ދިރާގު ބްރޯޑްބޭންޑް ރޯޑް ރޭހުގައި މިއަހަރު ވެސް ޖަލާލުއްދީން ސްކޫލު ބައިވެރިވާނެ

.

ދިރާގު ބްރޯޑްބޭންޑް ރޯޑް ރޭހުގައި ސްކޫލުތަކުގެ ކެޓަގަރީ އިން މިދިޔަ އަހަރު އެއްވަނަ ހޯދި ކުޅުދުއްފުށީ ޖަލާލުއްދީން ސްކޫލުން މިއަހަރު ވެސް ދިރާގު ރޯޑު ރޭހުގައި ބައިވެރިވާނެ ކަމަށް އެސްކޫލުން ބުނެފިއެވެ.

ކުޅުދުއްފުށީ އޮންލައިނުން ދެންނެވި ސުވާލަކަށް ޖަވާބު ދެއްވަމުން ޖަލާލުއްދީން ސްކޫލުގެ ޕްރިންސިޕަލް ސަޢީދު އަހުމަދު ވިދާޅުވީ، މިއަހަރުވެސް މި ރޭހުގައި ޖަލާލުއްދީން ސްކޫލުން ވާދަކޮށް ރަނގަޅު ނަތީޖާއެއް ހޯދޭނެ ކަމަށް އުއްމީދު ކުރަށްވާ ކަމަށެވެ.

“މިއަހަރު ވެސް ބައިވެރިވާގޮތަށް މިތިބީ. އަދި ކާމިޔާބަކަށް ވެސް އުއްމީދު ކުރަން.” ސަޢީދު އަހުމަދު ވިދާޅުވި އެވެ. “މިދިޔަ އަހަރަށް ވުރެ ވަކި ދެރައެއް ނުވާނެކަމަށް އުއްމީދު ކުރަން.”

މިދިޔަ އަހަރުގެ ރޭހުގައި ސްކޫލު ތަކުގެ ބައިން ޖަލާލުއްދީން ސްކޫލުގެ ޓީމު ވަނީ އަންހެން އަދި ފިރިހެން ބައިން އެއްވަނަ ހޯދާފައެވެ. އެއްވަނަ ހޯދުމުން އެޓީމަށް ވަނީ ޓްރޮފީއަކާއި އެކު ދިހަ ހާސް ރުފިޔާގެ އިނާމެއް ލިބިފައެވެ.

މީގެ ހައަހަރު ކުރިން ފެށިގެން ދިރާގުން ކޮންމެ އަހަރަކުވެސް ބާއްވަމުން އަންނަ ރޯޑް ރޭސް މިއަހަރު ބޭއްވުމަށް ހަމަޖެހިފައި ވަނީ އަންނަ މަހުގެ 29 ވަނަ ދުވަހު އެވެ. އިޖްތިމާޢީ ކޮންމެ ވެސް ޝިއާރެއްގެ ދަށުން ރާއްޖޭގައި ބާއްވާ އެންމެ ދިގު ދުވުމަށް މިއަހަރު ދީފައިވާ ޝިއާރަކީ، “ކުޑަކުދިންނަށް ކުރާ އަނިޔާ ހުއްޓުވުމާއި ގެވެށި އަނިޔާ ހުއްޓުވު”މެވެ. ދުވުން ކުރިއަށް ދާއިރު، މި މައުލޫ އާބެހޭ ގޮތުން އާއްމުން ހޭލުންތެރިކުރުވާ މަޢުލޫމާތު ދޭނެއެވެ.

މި އިވެންޓްގެ ޕާޓްނަރުންގެ ގޮތުގައި ދިރާގާއެކު ހެޕީ މާކެޓާއި ސޮނީ ސްޕޯޓްސް އަދި އެތުލެޓިކްސް އެސޯސިއޭޝަނުން ހަރަކާތްތެރި ވާނެއެވެ. ދިރާގުން މަޢުލޫމާތު ދިން ގޮތުގައި މިދިޔަ އަހަރުގެ ދުވުމުގައި 1500 އަށް ވުރެ ގިނަ މީހުން ބައިވެރިވިއެވެ. މިއަހަރުގެ އިވެންޓްގައި ބައިވެރިވުމުގެ ފުރުސަތު ޖޫން 24 އާހަމައަށް ވަނީ ހުޅުވާލައިފަ އެވެ.