އަފީފުއްދީން ސްކޫލުގެ 2011 ވަނަ އަހަރުގެ އިނާމު ދިނުމުގެ ޖަލްސާ ބާއްވައިފި

އިބްރާހިމް ހަމީދު

އަފީފުއްދީން ސްކޫލުގެ 2011 ވަނަ އަހަރުގެ އަހަރީ އިނާމް ދިނުމުގެ ޖަލްސާ ބާއްވައިފި އެވެ.

މިއަދު ހެނދުނު އަފީފުއްދީން ސްކޫލުގައި ބޭއްވި އަހަރީ އިނާމު ދިނުމުގެ ޖަލްސާ ޝަރަފުވެރި ކޮށްދެއްވީ ދިވެހިރާއްޖޭގެ ގައުމީ ޔުނިވަރސިޓީގެ ލެކްޗަރާ މުހައްމަދު ހުސެއިން އެވެ. މިޖަލްސާގައި މިދިޔަ އަހަރު އެސްކޫލުގެ އެންމެ މޮޅު ދިހަ ދަރިވަރުން ހޮވާ އިނާމު ދީފައިވެއެވެ.

ކުޅުދުއްފުށީގައި ދެވަނަ އަށް ހުޅުވި ޕުރައިމަރީ ސްކޫލުގެ ފާއިތުވި އަހަރު ހުރިހާ ގޮތަކުން އެެންމެ މޮޅު ދަރިވަރުންނަށް ހޮވިފައިވަނީ، އިނާޔަތު މުހައްމަދު، އަލީފާ އަލީ ނަޢީމް، ލަޔާލް އަދުހަމް، ޔުމްނާ ހުސެއިން، ޝާދިޔާ ޖައުފަރު، ރަޝީދާ މުހައްމަދު، މުހައްމަދު ޒިޔާން އަބްދުއްސައްތާރު، ނައުފަލް އަހްމަދު، އާމިނަތު އަޒީލާ އަހްމަދު އަދި އާދަމް އަހްމަދުއެވެ.

މިއަދުގެ ޖަލްސާގައި ޝަރަފުވެރި މެހެމާން ދަރިވަރުންނާއި މުހާތަބުކޮށް ދެއްކެވި ވާހަކަފުޅުގައި ދަރިވަރުން މިއަދު ހޯއްދެއްވި ކާމިޔާބީގެ މައްޗަށާއި އަދި ކުރިއަށް އޮތްތަނުގައިވެސް ކާމީޔާބީ ހާސިލް ކުރުމަށް ދަރިވަރުންނަށް ނަސޭހަތްތެރިވި އެވެ.

2011 ވަނަ އަހަރު އަފީފުއްދީން ސްކޫލު ހިނގައި ދިޔަ ގޮތުގެ ރިޕޯޓް އިއްވަވައި ދެއްވީ އެސްކޫލުގެ ޕްރިންސިޕަލް އާދަމް މޫސާ އެވެ. އެ ރިޕޯޓުގައި ސްކޫލުގެ ދަރިވަރުން ހޯދަމުންދާ ކާމިޔާބުތަކުގެ މައްޗަށާއި ހުސްވި އަހަރު އެސްކޫލަށް ލިބުނު ބަޖެޓާއި ކުރެވުނު ހަރަދުތަކުގެ މައްޗަށް އަލިއަޅުވާލާ ވާހަކަފުޅު ދެއްކެވި އެވެ.

ޖަލްސާގައި އެކިއެކި ގްރޭޑްތަކުގެ ދަރިވަރުންނަށް އިނާމް ބައްސަވައި ދެއްވީ ހދ. އަތޮޅު ކައުންސިލްގެ ރައީސް މުހައްމަދު ޝުކޫރު އާއި ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒުގެ އިތުރުން ދިވެހިރާއްޖޭގެ ގައުމީ ޔުނިވާރސިޓީގެ ލެކްޗަރާ މުހައްމަދު އުމަރުއާއި އެޑިޔުކޭޝަން މިނިސްޓްރީގެ ސްޕްރިންޑެންޓް އިބްރާހިމް ރަޝީދު އެވެ. އަދި ހާއްސަ ވަނަތަކަށާއި ގުރޭޑް 8 ގެ ދަރިވަރުންނަށް އިނާމް ބައްސަވައި ދެއްވީ ޝަރަފްވެރި މެހެމާން ދިވެހިރާއްޖޭގެ ގައުމީ ޔުނިވާރސިޓީގެ ލެކްޗަރާ މުޙައްމަދު ހުސެއިންނެވެ.

ޖަލްސާގައި މަރުހަބާ އާއި ޝުކުރު ދެއްނެވީ ގްރެޖުއޭޓް ލީޑިން ޓީޗާރ އަޙްމަދު ހުސައިންއެވެ. ދަރިވަރުންގެ ޝުޢޫރުފާޅުކުރީ ސްކޫލުގެ ކެޕްޓަން މުހައްމަދު އަރުޝަމް އާއި ސްކޫލުގެ އިސްދަރިވަރުންނެވެ. ޖަލްސާ ނިމިގެންދިޔައީ ސްކޫލުގެ ލަވައިންނެވެ.