އަމީރުއަމީން ސްކޫލުގެ “މަލަސް 2012” ފެށިއްޖެ

އިބްރާހިމް ހަމީދު

އަމީރު އަމީން ސްކޫލުން ކޮންމެ އަހަރަކުވެސް ބާއްވަމުން އަންނަ “މަލަސް” ޝޯ އިއްޔެ ހަވީރު ފަށައިފިއެވެ.

ކުޅުދުއްފުށީގައި ހުރި އެންމެ ދުވަސްވީ ޕްރީ ސްކޫލު ކަމަށްވާ އަމީރު އަމީން ސްކޫލުގެ މިއަހަރުގެ ޝޯ އާބެހޭގޮތުން އެ ސްކޫލު ލީޑިންގ ޓީޗަރ ސާދުނާ އިބްރާހިމް ވިދާޅުވީ މަލަސް ޝޯގެ ނަމުގައި ކޮންމެ އަހަރަކު ޝޯއެއް ބޭއްވުމުގެ އެންމެ ބޮޑު މަގްޞަދަކީ ކުދިންނަށް އެކުދިންގެ ހަރަކާތް ތައް ސްޓޭޖްމަތިން ދައްކާލުމަށް ފުރުޞަތެއް ދިނުން ކަމަށެވެ. އަދި ޕްރައިމަރީ ގުރޭޑް ތަކަށް ދިއުމުގެ ކުރިން އެކުދިންގެ މެދުގައި އިޖްތިމާއީ ހުނަރު އަށަގެންނެވުމާއެކު އެހުނަރުތަކަށް ހޭލުންތެރިކުރުވުން ކަމަށެވެ.

އަމީރު އަމީން ސްކޫލުގެ މިއަހަރުގެ މަލަސް ޝޯ ކުރިއަށްދާނީ މިއަދުގެ ނިޔަލަށެވެ. 10 ރުފިޔާއަށް ޓިކެޓް ވިއްކައިގެން ބާއްވާ މިޝޯގައި ސްކޫލުގެ އެކިއުމުރުފުރާއިން 99 ދަރިވަރުން 27 އައިޓަމްގެ ކުޅިވަރުތައް ހުށައަޅައިދޭނެ ކަމަށާއި ދެދުވަހުގެ މުއްދަތަށް ބާއްވާ މިޝޯގެ ހުރިހާ ޓިކެޓެއްވެސް ވިކިފައިވާކަމަށް އެސްކޫލުން މައުލޫމާތު ދެއެވެ. އަމީރުއަމީން ސްކޫލުގެ މަލަސް 2012 މިއަހަރު ބާއްވަނީ ލޭންގުއޭޖް ލާރނިން ސެންޓަރުން ސްޕޮންސަރ ކޮށްގެންކަމަށް ސާދުނާ މުހައްމަދު ވިދާޅުވިއެވެ.

އިއްޔެ ހަވީރު ކުޅުދުއްފުށީ ތިލަދެކުނު ސިނަމާގެ ހޯލްގައި ބޭއްވި ޝޯ ޝަރަފްވެރިކޮށްދެއްވީ ލޭންގުއޭޖް ލާރނިން ސެންޓަރުގެ މެނޭޖިންގ ޑިރެކްޓަރު މިސްޓަރ ޝައިމަންއެވެ.