ނޮޅިވަރަމުން ގެއްލުނު މީހާ ފެނިއްޖެ

.

އިބްރާހިމް ހަމީދު

ނޮޅިވަރަމުން ގެއްލިގެން ހޯދަމުންދިޔަ އަންހެން މީހާ މިރޭ އިރާކޮޅު ފެނިއްޖެ އެވެ.

މިއަދު ހެނދުނުން ފެށިގެން ނޮޅިވަރަމުން ގެއްލިގެން ހޯދަމުންދިޔަ އެރަށު ޒަމާނީވިލާ އުމުރުން 28 އަހަރުގެ އަޒުރާ އަބްދުއްލަތީފް ފެނިފައިވަނީ މިރޭ 6:30 ހާއިރު ކަމަށް ފުލުހުން ބުނެއެވެ.

ފުލުހުން ބުނީ އަޒުރާ ހޯދުމުގެ މަސައްކަތް އެރަށު ރައްޔިތުންނާއި ފުލުހުން ގުޅިގެން ކުރި މަސައްކަތުން އޭނާ ފެނިފައިވަނީ އެރަށު ކުޅިއަށް އެރި އުޅެނިކޮށް ކަމަށެވެ.

ނޮޅިވަރަމް ކައުންސިލުގެ ނައިބު ރައީސް ނާޒިމް ވިދާޅުވީ، އަޒުރާ އަށް މިހާރު އެރަށުގެ ސިއްހީ މަރުކަޒުން ފަރުވާ ދެމުން އަންނަ ކަމަށާއި މިވަގުތު އިތުރު މައުލޫމާތެއް ދެވެން ނެތްކަމަށެވެ.

ނަން ހާމަކުރުމަށް ނޭދޭ އެރަށު މީހަކު ކުޅުދުއްފުށީ އޮންލައިނަށް މައުލޫމާތު ދެމުން ބުނީ އަޒުރާ ގެއިން ނުކުމެގެން ދިޔައީ އޭނާގެ މަންމައާއި ދެމެދު ކުރެވުނު ޒުވާބަކަށްފަހުގައި ކަމަށެވެ. އަޒުރާ ގެއިން ނުކުމެގެން ދިޔައިރު އަޒުރާގެ ކުޑަ 2 ދަރިންވެސް އެގޭގައި ތިބިކަމަށް ނަންހާމަކުރުމަށް ނޭދޭ އެމީހާ ބުނިއެވެ.

ފުލުހުންގެ މީޑިޔާއިން ބުނީ އެމައްސަލަ އިތުރަށް ތަހުގީގު ކުރަމުން އަންނަކަމަށެވެ.

އަޒުރާ ގެއްލިގެން ހޯދަން ފަށާފައިވަނީ މިއަދު ހެނދުނު ގާތްގަނޑަކަށް 9:30 ހާއިރު އެވެ.