ގައުމީ އިދާރާތައް އުވާލައިފި

ކުރީ ސަރުކާރުން ރާއްޖޭގެ 7 ސަރަޙައްދުގައި އުފެއްދި 7 ޤައުމީ އިދާރާއާއި، އެ އިދާރާތަކުގެ ދަށުން ހިނގަމުންދާ ޤައުމީ އިދާރާގެ ޔުނިޓްތައް، ރައީސުލްޖުމްހޫރިއްޔާ މިއަދު އުވާލައްވައިފި އެވެ.

ރައީސް އޮފީހުން މިއަދު ނެރުނު ބަޔާނެއްގައި ބުނެފައިވަނީ ގައުމީ އިދާރާތަކާއި އެއިދާރާގެ ދަށުން ހިނގަމުން އައި ޔުނިޓުތައް އުވާލީ އެއޮފީސްތައް ވަކިން އުފެއްދުމުގެ ބަދަލުގައި ގާނޫނުއަސާސީގެ 8 ވަނަ ބާބާ ލާމަރުކަޒީގެ ގާނޫނުގައިވާ އުޞޫލުތަކުގެ ތެރެއިން ރާއްޖޭގެ އަތޮޅުތަކާއި ރަށްތައް ހިންގުމަށް މަގުފަހި ކުރުމަށްޓަކައި ކަމަށެވެ.

ގައުމީ އިދާރާތައް މެދުވެރިކޮށް މިނިސްޓްރީތަކުން ހިދުމަތްތައް ދިނުމުގައި މުއާމަލާތު ކުރުމުގެ މަގު ދިގުވެ، ވިލަރެސް ކުރުމުގައި ބައެއް ދަތިތައް ދިމާވަމުން އަންނަ ކަމަށާއި ކައުންސިލުތަކުން ސީދާ ސަރުކާރުގެ ވުޒާރާތަކާއި ގުޅިގެން ކަންކަން ނިންމައި ރައްޔިތުންނާ ވީހާވެސް ގާތުން ހިދުމަތް ދެވޭނެ އިންތިޒާމެއް ހަމަޖެއްސުމަކީ ވެސް ގައުމީ އިދާރާ އުވާލުމުގެ މުހިއްމު ސަބަބެއް ކަމަށް ރައީސް އޮފީހުން ބުނެއެވެ.

ގައުމީ އިދާރާތައް އުވާލުމާއެކު އެއިދާރާތަކަށް ރައީސުލްޖުމުހޫރިއްޔާ ހަވާލުކުރައްވާފައިވާ މަސައްކަތްތަކާއި އެފަދަ އިދާރާތައް މެދުވެރިކޮށް ސަރުކާރުގެ ވުޒާރާތަކުން ކުރަމުން ގެންދާ މަސައްކަތްތައް ލާމަރުކަޒީ ގާނޫނުގައިވާ ގޮތުގެ މަތިން ލޯކަލް ކައުންސިލްތަކާއެކު ވެވޭ އެއްވެސްވުންތަކެއްގެ ދަށުން ކައުންސިލްތަކާއި ހަވާލުކޮށްގެން ހިންގުމަށް ސަރުކާރުން ވަނީ ނިންމާފައި އެވެ.