ހެލްތް ކޯޕަރޭޝަންތައް އުވާލުމަށް ސަރުކާރުން ނިންމައިފި

.

ހެލްތް ސަރވިސަސް ކޯޕަރޭޝަންތައް އުވާލުމަށާއި އެކޯޕަރޭޝަންތަކުގެ ދަށުން ހިންގަމުންއައި ސިއްހީ ހިދުމަތްދޭ މަރުކަޒުތައް ހެލްތް މިނިސްޓްރީގެ ދަށަށް ބަދަލުކުރުމަށް ސަރުކާރުން މިއަދު ނިންމައިފި އެވެ.

ސަރުކާރުން މިގޮތަށް ނިންމާފައިވަނީ މިއަދު ބޭއްވި ވަޒީރުންގެ މަޖިލީހުގެ ޖަލްސާގައި ކަމަށް ރައީސް އޮފީހުން މައުލޫމާތު ދެއެވެ. ސިއްހީ ހިދުމަތްތައް ކޯޕަރޭޓް އުޞޫލުން ހިންގުމަށްޓަކައި ކުރީ ސަރުކާރުން އުފައްދާފައި ހުރި ހެލްތް ކޯޕަރޭޝަންތައް އުވާލަން ނިންމި މިއަދުގެ ޖަލްސާގައި ވަޒީރުން ދެއްކެވި ވާހަކަފުޅުގައި ކޯޕަރޭޓް އުޞޫލުން ޞިއްޙީ ޚިދްމަތް ދިނުމުގައި، ވޭތުވެދިޔަ ތިން އަހަރުގެ ތަޖްރިބާއަށް ބަލާއިރު، އެންމެ އެކަށީގެންވާ ގޮތުގައި، ޞިއްޙީ ޚިދްމަތް ފޯރުކޮށްދިނުމުގައި، ގިނަ މައްސަލަތަކެއް ކުރިމަތިވެފައިވާކަން ފާހަގަކުރެވޭ ކަމަށް ވިދާޅުވި އެވެ.

ރައީސް އޮފީހުން ނެރެފައިވާ ބަޔާނުގައި އިތުރަށް ބުނެފައިވަނީ، ހެލްތް ސަރވިސަސް ކޯޕަރޭޝަންތަކުގެ ބޯޑްތައް ޢައްޔަން ކުރެއްވުމަށް ކަނޑައެޅިފައިވާ ދާއިރާތަކާއި، ޝަރުޠުތައް ފުރިހަމަވާ ގޮތަށް ބޯޑްތައް އެކުލަވައިލެވިފައި ނުވުމާއި، ހެލްތް ސަރވިސަސް ކޯޕަރޭޝަންތަކުގެ ބޯޑްތަކުގެ މެންބަރުން އަވަސް އަވަހަށް ބަދަލުވުމާއި، ކުންފުނި ހިންގުމުގެ އުޞޫލުތައް ތަފާތުވެ، އެއްގޮތް ކުރެވިފައި ނުވުމާއި އަދި ޞިއްޙީ ޚިދްމަތްފަދަ ޚިދްމަތެއް ހިންގުމުގެ ތަޢުލީމާއި ތަޖްރިބާ ނެތް ފަރާތްތަކާ ޙަވާލުކުރުމުގެ ސަބަބުން ދިމާވެފައިވާ ދަތިތައް ހިމެނޭ ކަމަށެވެ.

ހެލްތް ކޯޕަރޭޝަންތައް އުވާލުމުގެ މަސައްކަތް ކުރިއަށްގެންދާނީ، ކަނޑައެޅިފައިވާ ޤާނޫނާއި ގަވާއިދުގެ ތެރެއިން ބަލަންޖެހޭ ކަންކަން ބެލުމަށްފަހުގައި ކަމަށްވެސް ވަޒީރުންގެ މަޖިލީހުން ނިންމެވި އެވެ.

ސަރުކާރުން ހެލްތު ކޯޕަރޭޝަންތައް އުވާލަން ނިންމިއިރު މީގެ ދެމަހެއްވަރު ކުރިން އެކޯޕަރޭޝަންތަކުގެ ބޯޑު މެމްބަރުންވަނީ މަގާމުން ވަކި ކޮށްފައި އެވެ.