މެރިޓައިމް އެކަޑެމީން ބޭސިކް ސޭފްޓީ ޓްރެއިނިންގެ އިތުރު ހަތަރު ކޯހެއް ފަށަނީ

.

ކުޅުދުއްފުށީ ގައި ހުންނަ މެރިޓައިމް އެކަޑެމީ އޮފް މޯލްޑިވްސް އިން މޭ މަހުގެ ތެރޭގައި ހަތަރު ކޯހެއް ހިންގުމަށް ހަމަޖައްސައިފިއެވެ.

ބޯޓު ދަތުރު ކުރަން ދާން ޝަޢުގުވެރިވާ ފަރާތްތަކަށް ތަފާތު ކޯސްތަކެއް ހިންގަމުން އަންނަ މެރިޓައިމް އިން މިފަހަރު ހިންގުމަށް އިއުލާން ކޮށްފައިވަނީ ބޭސިކް ސޭފްޓީ ޓްރެއިނިންގެ ހަތަރު ކޯހެވެ. އެއީ އެލިމެންޓަރީ ފަސްޓް އެއިޑް ކޯހާއި ފަޔަރ ޕްރިވެންޝަން އެންޑް ފަޔަރ ފައިޓިންގ ކޯހާއި، ޕާސަނަލް ސަވައިވަލް ޓެކްނިކްސް ކޯހާއި ޕާސަނަލް ސޭފްޓީ އެންޑް ސޯޝަލް ރެސްޕޮންސިބިލިޓީ ކޯހެވެ.

ކުޅުދުއްފުށީ އޮންލައިން އަށް މަޢުލޫމާތު ދެއްވަމުން މެރިޓައިމް އެކަޑެމީގެ ސީއީއޯ އާދިލް ރަޝީދު ވިދާޅުވީ، މިއިން ކޮންމެ ކޯހެއްގައި ވެސް ވިހި ޖާގަ ހުޅުވިފައި ވާކަމަށާއި، ސްކޫލު ނިންމާފައި ތިބޭ ކުދިންނަށް އިސްކަންދޭނެ ކަމަށެވެ.

މެއި މަހުގެ 6 ން 17 އަށް ކުރިއަށް ގެންދާ ވިހި ދުވަހުގެ މުއްދަތުގެ ކުރު ކޯސްތަކަށް ކުރިމަތި ލުމުގެ ސުންގަޑިއަކީ 3 މެއި 2012 ވަނަ ދުވަހުގެ މެންދުރު ފަހު 2 ޖަހާއިރު އެވެ. އެއެކަޑެމީއިން އެއްވެސް ފީއެއް ނުނަގައި ހިންގައި މިކޯސްތަކުގައި ކިޔަވައިދެނީ އިނގިރޭސި ބަހުންނެވެ.