ބަޖެޓް ލިބުމުގައި ދަތިތަކެއް ކުރިމަތި ވަމުން އެބަދޭ: ޖަލާލުއްދީން ސްކޫލް

.

– ރިޕޯޓުތައް ހުށަހަޅަންޖެހޭ ތާރިޚުގައި ފޮނުވާނަމަ، ބަޖެޓް ހުންނަންވާނީ ލިބިފައި: ޑެޕިއުޓީ މިނިސްޓަރ

ބަދުރުއްދީން ޙަސަން

2012 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގެ ތެރެއިން ޖަލާލުއްދީން ސްކޫލަށް ކަނޑައެޅިފައިވާ ބަޖެޓް ލިބުމުގައި ދަތިތަކެއް ކުރިމަތި ވަމުންދާ ކަމުގައި ޖަލާލުއްދީން ސްކޫލުން ބުނެފިއެވެ.

ކުޅުދުއްފުށީ އޮންލައިން އަށް މަޢުލޫމާތު ދެއްވަމުން ޖަލާލުއްދީން ސްކޫލުގެ ޕްރިންސިޕަލް ސަޢީދު އަހުމަދު ވިދާޅުވީ، މަހުން މަހަށް މުސާރަ ފައިސާ ޖަމާކޮށްދެވަމުން ދިޔަކަމުގައި ވިޔަސް، އެސްކޫލަށް ބަޖެޓް ލިބުމުގައި ދަތިތަކެއް ދިމާވަމުންދާ ކަމަށެވެ.

“މަހުން މަހަށް މުސާރަ ލިބޭ. ނަމަވެސް ބަޖެޓް ލިބުމުގައި ވަރަށް ދަތި. ވަރަށް ދަތިކޮށް ހިނގަމުންދަނީ.” ސަޢީދު ވިދާޅުވިއެވެ. “ނަމަވެސް އެޑިއުކޭޝަން މިނިސްޓްރީ އިން މަސައްކަތް ކުރައްވަމުން އެބަ ގެންދަވާ ފިނޭންސް މިނިސްޓްރީ އާގުޅިގެން އަރަމުންދާ އެރަރސް ތައް ހައްލުވޭތޯ.”

މަތިއުތުރު ސަރަހައްދުގައި ގާއިމުކޮށްފައިވާ އެޑިއުކޭޝަން ޔުނިޓް އިން މަޢުލޫމާތު ދެއްވި ގޮތުގައި ރާއްޖޭގެ ސްކޫލުތަކުގެ ތެރެއިން ޖަލާލުއްދީން ސްކޫލަކީ “އޮޓޮނޮމަސް” ސްކޫލެކެވެ. އެފަދަ 10 ސްކޫލެއް މިސަރަހައްދުގައި ހިމެނެއެވެ. އަދި އެފަދަ ސްކޫލުތަކުގެ ބަޖެޓްގެ ކަންތައް ބަލަހައްޓަވަމުން ގެންދަވަނީ ސީދާ މިނިސްޓްރީ އާއި ގުޅިގެން ކަމަށް އެޔުނިޓް ހަވާލުވެގެން ހުންނެވި އިބްރާހިމް ރަޝީދު މަޢުލޫމާތު ދެއްވިއެވެ. އޭނާ އިތުރުރަށް ވިދާޅުވީ، ސަރަހައްދުގައި ހުރި އެހެން ސްކޫލުތަކަށް (މޮޓޮނޮމަސް ސްކޫލު ތަކަށް) ބޭނުންވާ ބަޖެޓް ހަމަޖައްސުމުގެ މަސައްކަތް ކުރަނީ ޔުނިޓުން ކަމަށާއި ބަޖެޓް ދިނުމުގައި އެއްވެސް ދައްޗެއް އަރާފައި ނުވާކަމަށެވެ.

މިކަމާ ބެހޭގޮތުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އިބްރާހިމް އިސްމާއިލް ވިދާޅުވީ، ސްކޫލުތަކުން ނިންމަން ޖެހޭ ކަންތައްތައް ނިންމާފައި ހުންނަ ނަމަ، ބަޖެޓް ލިބޭނެ ކަމަށާއި އެމިނިސްޓްރީ އިން އެއްވެސް ސްކޫލެއްގެ ބަޖެޓް ހިފަހައްޓާފައި ނުވާނެ ކަމަށެވެ.

“ޖަލާލުއްދީން ސްކޫލަކީ ބޮޑެތި ސްކޫލުތަކުން ސްކޫލެއް. އެފަދަ ސްކޫލަކަށް މިހާތަނަށް އަންނަ އިރު ބަޖެޓް ހުންނަން ވާނީ، ރަނގަޅަށް ދާނަމަ ލިބިފައި.” އިބްރާހިމް އިސްމާއިލް ވިދާޅުވިއެވެ.

ޑެޕިއުޓީ މިނިސްޓަރ އިތުރަށް ވިދާޅުވީ، ބައެއް ސްކޫލުތަކަށް ބަޖެޓް ނުލިބި ލަސްވާ އެއް ސަބަބަކީ އެސްކޫލުތަކުން ނިންމަން ޖެހޭ ވޭތުވެދިޔަ އަހަރުގެ ހިސާބުތައް ނިންމާފައި ނުފޮނުވާތީއެވެ. އެޑިއުކޭޝަން މިނިސްޓްރީ އަކީ އޮޑިޓަރ ޖެނެރަލް އަށް ޖަވާބުދާރީ ވާންޖެހޭ ތަނަކަށް ވާހިނދު، ސްކޫލުތަކުން ހިސާބުތައް ނިންމާފައި ފޮނުވަން ޖެހޭ މުއްދަތުގައި ނުފޮނުވާކަން ޑެޕިއުޓީ މިނިސްޓަރ ފާހަގަ ކުރެއްވިއެވެ.

މަތިއުތުރު އެޑިއުކޭޝަން ޔުނިޓުން މިނޫހަށް މަޢުލޫމާތު ދީފައިވާ ގޮތުގައި، ޖެނުއަރީ މަހުގެ 25 ވަނަ ދުވަހުގެ ކުރިން ޖަލާލުއްދީން ސްކޫލުން ފޮނުވަން ޖެހޭ ބައެއް ރިޕޯޓްތައް ބައެއް ސަބަބު ތަކާހުރެ، ފޮނުވުން ވަނީ ލަސްވެފައެވެ. ނަމަވެސް ފެބްރުއަރީ މަހުގެ ތެރޭގައި އެރިޕޯޓްތައް ފޮނުވާ ނިންމާފައިވާ ކަމަށް އެފަރާތުން މަޢުލޫމާތު ދިނެވެ. ނަމަވެސް އަދިވެސް ބަޖެޓް ލިބުމުގައި ޖަލާލުއްދީން ސްކޫލަށް ދަތިތައް ދިމާވަމުންދާކަން އޭނާވެސް ފާހަގަ ކުރެއްވިއެވެ.