އެކްސިޑެންޓްގައި އަނިޔާވި ދެވަނަ ޒުވާނާވެސް މަރުވެއްޖެ

މިމަހުގެ 23 ވަނަ ދުވަހު ކުޅުދުއްފުށީގައި ހިނގި ނުރައްކާތެރި އެކްސިޑެންޓްގައި ޒަހަމްވި ކުޅުދުއްފުށީ ފޭރުގަސްދޮށުގެ އާދަމް ސިނާހު، 18، މިއަދު ހެނދުނުގެ ވަގުތެއްގައި މަރުވެއްޖެ އެވެ.

ނުރައްކާތެރި މި އެކްސިޑެންޓްގައި އާދަމް ސިނާހުއަށް ލިބުނު އަނިޔާތަކަށް ކުޅުދުއްފުށީ ރީޖަނަލް ހޮސްޕިޓަލުން ފަރުވާ ދިނުމަށްފަހު ހަމަ އެދުވަހުގެ ވަގުތެއްގައި މާލެ ގެނެސް އައިޖީއެމް ހޮސްޕިޓަލުގައި ފަރުވާ ދޭން ފެށިއެވެ. އޭނާ މަރުވިއިރުވެސް ފަރުވާ ދެމުން ދިޔައީ އައިޖީއެމް ހޮސްޕިޓަލުގެ އައިސީޔޫގައި އެވެ. ކުޅުދުއްފުށީ ރީޖަނަލް ހޮސްޕިަޓަލުން އޭރު ބުނެފައިވަނީ ސިނާހު އޮތީ ކޯމާއެއްގައި ކަމަށެވެ.

މިމަހުގެ 23 ވަނަ ދުވަހު ހިނގި މިއެކްސިޑެންޓްގައި ވަނީ ކުޅުދުއްފުށީ ދިއްތުނޑި އަހުމަދު އިބްރާހީމް، 21 ވެސް މަރުވެފައި އެވެ. އަހުމަދު އިބްރާހީމް މަރުވެފައިވަނީ އެކްސިޑެންޓް ހިނގި ދުވަހު އެވެ.

ފުލުހުން ކުރިން ބުނެފައިވަނީ ، މި އެކްސިޑެންޓް ހިނގައިފައި ވަނީ އެ ދެމީހުން ދުއްވި ސައިކަލް ހދ. ކުޅުދުއްފުށި ހަވާނާގޭގެ ފާރުގައި ޖެހިގެން ކަމަށެވެ.