެއް ސާމާނު ފުލުހުން ހޯދައިފި

މިމަހުގެ 13 ވަނަ ދުވަހުގެ ރޭ ކުޅުދުއްފުށީ މެޑްރިޑްގެއިން ވަގަށް ނަގާފައިވާ ބައެއް ސާމާނު ފުލުހުން ހޯދައިފި އެވެ.

ފުލުހުން ބުނީ ކުޅުދުއްފުށީ މެޑްރިޑްގެއިން ވަގަށް ނަގާފައިވާ ބައެއް ސާމާނު ހޯދާފައިވަނީ އިއްޔެ ހިންގި ހާއްސަ އޮޕަރޭޝަނެއްގައި ކުޅުދުއްފުށީ ޕޮލިސް ސްޓޭޝަނުގެ ފުލުހުންކަމަށެވެ. އިއްޔެ ހިންގި އެ އޮޕަރޭޝަނުގައި، މެޑްރިޑް ގެއިން ވަގަށް ނަގާފައިވާ ލެޕްޓޮޕާއި މޯބައިލް ފޯނަކާއި އިލެކްޓްރޯނިކް ބައެއް ސާމާނާއި އެސްޓޭޝަނަށް ހުށަހެޅިފައިވާ އެހެން ދެމައްސަލައަކާ ގުޅޭ ބައެއް ތަކެތިވެސް ފުލުހުން ހޯދާފައިވެއެވެ.

އެތަކެތި ހޯދާފައިވަނީ ކުޅުދުއްފުށީ ވަލުތެރޭގައި ފޮރުވާފައި ހުއްޓާ ކަމަށް ފުލުހުން ބުނެއެވެ.

ފުލުހުންގެ މީޑިޔާއިން ނެރުނު ބަޔާނުގައި ބުނެފައިވާގޮތުން މިމައްސަލައާ ގުޅިގެން ހައްޔަރުކޮށްފައިވަނީ ކުޅުދުއްފުށީ ފްލަވަރމީޑް އުމުރުން 29 އަހަރުގެ އަބްދުﷲ ވަހީދު، ގުމްރީގެ އުމުރުން 18 އަހަރުގެ ޞަބާހް މުހައްމަދު އަދި ކުޅުދުއްފުށީ ދިލާޝާގެ 23 އަހަރުގެ އަބްދުﷲ އަލީ އެވެ.

މިމައްސަލަ މިހާރު ގެންދަނީ ކުޅުދުއްފުށީ ޕޮލިސް ސްޓޭޝަނުން އިތުރަށް ތަހުގީގު ކުރަމުންނެވެ. ދާދި ފަހުން ފުލުހުން ހިންގި ހާއްސަ އޮޕަރޭޝަނެއްގައި ކުޅުދުއްފުށީ ކަރަންކާގެ ތެރެއިންވެސް، ވަގަށް ނަގާފައިވާ ގިނަ އަދަދެއްގެ ސާމާނު ފުލުހުން ވަނީ ހޯދާފައި އެވެ.