ރައީސުލްޖުމްހޫރިއްޔާ ކުޅުދުއްފުއްޓަށް ވަޑައިގަތުމުން އެމްޑީޕީގެ ސަޕޯޓަރުން ހަމަނުޖެހުން ހިންގައިފި

ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު ވަހީދު ހަސަން މަނިކް ކުޅުދުއްފުއްޓަށް ވަޑައިގަތުމުން އެމްޑީޕީގެ ސަޕޯޓަރުން ހަމަނުޖެހުން ހިންގައިފި އެވެ.

ތިލަދުންމަތީގެ ބައެއް ރަށްތަކަށް ކުރަށްވަމުން ގެންދަވާ ރަސްމީ ދަތުރުފުޅުގައި، ރައީސް ވަހީދު މިއަދު ކުޅުދުއްފުށީ ޕޯޓް ލިމިޓެޑް ގެ ބަނދަރަށް ފައިބައިވަޑައިގަތުމާއެކު އެމްޑީޕީގެ ދިދަތަކާއި ޝުއޫރުތައް ލިޔެފައިވާ  ބެނާތައް ހިފައިގެން ތިބި  އެ ޕާޓީގެ ސަޕޯޓަރުން ވަނީ، އަޑުގަދަކޮށް ޝުއޫރު ފާޅުކުރަން ފަށާފައެވެ. އަދި މަރުހަބާ ދެންނެވުމަށް ހާޒިރުވެތިބި މީހުންނާ ސަލާމް ކުރެއްވުމަށްފަހު ކާރުކޮޅާ ހަމައަށްހިންގަވާފައި ވަޑައިގެންނަވަނިކޮށް އެމީހުންވަނީ ރައީސް އަށް ހުރަސް އެޅުމަށް މަސައްކަތް ކޮށްފައެވެ. އަދި ސެކިއުރިޓީގެ އެހީގައި ކާރުކޮޅަށް އަރާވަޑައިގަތުމާއެކު، އެމްޑީޕީގެ ސަޕޯޓަރުން ވަނީ ކާރު ފަހަތުން ދުއްވައިގަނެފައެވެ. އަދި ޕޮލިހުން މަގު ބަންދުކޮށްފައި އޮތުމުން އެމީހުން ވަނީ ފުލުހުންނާއި ކުރިމަތިލުމަކަށް ގޮސް މާރާމާރީ ހިންގާފައެވެ.

ރައީސް ކާރުކޮޅުގައި ވަޑައިގެންނެވީ ގައުމީ އިދާރާ ކުރިން ހިންގެވި އިމާރާތަށެވެ. އޭރުވެސް ބަނދަރު ސަރަހައްދުގައި އެމްޑީޕީގެ ސަޕޯޓަރުން ޝުއޫރު ފާޅުކުރަމުން ދިޔައެވެ. އަދި ޕީޕީއެމް އަށް ނިސްބަތްވާ ސަޕޯޓަރުން ތަކަކާއެކު ހަމަނުޖެހުމަކަށް ދިޔަތަންވެސް ފެނިފައި ވެއެވެ. ބައެއް މީހުން ވެއްޓި، ކުދިކުދި އަނިޔާ ލިބުންކަމުގައި ވިޔަސް އެއްވެސް މީހަކަށް ބޮޑު އަނިޔާ އެއް ވެފައިވާކަމުގެ ރިޕޯޓެއް ލިބިފަިއިވެއެވެ. ގައުމީ އިދާރާ ހިންގި ހިމާރާތުގައި މިހާރު ރައީސް ހުންނެވި އިރު، އެސަރަހައްދު ފުލުހުންވަނީ އެއްކޮށް ބަންދުކޮށް ސެކިއުރިޓީ ވަރުގަދަކޮށްފައެވެ.

ތިލަދުންމަތީގެ ބައެއް ރަށްތަކަށް ކުރަށްވަމުން ގެންދަވާ ރަސްމީ ދަތުރުފުޅުގައި، ރައީސް ވަހީދު މިއަދު ކުޅުދުއްފުއްޓަށް ވަޑައިގަންނަވާތީ ކުޅުދުއްފުށީ ޕޯޓް ލިމިޓެޑްގެ ބަނދަރު ސަރަހައްދަށް ގާތްގަނޑަކަށް ފައްސަތޭކަ އެއްހައިމީހުން އެއްވެ ތިއްބެވެ. އަދި އެމީހުން ވަނީ ރަތް ދޫލައިގެ މަރުހަބާއެއް ކިޔާފައެވެ. އަދި ސަރުކާރު ބައެއް އިދާރާ ތަކުގެ އިސްވެރިން މަރުހަބާ ދެންނެވުމަށް އެސަރަހައްދަށް ގޮސްތިއްބެވެ. ނަމަވެސް ކުޅުދުއްފުށީ ކައުންސިލްގެ އެއްވެސް މެމްބަރެއް މަރުހަބާ ދެންނެވި މީހުންގެ ތެރޭގައި ނުހިމެނޭކަން ފާހަގަ ކުރެވެއެވެ. އަދި އަތޮޅު ކައުންސިލްގެ ޑީއާރުޕީ މެމްބަރު ފިޔަވާ އެހެން މެމްބަރެއް ވެސް މަރުހަބާ ދެންނެވުމަށް ގޮސްފައިނުވާކަން ފާހަގަ ކުރެވެއެވެ. ކުޅުދުއްފުށީ ކައުންސިލްގެ މެމްބަރުންގެ ތެރެއިން ނައިބު ރައީސް ފާރޫގު މުހައްމަދާއި  އަހުމަދު އަލީ ވަނީ އެމްޑީޕީ ސަޕޯޓަރުންނާއެކު ނުރުހުން ފާޅުކުރުމުގައި ބައިވެރިވެފައެވެ. ނުރުހުން ފާޅުކުރުމަށް އެސަރަހައްދަށް އެއްވެތިބި އެމްޑީޕީ މީހުންގެ އަދަދު 150 ހާ ގާތްކުރާނެއެވެ.