އަވަސް އިންތިހާބަކަށް ގޮވާލާ އެމްޑީޕީ އިން ކުޅުދުއްފުށީގައި މުޒާހަރާ ކޮށްފި

.

އަވަސް އިންތިހާބަކަށް ގޮވާލާ އެމްޑީޕީ އިން ކުޅުދުއްފުށީގައި މުޒާހަރާ ކޮށްފިއެވެ.

ކުޅުދުއްފުށީ ބަންޑާރަ މައިދާނުގައި މިއަދު ހަވީރު 16:30 ހާއިރު ފެށި މިމުޒާހަރާގައި މައިގަނޑު ގޮތެއްގައި ގޮވާލާފައިވަނީ އަވަސް އިންތިހާބެއް ބޭއްވުމަށެވެ. އަދި ކޮމަންވެލްތް މިނިސްޓީރިއަލް އެކްޝަން ގުރޫޕުން ނެރެފައިވާ ބަޔާނަށް ތާއީދުކޮށް އެބަޔާނުގައިވާ ކަންތައްތަކަށް ސަރުކާރުން އިޖާބަދިނުމަށް ގޮވާލާފައި ވެއެވެ.

ކުޅުދުއްފުށީ ބަންޑާރަ މައިދާނުގައި ކުރިއަށް ދިޔަ މިމުޒާހަރާގައި ކުޅުދުއްފުށީ ކައުންސިލުގެ މެމްބަރުންނާއި ހދ އަތޮޅު ކައުންސިލުގެ ބައެއް މެމްބަރުންގެ އިތުރުން ކުރީ ސަރުކާރުގެ ސިޔާސީ މަގާމުތަކުގައި އިސްކޮށް އުޅުނު ބައެއް ބޭފުޅުންވެސް ބައިވެރިވެވަޑައިގަތެވެ.

މުޒާހަރާގައި ކުޅުދުއްފުށީ ކައުންސިލުގެ ރައީސް ދެއްކެވި ވާހަކައިގައި މީޑިޔާތަކުން ހަބަރު ފެތުރުމުގައި ހަމަހަމަ އުޞޫލެއް ގެންގުޅުމަށް ގޮވާލެއްވި އެވެ. އަދި ސީމެގުން އަންގާފައިވާ ފަދައިން އިންތިހާބެއް ބޭއްވުމަށް ގޮވާލެއްވި އެވެ.

މިއަދުގެ މުޒާހަރާގައި މަތިއުތުރު ސަރަހައްދުގެ ގައުމީ އިދާރާގެ ސްޓޭޓް ސެކްރެޓަރީގެ މަގާމުގައި ކުރިން ހުންނެވި ހަސަން ޒިޔާދުވެސް ވާހަކަ ދެއްކެވި އެވެ. އޭނާގެ ވާހަކައިގައި މިއަހަރުގެ ތެރޭގައި ކުޅުދުއްފުށީގައި 1 ބިލިއަން ރުފިޔާގެ ތަރައްޤީ މަޝްރޫއުތަކެއް ފެއްޓެވުމަށް ރާވާފައިވާ ކަމަށް ވިދާޅުވެ ސަރުކާރު ބަދަލުވުމުން އެކަމަށް ހުރަސްއެޅިފައިވާ ކަމަށް ވިދާޅުވި އެވެ.

މިއަދުގެ މުޒާހަރާގައި 200 އެއްހާ މީހުން ބައިވެރިވެފައިވާއިރު މާދަމާ އެމްޑީޕީ އިން ވެހިކަލް ބުރެއް ބާއްވާނެކަން ވަނީ އިއުލާނުކޮށްފައި އެވެ. މުޒާހަރާ ނިންމާލާފައިވަނީ 6 ޖެހުމާ ގާތްވެފައި ވަނިކޮށެވެ. މިއަދުގެ މުޒާހަރާގައި އެއްވެސް ހަމަނުޖެހުމެއް ހިނގާފައެއް ނުވެއެވެ.