ކުޅުދުއްފުށީގައި ހިނގި ނުރައްކާތެރި އެކްސިޑެންޓެއްގައި ޒުވާނަކު މަރުވެއްޖެ

13:40

އެކްސިޑެންޓުގައި ޒަހަމްވި އާދަމް ސިނާހު މާލެ ގެންދިއުމަށްޓަކައި ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫ އިން ނެރެފިއެވެ. މައުލޫމާތު ލިބިފައިވާ ގޮތުގައި ސިނާހާއެކު ކުޅުދުއްފުށީ ހޮސްޕިޓަލުގެ 2 ޑޮކްޓަރުންނާއި 2 ނަރުހުން މާލެ ދާނެއެވެ. އޭނާ މާލެ ފޮނުވަނީ މޯލްޑިވިއަންގެ ފުލައިޓަކުން ކަމަށް ހަބަރު ލިބެއެވެ.

11:00

ކުޅުދުއްފުށީ ރީޖަނަލް ހޮސްޕިޓަލްގައި މިހާރު ފަރުވާ ދެމުން އަންނަ އާދަމް ސިނާހްގެ އާއިލާއިން މައުލޫމާތު ދޭގޮތުގައި، އޭނާއަށް އިތުރު ފަރުވާ ދިނުމަށް މާލެ ގެންދިއުމުގެ މަސައްކަތް މިހާރު ކުރަމުން އަންނަ ކަމަށެވެ. އާދަމް ސިނާހް މިހާރު އޮތީ ކޯމާ އެއްގައެވެ.

10:05

އެކްސިޑެންޓްގައި މަރުވި ކުޅުދުއްފުށީ ދިއްތުނޑި، އަހުމަދު އިބްރާހިމްގެ އާއިލާގެ ފަރާތުން މަޢުލޫމާތު ދެއްވިގޮތުގައި، އޭނާގެ މައްޗަށް ކުރެވޭ ކަށުނަމާދު މިއަދު އަސްރު ނަމާދަށް ފަހު މަސްޖިދުލް ހަޟާރަތުގައި އޮންނާނެއެވެ.

10:00

ކުޅުދުއްފުށީ ރީޖަނަލް ހޮސްޕިޓަލް ހިންގުމާއި ހަވާލުވެގެން ހުންނެވި މުޙައްމަދު ޙަސަން ކުޅުދުއްފުށީ އޮންލައިން އަށް މަޢުލޫމާތު ދެއްވަމުން ވިދާޅުވީ، ދެވަނަ ޒުވާނާ މަރުވިކަމުގެ ހަބަރުތައް ފެތުރިފައި ވީކަމުގައި ވިޔަސް، އޭނާ މަރުވިކަމުގެ ރިޕޯޓެއް މިހާތަނަށް ލިބިފައި ނުވާކަމަށެވެ.

ޑޮކްޓަރުންގެ ޓީމަކުން މިހާރު އާދަމް ސިނާހް އަށް އަންނަނީ ފަރުވާ ދެމުންނެވެ. އަދި އޮޕަރޭޝަންއަކަށް ތައްޔާރު ވަމުންދާކަމަށް މަޢުލޫމާތު ލިބެއެވެ.

8:00

ކުޅުދުއްފުށީގައި ރޭ ފަތިހު ހިނގި އެކްސިޑެންޓެއްގައި ޒުވާނަކު މަރުވެއްޖެ އެވެ.

ރޭ ފަތިހު ހިނގި މިއެކްސިޑެންޓުގައި މަރުވެފައިވަނީ ކުޅުދުއްފުށީ ދިއްތުނޑި އުމުރުން 21 އަހަރުގެ އަހުމަދު އިބްރާހީމް އެވެ. މިހާދިސާގައި އަނިޔާވި އިތުރު ޒުވާނަކަށް ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫގައި އަންނަނީ ފަރުވާ ދެމުންނެވެ.

އައިސީޔޫގައި ފަރުވާ ދެމުން އަންނަނީ ކުޅުދުއްފުށީ ފޭރުގަސްދޮށުގެ އުމުރުން 18 އަހަރުގެ އާދަމް ސިނާހް އެވެ.

ފުލުހުންގެ މީޑިޔާ އޮފިޝަލް ވިދާޅުވީ ރޭ ހިނގި މި އެކްސިޑެންޓްގައި ދެމީހުންގެ ބޯފަޅައިގެން ގޮސް، ކަންފަތުންނާއި ނޭފަތުންވެސް ގިނަ ޢަދަދަކަށް ލޭ އައިސްފައިވާކަމަށެވެ. މި އެކްސިޑެންޓްގެ މަޢުލޫމާތު ޢާއްމު ފަރާތަކުން ފުލުހުންނަށް ދިނުމާއި ގުޅިގެން ހަމަ އެވަގުތު ފުލުހުން އެ ސަރަހައްދަށް ދިޔައިރު އެކަކު އޮތީ ސައިކަލުގެ ދަށުގައި ކަމަށާއި އޭރު އަނެކަކު އޮތީ ސައިކަލާއި 14 ވަރަކަށް ފޫޓު ދުރުގައި ކަމަށެވެ. އަދި އޭރު އެދެމީހުންވެސް ތިބީ ހޭނެތިފައި ކަމަށް ފުލުހުން ބުނެއެވެ.

ފުލުހުން މައުލޫމާތު ދޭ ގޮތުގައި، މިހާތަނަށް ބެލިބެލުމުން އެނގިފައިވަނީ، މި އެކްސިޑެންޓް ހިނގައިފައި ވަނީ އެ ދެމީހުން ދުއްވި ސައިކަލް ހދ. ކުޅުދުއްފުށި ހަވާނާގޭގެ ފާރުގައި ޖެހިގެންނެވެ.

(އިތުރު ފަތްސީލް)